Tauanga 34 - Paipera Tapu 2012

Ngā Rohe o te Whenua

¹ I kōrero anō a Ihowā ki a Mohi, i mea,

² “Whakahaua ngā tama a Īharaira, mea atu ki a rātou: E tae koutou ki te whenua o Kanaana (ko te whenua tēnei e riro i a koutou hei kāinga tupu, arā te whenua o Kanaana, me ōna rohe),

³ nā, kei te koraha o Hini te taha ki a koutou whaka te tonga, haere tonu i te rohe o Ēroma. Ā, hei rohe ki a koutou ki te tonga te pito rawa o te Moana Tote, whaka te rāwhiti.

⁴ Nā, ka piko tō koutou rohe i te tonga ki te pikitanga o Akarapimi, ā, whiti tonu ki Hini. Nā, ka rere i te tonga, a Karehepārenea, haere, a Hatarārara, whiti tonu atu ki Atamono.

⁵ Nā, ka piko te rohe i Atamono, ā te awa o Īhipa, ā, marere atu ki te moana.

⁶ “Nā, ko te rohe ki te hauāuru, ko te Moana Nui me tōna rohe; ko tō koutou rohe ki te hauāuru tēnei.

⁷ “Ā, ko tēnei tō koutou rohe ki te raki: me whakatakoto e koutou i te Moana Nui ki Maunga Horo;

⁸ me whakatakoto anō hoki i Maunga Horo ki te haerenga atu ki Hāmata; ā, kei Terara ngā putanga atu o te rohe;

⁹ ā, ka tae te rohe ki Tipirono, ā, kei Hataraenana ōna putanga atu; ko te rohe tēnei ki a koutou whaka te raki.

¹⁰ “Me whakatakoto anō tō koutou rohe ki te rāwhiti i Hataraenana ki Hepama;

¹¹ ā, ka haere te rohe ki raro i Hepama ki Ripira, ki te taha ki te rāwhiti o Aina; ā, ka haere tonu te rohe ki raro, ā, ka tae ki te taha o te Moana o Kinereta whaka te rāwhiti;

¹² ā, ka haere te rohe ki Horano, ā, kei te Moana Tote ōna putanga. “Ko te whenua tēnei mō koutou, me ōna rohe ā tawhio noa.

¹³ “Nā, ka whakahau a Mohi i ngā tama a Īharaira, ka mea: Ko te whenua tēnei e rotarotatia hei kāinga pūmau mō koutou, ko tā Ihowā i whakahau ai kia hoatu ki ngā iwi e iwa, ki tētahi tānga hoki o tētahi iwi;

¹⁴ kua whiwhi hoki te iwi o ngā tama a Reupena, ngā whare o ō rātou mātua, me te iwi o ngā tama a Kara, ngā whare o ō rātou mātua; kua whiwhi anō tētahi tānga o te iwi o Mānahi ki tō rātou wāhi.

¹⁵ Kua whiwhi ngā iwi e rua me tētahi tānga o tētahi iwi ki tō rātou wāhi i tēnei taha o Horano, e anga ana ki Heriko whaka te rāwhiti, ki te putanga mai o te rā.”

Ngā Kaituwha i te Whenua

¹⁶ I kōrero anō a Ihowā ki a Mohi, i mea,

¹⁷ Ko ngā ingoa ēnei o ngā kaituwha i te whenua mō koutou: ko Ereātara tohunga rāua ko Hohua tama a Nunu.

¹⁸ Me tango anō tētahi rangatira o tēnei iwi, o tēnei iwi, hei tuwha mō te whenua.

¹⁹ Ā, ko ngā ingoa o aua tāngata: “Karepe tama a Iepune o te iwi o Hūrā,

²⁰ Ā, ko tō te iwi o ngā tama a Himiona, Hemuera tama a Amihuru.

²¹ Ko tō te iwi o Pineamine, ko Erirara tama a Kihirono.

²² Ko te rangatira hoki o te iwi o ngā tama a Rāna, ko Puki tama a Iokiri.

²³ Ko te rangatira o ngā tama a Hōhepa, arā o te iwi o ngā tama a Mānahi, ko Haniere tama a Epora.

²⁴ Ko te rangatira o te iwi o ngā tama a Ēparaima, ko Kemuere tama a Hipitana.

²⁵ Ko te rangatira o te iwi o ngā tama a Hepurona, ko Eritapana, tama a Paranaka.

²⁶ Ko te rangatira o te iwi o ngā tama a Ihākara, ko Paratiere tama a Atana.

²⁷ Ko te rangatira o te iwi o ngā tama a Āhera, ko Ahihuru tama a Heromi.

²⁸ Ko te rangatira o te iwi o ngā tama a Napatari, ko Perahere tama a Amihuru.”

²⁹ Ko ēnei a Ihowā i whakahau ai hei tuwha i te kāinga mō ngā tama a Īharaira i te whenua o Kanaana.