Waiata 110 - Paipera Tapu 2012

Ko Ihowā me Tāna Kīngi i Whiriwhiri

He hīmene nā Rāwiri.

¹ I mea a Ihowā ki tōku Ariki, “Hei tōku matau koe noho ai, kia meinga rā anō e ahau ōu hoariri hei tūranga waewae mōu.”

² Mā Ihowā e tono mai te tokotoko o tōu kaha i Hiona; hei rangatira koe i waenganui i ōu hoariri.

³ Ka kakama tōu iwi ki te tāpae atu i a rātou i te rā o tōu kaha, i te ātaahua o ngā mea tapu. Nō te kōpū mai o te ata, kei a koe te tōmairangi o tōu whanaketanga.

⁴ Kua oati a Ihowā, e kore anō tāna e puta kē; “Hei tohunga koe ake ake, nō te tikanga o Merekihereke.”

⁵ Kei tōu matau te Ariki; ka marū i a ia ngā kīngi i te rā e riri ai ia.

⁶ E whakawā ia i waenganui i ngā tauiwi; e whakakīia e ia ngā whenua ki te tūpāpaku; ka marū i a ia ngā upoko i ngā whenua maha.

⁷ Ka inu wai ia i te awa i te ara, ā, ka ara tōna mātenga.