Waiata 12 - Paipera Tapu 2012

He Īnoi mō te Āwhina i ngā Wā Kino

Ki te tino kaiwhakatangi: Heminiti. He hīmene nā Rāwiri.

¹ Whakaorangia, e Ihowā; ka mutu hoki ngā tāngata tapu; ka taweke atu te hunga pono i roto i ngā tama a te tangata.

² E kōrero teka ana rātou tētahi ki tētahi; he ngutu patipati, he ngākau rua ō rātou ina kōrero.

³ Ka hātepea e Ihowā ngā ngutu patipati katoa, me te arero e kōrero whakapehapeha ana;

⁴ e mea nei, “Mā ō tātou arero tātou ka kake ai; nō tātou anō ō tātou ngutu, ko wai hei ariki mō tātou?”

⁵ “Mō te tūkinotanga i te hunga iti, mō te auē a te hunga rawakore, ka whakatika ahau āianei,” e ai tā Ihowā, “Ka whakanohoia ia e ahau ki te wāhi e ora ai ia i ngā tāngata e whakatūpererū ana ki a ia.”

⁶ He kupu parakore ngā kupu a Ihowā; he hiriwa i whakakorea nei te para i roto i te oumu whenua, he mea tuku whitu.

⁷ Ka tiakina rātou e koe, e Ihowā, ka whakaorangia rātou i tēnei whakatupuranga ake tonu atu.

⁸ E hāereere noa ana ngā tāngata kino i tētahi taha, i tētahi taha, i te mea e whakateiteitia ana te kino i roto i ngā tama a te tangata.