Tauanga 33 - Paipera Tapu 2012

Ngā Haerenga i Īhipa ki ngā Mānia o Moapa

¹ Ko ngā haerenga ēnei o ngā tama a Īharaira i tō rātou putanga mai i te whenua o Īhipa i ō rātou rōpū i raro i te ringa o Mohi rāua ko Ārona.

² I tuhituhia hoki e Mohi ō rātou haerenga atu, ō rātou whakatikanga atu, he mea ki mai nā Ihowā; ā, ko ō rātou whakatikanga atu ēnei, me ō rātou haerenga.

³ I tūria atu i Ramehehe i te marama tuatahi, i te kotahi tekau mā rima o ngā rā o te marama tuatahi; nō te aonga ake o te Kapenga i puta mai ai ngā tama a Īharaira, i runga tonu anō te ringa i te tirohanga a ngā Īhipiana katoa;

⁴ i ngā Īhipiana e tanu ana i ā rātou mātāmua katoa, i patua nei e Ihowā i roto i a rātou; ā, mahi whakawā ana a Ihowā ki ō rātou atua.

⁵ Nā, tūria ana e ngā tama a Īharaira i Ramehehe, ā, noho ana i Hukota.

⁶ I tūria i Hukota, ā, noho ana i Ētama, i te pito o te koraha.

⁷ I tūria i Ētama, ā, tahuri ana whaka Pihahirota ki te ritenga atu o Paara-Hepona; ā, noho ana i te ritenga atu o Mikitoro.

⁸ I tūria i te ritenga atu o Pihahirota, ā, tika ana nā waenganui o te moana ki te koraha; ā, haere ana, e toru ngā rā ki te ara, i te koraha o Ētama, ā, noho ana i Mara.

⁹ I tūria i Mara, ā, haere ana ki Erimi; kotahi tekau mā rua hoki ngā puna wai i Erimi, e whitu tekau hoki ngā nīkau; ā, noho ana rātou i reira.

¹⁰ I tūria i Erimi, ā, noho ana i te taha o te Moana Whero.

¹¹ I tūria i te Moana Whero, ā, noho ana i te koraha o Hini.

¹² I tūria i te koraha o Hini, ā, noho ana i Ropoka.

¹³ I tūria i Ropoka, ā, noho ana i Aruhu.

¹⁴ I tūria i Aruhu, ā, noho ana i Repirimi, i te wāhi kāhore nei he wai hei inu mā te iwi.

¹⁵ I tūria i Repirimi, ā, noho ana i te koraha o Hinai.

¹⁶ I tūria i te koraha o Hinai, ā, noho ana i Kipiroto Hataawa.

¹⁷ I tūria i Kipiroto Hataawa, ā, noho ana i Hateroto.

¹⁸ I tūria i Hateroto, ā, noho ana i Ritima.

¹⁹ I tūria i Ritima, ā, noho ana i Rimono Parehe.

²⁰ I tūria i Rimono Parehe, ā, noho ana i Rīpina.

²¹ I tūria i Rīpina, ā, noho ana i Ritaha.

²² I tūria i Ritaha, ā, noho ana i Keherataha.

²³ I tūria i Keherataha, ā, noho ana i Maunga Hapere.

²⁴ I tūria i Maunga Hapere, ā, noho ana i Harataha.

²⁵ I tūria i Harataha, ā, noho ana i Makaheroto.

²⁶ I tūria i Makaheroto, ā, noho ana i Tahata.

²⁷ I tūria i Tahata, ā, noho ana i Taraha.

²⁸ I tūria i Taraha, ā, noho ana i Mitika.

²⁹ I tūria i Mitika, ā, noho ana i Hahamona.

³⁰ I tūria i Hahamona, ā, noho ana i Moheroto.

³¹ I tūria i Moheroto, ā, noho ana i Pene Iaakana.

³² I tūria i Pene Iaakana, ā, noho ana i Horo Hakirikara.

