Waiata 141 - Paipera Tapu 2012

He Īnoi mō te Whakaoranga mai i te Kino

He hīmene nā Rāwiri.

¹ E Ihowā, kua tangi nei ahau ki a koe; hohoro mai ki ahau; whakarongo ki tōku reo ua karanga ahau ki a koe.

² Kia whakatikaia tāku īnoi ki tōu aroaro, hei whakakakara; te toronga atu hoki o ōku ringa ānō ko te whakahere o te ahiahi.

³ Hōmai he kaitiaki mō tōku māngai, e Ihowā; tiakina te kūwaha o ōku ngutu.

⁴ Kaua e whakaangahia tōku ngākau ki te mea kino, ki te mahi i ngā mahi hīanga i roto i ngā kaimahi i te kino; kaua anō ahau e kai i ā rātou mea papai.

⁵ Mā te tangata tika ahau e patu; he mahi aroha tēnā; māna ahau e riri. He hinu tēnā ki runga ki te upoko, kaua ia e paopaongia e tōku upoko. Ahakoa hoki i roto i tō rātou kino ka īnoi tonu ahau.

⁶ E turakina ana ō rātou kaiwhakawā ki te taha o te kōhatu, ā, ka rongo rātou i āku kupu, he reka hoki.

⁷ “Pera i tētahi e haehae ana, e wāwāhi ana i te whenua, e tītaritaria ana ō mātou wheua ki te waha o te rēinga.”

⁸ Otiia, e tau ana ōku kanohi, e Ihowā, e te Ariki, ki a koe; ko koe tōku whakawhirinakitanga; kaua tōku wairua e waiho pani.

⁹ Tiakina ahau kei mau i ngā māhanga i whakatakotoria e rātou mōku, i ngā rore hoki a ngā kaimahi i te kino.

¹⁰ Kia taka te hunga kino ki roto ki ā rātou kupenga anō; ko ahau ia kia mawhiti.