Waiata 26 - Paipera Tapu 2012

Te Īnoi o te Tangata Pai

Nā Rāwiri.

¹ Whakawākia ahau, e Ihowā, kua haere nei hoki ahau i te tapatahitanga o tōku ngākau; kua whakawhirinaki anō ki a Ihowā, nā, e kore e paheke.

² Tirohia iho ahau, e Ihowā, whakamātauria ahau, kia kitea ōku whatumanawa me tōku ngākau.

³ Kei mua hoki tōu atawhai i ōku kanohi; kua haere nei ahau i tōu pono.

⁴ Kāhore ahau i noho tahi ki ngā tāngata horihori; e kore anō ahau e tomo tahi me ngā tāngata tinihanga.

⁵ Kino tonu ahau ki te whakaminenga o ngā kaimahi i te hē, e kore anō ahau e noho tahi ki te hunga kino.

⁶ Ka horoia e ahau ōku ringa ki te harakore, ka taiāwhio ai i tāu āta, e Ihowā;

⁷ ā, ka rangona tōku reo e whakamoemiti ana, e whakapuaki ana i āu mahi whakamīharo katoa.

⁸ E Ihowā, kua aroha nei ahau ki tōu whare nohoanga, ki te wāhi e nohoia ana e tōu korōria.

⁹ Kei huia tōku wairua ki roto ki te hunga hara, me tōku ora ki roto ki te hunga toto.

¹⁰ He mahi nanakia hoki tā ō rātou ringa; kī tonu ō rātou matau i te utu whakapati.

¹¹ Ko ahau ia, ka haere i runga i tōku tapatahi; hokona ahau, tohungia hoki ahau.

¹² E tū ana tōku waewae i te wāhi tika; ka whakapaingia a Ihowā e ahau i roto i ngā whakaminenga.