³³ I tūria i Horo Hakirikara, ā, noho ana i Iotopata.

³⁴ I tūria i Iotopata, ā, noho ana i Eperona.

³⁵ I tūria i Eperona, ā, noho ana i Ehiono Kēpere.

³⁶ I tūria i Ehiono Kēpere, ā, noho ana i te koraha o Hini, arā o Karehe.

³⁷ I tūria i Karehe, ā, noho ana i Maunga Horo, i te pito o te whenua o Ēroma.

³⁸ Ā, i kake a Ārona tohunga ki Maunga Horo, he mea kī mai nā Ihowā, ā, mate iho ki reira, i te whā tekau o ngā tau o te putanga mai o ngā tama a Īharaira i te whenua o Īhipa, i te rā tuatahi o te rima o ngā marama.

³⁹ Ā, kotahi rau e rua tekau mā toru ngā tau o Ārona i tōna matenga ki Maunga Horo.

⁴⁰ Ā, i rongo te kīngi o Arara, te Kanaani, i noho nei i te whenua o Kanaana, i te taha ki te tonga, ki te taenga mai o ngā tama a Īharaira.

⁴¹ Ā, i tūria e rātou i Maunga Horo, ā, noho ana i Taramona.

⁴² I tūria i Taramona, ā, noho ana i Punono.

⁴³ I tūria i Punono, ā, noho ana i Opoto.

⁴⁴ I tūria i Opoto, ā, noho ana i Iteaparimi, i ngā rohe o Moapa.

⁴⁵ I tūria i Īmi, ā, noho ana i Riponokara.

⁴⁶ I tūria i Riponokara, ā, noho ana i Aramono Ripirataima.

⁴⁷ I tūria i Aramono Ripirataima, ā, noho ana i ngā maunga o Aparimi, i te ritenga atu o Nepo.

⁴⁸ I tūria i ngā maunga o Aparimi, ā, noho ana i ngā mānia o Moapa, i te wāhi o Horano e tata ana ki Heriko.

⁴⁹ Nā, ka noho rātou ki te taha o Horano ki Peteiehimoto, tae noa ki Āperehitimi, ki ngā mānia o Moapa.

Whakaakoranga i mua i te Whakawhiti i Horano

⁵⁰ I kōrero anō a Ihowā ki a Mohi i ngā mānia o Moapa, i te wāhi o Horano e tata ana ki Heriko, i mea:

⁵¹ “Kōrero ki ngā tama a Īharaira, mea atu ki a rātou: E whiti koutou i Horano ki te whenua o Kanaana;

⁵² nā, me pei ngā tāngata whenua katoa i tō koutou aroaro, me whakamōtī ā rātou āhua kōhatu, me whakamōtī katoa anō hoki ā rātou whakapakoko whakarewa, ka whakakāhore anō hoki i ā rātou wāhi teitei katoa.

⁵³ Ā, ka tangohia te whenua e koutou, ka nohoia hoki; kua hoatu nei hoki e ahau te whenua kia nohoia e koutou.

⁵⁴ “Me rota tā koutou tuwha i te whenua hei kāinga mō ō koutou hapū; he nui, kia nui tōna wāhi, he iti, kia iti tōna wāhi; hei te wāhi i tika ai tōna rota te wāhi mō tēnei, mō tēnei; kia rite ki ngā iwi o ō koutou mātua te tūwhanga o ō koutou wāhi.

⁵⁵ “Ko tēnei, ki te kāhore e peia e koutou ngā tāngata whenua i tō koutou aroaro; nā, hei koikoi i roto i ō koutou kanohi ngā mea o rātou e whakatoea e koutou, hei tūmatakuru anō i ō koutou kaokao, ā, ka whakatoi rātou i a koutou ki te whenua e noho ai koutou.

⁵⁶ Nā, ko ngā mea i whakaaro ahau hei meatanga ki a rātou, ka meatia e ahau ki a koutou.”