Waiata 143 - Paipera Tapu 2012

He Īnoi mō te Āwhina

He hīmene nā Rāwiri.

¹ E Ihowā, whakarongo ki tāku īnoi, kia tītaha mai tōu taringa ki āku īnoi; whakahokia mai he kupu ki ahau i runga i tōu pono, i runga i tōu tika.

² Ā, kaua e anga e whakawā ki tāu pononga; ki tāu titiro hoki kāhore tētahi mea ora e tika.

³ Kua tūkinotia hoki tōku wairua e te hoariri, patua iho e ia tōku ora ki raro ki te whenua; meinga ana ahau e ia kia noho i ngā wāhi pōuri, kia rite ki ngā tūpāpaku onamata.

⁴ Nā reira i ngaro ai tōku wairua i roto i ahau; mōtī rawa tōku ngākau i roto i ahau.

⁵ E mahara ana ahau ki ngā rā onamata; e whakaaro ana ki āu mahi katoa, e whakaaroaro ana ahau ki ngā meatanga a ōu ringa.

⁶ Totoro tonu atu ōku ringa ki a koe; e hiainu ana tōku wairua ki a koe, ānō he whenua māuiui. Hera

⁷ Hohoro te whakahoki kupu mai ki ahau, e Ihowā; ka hemo tōku wairua. Kei hunā tōu mata ki ahau; kei rite ahau ki te hunga e heke ana ki te poka.

⁸ Meinga kia rongo ahau ki tōu aroha i te ata; e whakawhirinaki ana hoki ahau ki a koe. Meinga kia mātau ahau ki te ara e haere ai ahau; kua ara nei hoki tōku wairua ki a koe.

⁹ Whakaorangia ahau, e Ihowā, i ōku hoariri; ka kuhu nei ahau ki roto ki a koe.

¹⁰ Whakaakona ahau ki te mea i tāu e pai ai; ko koe hoki tōku Atua. He pai tōu wairua; ārahina ahau ki te whenua o te tika.

¹¹ Whakahauorangia ahau, e Ihowā, he whakaaro ki tōu ingoa. Whakaarohia tōu tika, ka whakaputa ake i tōku wairua i roto i te pōuri.

¹² Aroha mai hoki, ā, hunā ōku hoariri; whakangaromia katoatia anō ngā kaitūkino o tōku wairua; he pononga hoki ahau nāu.