Waiata 17 - Paipera Tapu 2012

Te Īnoi a te Tangata Pono

He īnoi nā Rāwiri.

¹ Whakarongo ki te tika, e Ihowā, tahuri mai ki tāku karanga, kia tītaha mai tōu taringa ki tāku īnoi, arā ki tā te ngutu tinihangakore.

² Kia puta mai te whakaritenga o tāku whakawā i tōu aroaro; tirohia mai e ōu kanohi te mea rite.

³ Kua whakamātauria e koe tōku ngākau; kua tirotirohia iho ahau e koe i te pō; kua whakamātau koe i ahau, ā, kāhore he mea i kitea e koe; e mea ana ahau kia kaua e hara tōku māngai.

⁴ Ko ngā mahi ia a te tangata, ko ngā kupu a tōu māngai tāku mea hei pā mai i ahau i ngā ara o te kaiwhakangaro.

⁵ I whakaūkia ōku hīkoinga ki āu ara, kīhai i paheke ōku waewae.

⁶ Kua karanga nei ahau ki a koe, nō te mea ka whakahoki kupu mai koe, e te Atua, ki ahau; whakatītahatia mai tōu taringa ki ahau, whakarongo ki tāku kupu.

⁷ Whakaaturia tōu aroha whakamīharo, ko koe hoki, ko tōu matau, te kaiwhakaora mō te hunga e whakawhirinaki ana ki a koe, i te hunga e whakatika mai ana.

⁸ Tiakina ahau, ānō ko te whatu o te kanohi, hunā ahau ki raro i te taumarumarutanga o ōu pākau,

⁹ i te hunga kino e tūkino nei i ahau, i ōku hoariri whakamate e karapoti nei i ahau.

¹⁰ E kōpakia ana rātou e ō rātou ngako; e kōrero whakapehapeha ana ō rātou māngai.

¹¹ Tēnei ō mātou hīkoinga te karapotia nei e rātou; matatau tonu iho ō rātou kanohi ki te tuku iho i a mātou ki te whenua.

¹² Kei te raiona e hiahia ana ki te hopu kai te rite, kei te kūao raiona e piri ana i ngā wāhi ngaro.

¹³ E ara, e Ihowā, haukotia tōna aroaro, turakina ia ki raro; whakaorangia tōku wairua ki tāu hoari i te tangata kino;

¹⁴ i ngā tāngata, mā tōu ringa, e Ihowā, i ngā tāngata o te ao. Kei tēnei ora nei tō rātou wāhi, ā, e whakakīia ana ō rātou kōpū e koe ki tāu taonga. E kikī ana rātou i te tamariki, whakarērea iho ngā toenga o ā rātou taonga ki ā rātou kōhungahunga.

¹⁵ Ko ahau, e kite ahau i tōu mata i runga i te tika, ā, ka tatū tōku ngākau, ina oho ake ahau, kia kite i tōu āhua.