Waiata 145 - Paipera Tapu 2012

He Waiata Whakamoemiti

Nā Rāwiri, he whakamoemiti.

¹ Ka whakanui ahau i a koe, e tōku Atua, e te Kīngi; ka whakapai ki tōu ingoa ake ake.

² Ka whakapai ahau ki a koe i ngā rā katoa; ka whakamoemiti ki tōu ingoa ake ake.

³ He nui a Ihowā, kia nui anō te whakamoemiti ki a ia; e kore e taea tōna nui te rapu.

⁴ Mā tētahi whakatupuranga e whakamoemiti āu mahi, tae noa atu ki tētahi whakatupuranga; e kōrero hoki āu mahi nunui.

⁵ Ka kōrerotia e ahau te korōria, te hōnore o tōu nui, me āu mahi whakamīharo.

⁶ Ka kōrerotia anō e te tangata te kaha o āu mahi whakamataku; māku anō e kōrero tōu nui.

⁷ Ka whakapuakina e rātou te mahara ki te nui o tōu pai; ka waiatatia anō tōu tika.

⁸ He atawhai a Ihowā, he aroha; he pūhoi ki te riri, he nui tāna mahi tohu.

⁹ He pai a Ihowā ki ngā mea katoa; kei runga anō tōna aroha i āna mahi katoa.

¹⁰ E whakamoemititia koe, e Ihowā, e āu mahi katoa; e whakapaingia e tōu hunga tapu.

¹¹ Mā rātou e kōrero te korōria o tōu kīngitanga, e kauwhau hoki tōu kaha;

¹² kia mōhiotia ai e ngā tama a te tangata āna mahi nunui, me te korōria o te maruwehi o tōna kīngitanga.

¹³ He kīngitanga mutungakore tōu kīngitanga; kei ngā whakatupuranga katoa tōu rangatiratanga.

¹⁴ E tautokona ana e Ihowā te hunga katoa e hinga ana; e whakaarahia ake ana hoki e ia te hunga katoa kua whakapikoa iho.

¹⁵ E tatari ana ki a koe ngā kanohi o te katoa; ā, e hoatu ana e koe ki a rātou tā rātou kai i te wā e tika ai.

¹⁶ E whakatuwhera ana koe i tōu ringa, ā, mākona iho i a koe te hiahia o ngā mea ora katoa.

¹⁷ He tika ngā ara katoa o Ihowā; he tapu hoki āna mahi katoa.

¹⁸ E tata ana a Ihowā ki te hunga katoa e karanga ana ki a ia; ki te hunga katoa e karanga pono ana ki a ia.

¹⁹ Ka whakamanā e ia te hiahia o te hunga e wehi ana i a ia; e whakarongo hoki ia ki tā rātou tangi, ā, ka whakaora i a rātou.

²⁰ Ko Ihowā hei tiaki i te hunga katoa e aroha ana ki a ia; ko te hunga kino katoa ia e ngaro i a ia.

²¹ Mā tōku māngai e kōrero te whakamoemiti ki a Ihowā; kia whakapai anō hoki ngā kikokiko katoa ki tōna ingoa tapu ake ake.