Waiata 149 - Paipera Tapu 2012

He Waiata Whakamoemiti Hou

¹ Whakamoemititia a Ihowā! Waiatatia ki a Ihowā he waiata hou, me te whakamoemiti ki a ia i te whakaminenga o te hunga tapu.

² Kia hari a Īharaira ki tōna kaihanga; kia koa ngā tama a Hiona ki tō rātou Kīngi.

³ Kia whakamoemiti rātou ki tōna ingoa me te kanikani anō; kia hīmene rātou ki a ia i runga i te timipera, i te hāpa.

⁴ E manako ana hoki a Ihowā ki tāna iwi; māna e whakaataahua te hunga māhaki ki te whakaoranga.

⁵ Kia koa te hunga tapu i runga i te korōria; kia hāmama rātou i te hari i runga i ō rātou moenga.

⁶ Kia whai whakamoemiti ō rātou māngai ki te Atua, kia whai hoari matarua tō rātou ringa;

⁷ hei rapu utu i ngā tauiwi, hei whiu i ngā iwi;

⁸ hei herehere i ō rātou kīngi ki te mekameka, i ō rātou tāngata nunui ki ngā here rino;

⁹ hei whakaputa ki a rātou i te whakaritenga kua oti te tuhituhi. Nō tōna hunga tapu katoa tēnei hōnore. Whakamoemititia a Ihowā!