Waiata 2 - Paipera Tapu 2012

Te Kīngi i Whiriwhiria e Ihowā

¹ He aha ka nana ai ngā tauiwi, ka whakaaro horihori ai ngā iwi?

² Whakatika mai ana ngā kīngi o te whenua, rūnanga tahi ana ngā ariki, ki te whawhai ki a Ihowā, ki tāna tangata hoki i whakawahi ai; me te kī anō,

³ “Kia motumotuhia e tātou ā rāua here, kia ākiritia ā rāua taura i a tātou.”

⁴ Ko ia kei te rangi e noho ana, ka kata ia; ka whakahī te Ariki ki a rātou.

⁵ Nā, ka kōrero ia ki a rātou me te riri anō; ka tino weriweri hoki, ka whakaohorere i a rātou,

⁶ “Ahakoa rā ka whakawahia e ahau tāku kīngi ki runga ki tāku maunga tapu, ki Hiona.”

⁷ Māku e whakapuaki te kupu: Kua mea a Ihowā ki ahau, “Ko koe tāku tama, nōnāianei koe i whakatupuria ai e ahau.

⁸ Īnoi ki ahau, ā, ka hoatu e ahau ki a koe ngā tauiwi hei kāinga mōu, me ngā tōpito o te whenua hei nohoanga tupu mōu.

⁹ Ka wāwāhi koe i a rātou ki te whiu rino, mongamonga noa rātou i a koe, ānō he oko nā te kaihanga rīhi.”

¹⁰ Nā, kia mahara rā, e ngā kīngi; kia ākona, e ngā kaiwhakawā o te whenua.

¹¹ Mahi atu ki a Ihowā i runga i te wehi, kia hari me te wiri.

¹² Kihia te tama kei riri ia, ā, ka mate koutou i te ara, ka hohoro tonu hoki te mura o tōna riri. Ka hari katoa te hunga e whakawhirinaki ana ki a ia.