Waiata 146 - Paipera Tapu 2012

He Whakamoemiti ki a Ihowā te Kaiwhakaora

¹ Whakamoemititia a Ihowā! E tōku wairua, whakamoemititia a Ihowā!

² I ahau e ora nei ka whakamoemiti ahau ki a Ihowā; ka hīmene ahau ki tōku Atua i ahau i te ao nei.

³ Kei whakawhirinaki ki ngā rangatira, ki te tama rānei a te tangata, kāhore nei he āwhina.

⁴ Ko te putanga atu o tōna wairua, hoki ana ia ki tōna oneone; kore iho ōna whakaaro i taua rā pū anō.

⁵ Ka hari te tangata ko te Atua nei o Hākopa tōna kaiāwhina; ko tāna e tūmanako ai ko Ihowā, ko tōna Atua;

⁶ ko te kaihanga o te rangi, o te whenua, o te moana, o ngā mea katoa o reira; e pupuri nei i te pono ake ake;

⁷ e tohe nei i te whakawā a te hunga e tūkinotia ana; e whāngai nei i te hunga mate hiakai. Ko Ihowā hei wewete i ngā herehere;

⁸ ko Ihowā hei whakatitiro i ngā matapō. Ko Ihowā hei whakaara i te hunga kua whakapikoa iho; e aroha ana a Ihowā ki te hunga tika.

⁹ Ko Ihowā hei tiaki i ngā manene; ko ia hei tautoko i te pani, i te pouaru; ko te ara ia o te hunga kino, ka huripokitia e ia.

¹⁰ Ko Ihowā hei kīngi ake ake, āe, ko tōu Atua, e Hiona, tae noa ki ngā whakatupuranga katoa. Whakamoemititia a Ihowā!