Waiata 102 - Paipera Tapu 2012

He Īnoi o tētahi Taitama Āwangawanga

He īnoi nā te ngākau mamae, i a ia e pēhia ana, ā, maringi a wai ana tāna tangi ki te aroaro o Ihowā.

¹ Whakarongo ki tāku īnoi, e Ihowā, kia puta atu tāku tangi ki a koe.

² Kaua e hunā tōu mata ki ahau i te rā e pōuri ai ahau. Whakatītahatia mai tōu taringa ki ahau; hohoro te whakahoki kupu mai ki ahau i te rā e karanga ai ahau.

³ Ka memeha hoki ōku rā ānō he paoa; ka kāia ōku wheua ānō he motumotu.

⁴ Kua pākia tōku ngākau, kua memenge, ānō he tarutaru; i wareware ai ahau ki te kai i tāku taro.

⁵ Piri tonu ōku iwi ki tōku kiri i tōku reo auē.

⁶ He rite ahau ki te matuku i te koraha, ki te koukou i te wāhi mokemoke.

⁷ Mataara tonu ahau; tōku rite kei te pīhoihoi mokemoke i runga i te tuanui.

⁸ E tāwai ana ōku hoariri ki ahau i te rā roa; ko te hunga e pōrangirangi ana mai ki ahau, ko ahau tā rātou oati.

⁹ Kainga ana e ahau te pungarehu ānō he taro; whakananua iho tōku wai inu ki te roimata.

¹⁰ I tōu riri hoki, i tōu weriweri; nāu hoki ahau i hāpai ake, ā, tāia atu anō ahau e koe.

¹¹ He rite ōku rā ki te ātārangi e whakawairua kau ana; ā, kua memenge ahau ānō he tarutaru.

¹² Ko koe ia, e Ihowā, ka mau tonu ake ake, ka maharatia anō koe e ngā whakatupuranga katoa.

¹³ Tērā koe e whakatika, e aroha ki a Hiona; kua taka mai hoki te wā, āe rā, te tino wā, hei atawhainga i a ia.

¹⁴ E manakohia ana hoki e āu pononga ōna kōhatu, e āwangawanga ana ki tōna puehu.

¹⁵ Pēnei ka wehingia te ingoa o Ihowā e ngā tauiwi, tōu korōria hoki e ngā kīngi katoa o te whenua.

¹⁶ Nā Ihowā hoki i hanga a Hiona, kua kitea ia i tōna korōria.

¹⁷ Kua tahuri ia ki te īnoi a te rawakore; kīhai i whakahāwea ki tā rātou īnoi.

¹⁸ Ka tuhituhia tēnei mō tō muri whakatupuranga; ā, ka whakamoemiti ki a Ihowā te iwi meāke hangā:

¹⁹ mōna i titiro iho i te tiketike o tōna wāhi tapu; i titiro iho a Ihowā i te rangi ki te whenua;

²⁰ ki te whakarongo ki te auē a te herehere, ki te wewete i te hunga kua motuhia mō te mate;

²¹ kia whakapuakina ai te ingoa o Ihowā i Hiona, me te whakamoemiti ki a ia i Hiruhārama;

²² i te huihuinga o ngā iwi, o ngā kīngitanga, ki te mahi ki a Ihowā.

²³ Whakangoikoretia iho e ia tōku kaha i te ara; kua torutoru i a ia ōku rā.

²⁴ I mea ahau, “E tōku Atua, kaua ahau e tangohia i waenganui o ōku rā; kei ngā whakatupuranga katoa ōu tau.”

²⁵ Nōnamata te whenua i whakatūria ai e koe, ā, he mahi ngā rangi nā ōu ringa.

²⁶ Ko ērā e hemo atu, ko koe ia e mau tonu; āe rā, ka tawhitotia katoatia me he weweru. Ka whakaputaia kētia rātou e koe ānō he kākahu, ā, ka whakaputaia kētia.

²⁷ Ko koe ia, ko koe tonu, kāhore hoki he mutunga o ōu tau.

²⁸ Ka whai nohoanga ngā tama a āu pononga, ka pūmau ō rātou uri ki tōu aroaro.