Waiata 139 - Paipera Tapu 2012

Ka Tata a Ihowā i ngā Wā Katoa

Ki te tino kaiwhakatangi. He hīmene nā Rāwiri.

¹ E Ihowā, kua tirotirohia ahau e koe, kua mōhiotia anō e koe.

² E mātau ana koe ki tōku nohoanga iho, ki tōku whakatikanga ake; e mōhio ana koe ki ōku whakaaro i tawhiti.

³ E kitea pūtia ana e koe tōku ara me tōku takotoranga iho; e matatau ana hoki koe ki ōku ara katoa.

⁴ Kāhore rawa hoki he kupu i tōku arero, i toe i a koe te mōhio, e Ihowā.

⁵ Kua hangā a muri, a mua, ōku e koe; kua pā anō tōu ringa ki ahau.

⁶ He mea whakamīharo rawa, kei tawhiti atu hoki i ahau, tēnei mātauranga; kei runga noa atu, e kore e taea e ahau.

⁷ Me haere ahau ki hea i tōu wairua? Me oma rānei ahau ki hea i tōu aroaro?

⁸ Ki te kake ahau ki te rangi, kei reira koe; ki te whārikitia e ahau tōku moenga i roto i te rēinga, kei reira anō koe.

⁹ Ki te tango ahau ki ngā pākau o te ata, ā, ka noho ki ngā tōpito o te moana;

¹⁰ kei reira anō tōu ringa hei ārahi i ahau, tōu matau hei pupuru i ahau.

¹¹ Ki te mea ahau, “He pono, tērā ahau e hīpokina e te pōuri, ā, ko te mārama i tētahi taha ōku, i tētahi taha, ka meinga he pō,”

¹² ahakoa te pōuri kāhore e huna mai i a koe, engari ka mārama te pō ānō ko te ao, ki a koe rite tahi te pōuri me te mārama.

¹³ I a koe hoki ōku whatumanawa; nāu hoki ahau i hīpoki i roto i te kōpū o tōku whaea.

¹⁴ Ka whakawhetai ahau ki a koe; he mea whakawehi, he mea whakamīharo tōku hanganga; he mahi whakamīharo āu mahi, mōhio rawa anō tōku wairua ki tēnā.

¹⁵ Kīhai i hunā ōku wāhi i a koe, i ahau e hangā ngarotia ana, e āta whakairohia ana i ngā wāhi hōhonu rawa o te whenua.

¹⁶ I kite ōu kanohi i ahau, kāhore anō kia āhua noa. I tuhituhia katoatia anō hoki ōku wāhi ki tāu pukapuka, i ngā rangi i whakaahua ai, i te mea kāhore anō tētahi i oti noa.

¹⁷ Kia pēhea mai hoki te matenui o ōu whakaaro ki ahau, e te Atua; koia anō te ranea, ina huihuia!

¹⁸ Ki te taua e ahau – maha atu i te onepū; ka oho ake ahau – kei a koe tonu ahau.

¹⁹ He pono ka patua e koe, e te Atua, te tangata kino; mawehe koia atu i ahau, e ngā tāngata toto.

²⁰ He kino hoki ā rātou kupu mōu; e whakahua noa ana ōu hoariri i tōu i ingoa.

²¹ Kāhore ianei ahau, e Ihowā, e kino ki te hunga e kino ana ki a koe? E whakarihariha hoki ki te hunga e whakatika ana ki a koe?

²² He tino kino tāku kino ki a rātou; waiho iho rātou e ahau hei hoariri mōku.

²³ Tirohia iho ahau, e te Atua, kia mātau hoki koe ki tōku ngākau; whakamātautauria ahau, kia mātau hoki koe ki ōku whakaaro.

²⁴ Kia kite mehemea kei ahau tētahi ara o te kino, ka ārahi ai i ahau i te ara pūmau.