Waiata 132 - Paipera Tapu 2012

He Kawanga o te Temepara

He waiata; he pikitanga.

¹ E Ihowā, maharatia a Rāwiri, me ōna mamaetanga ngākau katoa;

² tāna oati ki a Ihowā, tāna kupu taurangi ki te Mea Nui o Hākopa,

³ “E kore rawa ahau e tae ki tōku whare e noho ai ahau, e eke rānei ki runga ki tōku moenga;

⁴ e kore ahau e tuku i ōku kanohi kia moe, i ōku kamo kia nenewha,

⁵ kia kitea rā anō e ahau he wāhi mō Ihowā, he nohoanga mō te Mea Nui o Hākopa.”

⁶ Nā, i rangona e mātou ki Ēparata, i kitea ki ngā māra o te ngahere.

⁷ “Ka haere mātou ki roto ki ōna tapenākara; ka koropiko ki tōna tūranga waewae.”

⁸ E ara, e Ihowā, ki tōu okiokinga, a koe, me te āka o tōu kaha.

⁹ Kia whakakākahuria āu tohunga ki te tika, kia hāmama tāu hunga tapu i te hari.

¹⁰ Whakaaro ki a Rāwiri, ki tāu pononga, kaua e whakapeaua atu te mata o tāu i whakawahi ai.

¹¹ Kua oati pono a Ihowā ki a Rāwiri, e kore ia e tahuri kē i tēnā: “Ka whakanohoia e ahau tētahi hua o tōu kōpū ki tōu torōna.

¹² Ki te puritia e āu tama tāku kawenata, me tāku whakaaturanga e ako ai ahau ki a rātou, ka noho anō ā rātou tama ki tōu torōna ake ake.”

¹³ Kua whiriwhiria hoki e Ihowā a Hiona; kua hiahiatia e ia hei nohoanga mōna:

¹⁴ “Ko tōku okiokinga tēnei ake ake; ko konei ahau noho ai, kua hiahiatia hoki e ahau.

¹⁵ Ka manaakitia rawatia e ahau tāna kai; ka whakamākonatia e ahau ōna rawakore ki te taro.

¹⁶ Ka whakakākahuria hoki e ahau ōna tohunga ki te whakaoranga, ā, ka hāmama tōna hunga tapu i te hari.

¹⁷ “Ka meinga e ahau kia pihi ki reira te haona o Rāwiri; kua whakapaia e ahau he rama mō tāku i whakawahi ai.

¹⁸ Ka whakakākahuria e ahau ōna hoariri ki te whakamā, ā, ka matomato tōna karauna i runga i a ia.”