Waiata 105 - Paipera Tapu 2012

Ko te Atua me Tāna Iwi

¹ Whakawhetai ki a Ihowā, karanga atu ki tōna ingoa; whakapuakina āna mahi ki waenganui o ngā iwi.

² Waiata ki a ia, hīmene ki a ia; kōrerotia āna mahi whakamīharo katoa.

³ Whakamanamana ki tōna ingoa tapu; kia hari te ngākau o te hunga e rapu ana i a Ihowā.

⁴ Rapua a Ihowā me tōna kaha; rapua tonutia tōna mata, ake ake.

⁵ Maharatia āna mahi whakamīharo i mahia e ia, āna merekara me ngā whakaritenga a tōna māngai,

⁶ e ngā uri o Āperahama, o tāna pononga, e ngā tama a Hākopa, e āna i whiriwhiri ai.

⁷ Ko Ihowā ia, ko tō tātou Atua; kei te whenua katoa āna whakaritenga.

⁸ Mahara tonu ia ki tāna kawenata ake ake, ki te kupu i kīia iho e ia ki te mano o ngā whakatupuranga.

⁹ Ki tāna i whakarite ai ki a Āperahama, ki tāna oati hoki ki a Īhaka,

¹⁰ ā, whakapūmautia iho e ia hei tikanga ki a Hākopa, hei kawenata mau tonu ki a Īharaira.

¹¹ I a ia rā i mea, “Ka hoatu e ahau ki a koe te whenua o Kanaana hei wāhi pūmau mō koutou.”

¹² I te mea he hunga torutoru rātou; āe rā, he iti rawa, he manene anō ki reira.

¹³ I a rātou e hāereere ana i tēnei iwi ki tērā atu iwi, i tētahi rangatiratanga ki tētahi iwi kē,

¹⁴ kīhai rātou i tukua e ia kia tūkinotia e te tangata; he whakaaro anō ki a rātou i rīria ai e ia ngā kīngi,

¹⁵ i mea ia, “Kei pā ki āku i whakawahi ai; kei kino ki āku poropiti.”

¹⁶ I karangatia e ia te matekai ki te whenua; whati katoa i a ia te tokotoko, arā te taro.

¹⁷ I tonoa e ia he tangata i mua i a rātou; i hokona a Hōhepa hei pononga.

¹⁸ I whakamamaetia ōna waewae ki te mekameka; takoto ana ia i te rino;

¹⁹ ā puta noa tāna kupu, whakamātautauria ana ia e te kupu a Ihowā.

²⁰ I tono te kīngi, ā, wetekina ana ia; arā te kīngi o ngā iwi, ā, tukua ana ia.

²¹ Ā, meinga ana ia e ia hei ariki mō tōna whare, hei rangatira mō ōna taonga katoa;

²² hei herehere i āna rangatira ua pai ia, hei ako i āna kaumātua ki te whakaaro.

²³ I haere mai anō a Īharaira ki Īhipa; ā, noho ana a Hākopa ki te whenua o Hama.

²⁴ Nā, ka tino whakanuia e ia tāna iwi; ā, ka meinga rātou kia kaha ake i ō rātou hoariri.

²⁵ I whakakoarotia e ia tō rātou ngākau kia kino ki tāna iwi, kia mahi hīanga ki āna pononga.

²⁶ I tonoa e ia a Mohi, tāna pononga, rāua ko Ārona, ko tāna i whiriwhiri ai.

²⁷ Whakaputaina ana e rāua āna tohu i waenganui i a rātou, he merekara i te whenua o Hama.

²⁸ I tukua e ia te pōuri, ā, kua pōuri; kīhai anō rātou i whakakeke ki āna kupu.

²⁹ I whakaputaia kētia e ia ō rātou wai hei toto; ā, mate ake i a ia ā rātou ngohi.

³⁰ I whakangahue ake tō rātou whenua i te poroka, i roto i ngā whare moenga o ō rātou kīngi.

³¹ I whai kupu ia, ā, puta ana mai ngā pōkai namu; me te kutu i ō rātou kāinga.

³² I tukua iho e ia ki a rātou te whatu hei ua, me te ahi mura ki tō rātou whenua.

³³ I pākia anō e ia ā rātou wāina me ā rātou piki; ā, whatiwhatiia ana e ia ngā rākau o ō rātou kāinga.

³⁴ I kōrero ia, ā, puta ana mai te māwhitiwhiti me te moka, tē taea te tatau,

³⁵ ā, kainga katoatia āna ngā otaota o tō rātou whenua; pau ake ngā hua o tō rātou oneone.

³⁶ I whakamatea katoatia anō hoki e ia ngā mātāmua o tō rātou whenua, te muanga o tō rātou kaha.

³⁷ Ā, whakaputaina mai ana rātou e ia, me te hiriwa, me te kōura, kāhore hoki he mea tūoi i roto i āna iwi.

³⁸ Nā, hari ana a Īhipa i tō rātou haerenga; i mau hoki tō rātou wehi ki a rātou.

³⁹ I horahia e ia te kapua hei hīpoki, me te ahi hei whakamārama i te pō.

⁴⁰ I īnoi rātou, ā, hōmai ana e ia te koitareke; ā, ka mākona rātou i te taro o te rangi.

⁴¹ I wāhia e ia te kōhatu, ā, ka pakaru mai ngā wai; rere ana i ngā wāhi maroke, koia anō kei te awa.

⁴² I mahara hoki ia ki tāna kupu tapu, ki a Āperahama anō, ki tāna pononga.

⁴³ Ā, whakaputaina mai ana e ia tāna iwi i runga i te hari, āna i whiriwhiri ai i runga i te koa.

⁴⁴ Ā, hōmai ana e ia ki a rātou ngā whenua o ngā tauiwi; ā, riro ana i a rātou ngā māuiuitanga o te iwi,

⁴⁵ kia puritia ai e rātou āna tikanga, kia mau ai ki āna ture. Whakamoemititia a Ihowā!