Waiata 16 - Paipera Tapu 2012

He Īnoi Whakawhirinaki

He Mikitama nā Rāwiri.

¹ Tiakina ahau, e te Atua; e whakawhirinaki nei hoki ahau ki a koe.

² Kua mea ahau ki a Ihowā, “Ko koe tōku Ariki, kāhore ōku pai i tua atu i a koe.”

³ Ko te hunga tapu i runga i te whenua, te hunga pai rawa, kua ahu katoa tōku āhuareka ki a rātou.

⁴ Ka whakanuia ngā mamae o te hunga e whakawhiti ana i a Ihowā mō tētahi atua kē; e kore e ringihia e ahau ā rātou ringihanga toto, e kore anō ō rātou ingoa e whakahuatia e ōku ngutu.

⁵ Ko Ihowā te wāhi i wehea mai mōku, tāku kapu hoki; ko koe te kaiwhakapūmau i te wāhanga māku.

⁶ Kua takoto ōku aho ki ngā wāhi āhuareka, inā, he wāhi pai tōku.

⁷ Ka whakapaingia e ahau a Ihowā, i whakamahara nei i ahau; ka whakaako anō hoki ōku whatumanawa i ahau i te pō.

⁸ Kua waiho tonu e ahau a Ihowā ki tōku aroaro; kei tōku ringa matau nei ia, e kore ahau e whakakorikoria.

⁹ Koia i koa ai tōku ngākau, i whakamanamana ai tōku korōria, i takoto tūmanako ai anō ōku kikokiko.

¹⁰ Nō te mea e kore e waiho e koe tōku wairua i te rēinga, e kore e tukua tāu Mea Tapu kia kite i te pirau.

¹¹ Ka whakakitea mai e koe ki ahau te huarahi o te ora; kei tōu aroaro te hari nui, kei tōu matau ngā āhuareka e kore e mutu.