Waiata 144 - Paipera Tapu 2012

Te Īnoi o tētahi Kīngi

Nā Rāwiri.

¹ Kia whakapaingia a Ihowā, tōku kāmaka, e whakaako nei i ōku ringa ki te whawhai, i ōku maihao ki te tatau;

² ko te atawhai mōku, ko tōku pā, ko tōku pourewa me tōku kaiwhakaora, ko tōku whakangungu rākau, ko tāku e whakawhirinaki ai, ko te kaipēhi hoki o tōku iwi ki raro i ahau.

³ E Ihowā, he aha te tangata i maharatia ai ia e koe, te tama rānei a te tangata i whakaaroa ai ia e koe?

⁴ Ko te rite o te tangata kei te mea memeha noa; ōna rā me te mea he ātārangi e rere atu ana.

⁵ Whakapikoa iho ōu rangi e Ihowā, ā, heke iho; pā ki ngā maunga, ā, ka pongere.

⁶ Kōkiritia mai he uira hei whakamarara i a rātou; kōperea mai āu pere, kia whati ai rātou.

⁷ Totoro iho tōu ringa i runga; tangohia ahau, whakaorangia ahau i ngā wai nunui, i te ringa o ngā tāngata kē;

⁸ e kōrero teka nei tō rātou māngai, ā, he ringa matau teka tō rātou ringa matau.

⁹ Ka waiatatia e ahau he waiata hou ki a koe, e te Atua; ka hīmene atu ahau ki a koe i runga i te hātere aho tekau.

¹⁰ Ko ia te kaihōmai i te whakaoranga ki ngā kīngi, te kaiwhakaora i a Rāwiri, i tāna pononga, i te hoari whakamate.

¹¹ Tangohia ahau, whakaorangia hoki i ngā ringa o ngā tāngata kē, e kōrero teka nei ō rātou māngai, ā, he ringa matau teka tō rātou ringa matau.

¹² Ā, kia rite ā mātou tama i tō rātou taitamarikitanga ki ngā māhuri e tupu ake ana; ā mātou tamāhine hoki ki ngā kōhatu kokonga, whakapaipai rawa, nō te whare rangatira te tauira.

¹³ Kia kī ā mātou pākoro, mō te tiki noa atu i tēnā mea, i tēnā mea; kia mano, kia tini ngā hua o ā mātou hipi i ō mātou pārae;

¹⁴ kia taimaha ā mātou kau i ngā pīkaunga. Kia kāhore he pākarutanga mai ki roto, he whatinga atu hoki ki waho, ā, kia kāhore he auē i ō mātou huarahi.

¹⁵ Ka hari te iwi e pēnā ana; āe, ka hari te iwi ko Ihowā nei tō rātou Atua.