Tauanga 21 - Paipera Tapu 2012

Te Nākahi Parāhi

¹ Ā, ka rongo a Kīngi Arara, te Kanaani, i noho nei ki te taha ki te tonga, e haere ana a Īharaira nā te ara o Atarimi; nā, ka tatau ia ki a Īharaira, ā, whakaraua ana ētahi o rātou e ia.

² Nā, ka puta te kī taurangi a Īharaira ki a Ihowā, ka mea, “Ki te tukua mai e koe tēnei iwi ki tōku ringa ka tino whakangaromia e ahau ō rātou pā.”

³ Ā, i whakarongo a Ihowā ki te reo o Īharaira, ā, hōmai ana e ia ngā Kanaani; ā, tino whakangaromia ana rātou me ō rātou pā e rātou; ā, huaina iho te ingoa o taua wāhi ko Horema.

⁴ Nā, ka tūria atu e rātou i Maunga Horo nā te ara o te Moana Whero ki te taiāwhio i te whenua o Ēroma; ā pōuri noa iho te wairua o te iwi i te ara.

⁵ Ā, ka whakahē te iwi i te Atua, i a Mohi hoki, “He aha i kawea mai ai mātou ki runga nei i Īhipa kia mate ki te koraha? Kāhore nei hoki he taro, kāhore he wai; ā, e whakarihariha ana tō mātou wairua ki tēnei taro māmā.”

⁶ Nā, ka tukua mai e Ihowā he nākahi tū ā-ahi ki te iwi, ā, ka ngaua te iwi; ā, he tokomaha o Īharaira i mate.

⁷ Nā, ka haere te iwi ki a Mohi, ka mea, “Kua hara mātou i a mātou i whakahē i a Ihowā, i a koe hoki; īnoi ki a Ihowā kia tangohia atu e ia ngā nākahi i a mātou.” Nā, ka īnoi a Mohi mō te iwi.

⁸ Nā, ka mea a Ihowā ki a Mohi, “Hangā tētahi nākahi tū ā-ahi māu, ka whakanoho ki te pou; nā, mehemea kua ngaua tētahi, ā, ka titiro atu ia ki reira, ka ora.”

⁹ Nā, hangā ana e Mohi te nākahi ki te parāhi, ā, whakanohoia ana ki te pou; nā, mehemea kua ngaua tētahi e te nākahi, ka titiro ia ki te nākahi parāhi, kua ora.

Te Haerenga ki Moapa

¹⁰ Nā, ka tūria atu e ngā tama a Īharaira, ā, noho ana i Opoto.

¹¹ Ā, ka tūria atu i Opoto, ā, noho ana i Iteaparimi, i te koraha i te ritenga atu o Moapa, whaka te rāwhiti.

¹² Ā, ka haere atu rātou i reira, ā, noho ana i te raorao i Terete.

¹³ Nā, ka tūria atu i reira, ā, noho ana i tērā taha o Aranona, o tērā i te koraha e puta mai ana i ngā wāhi o ngā Amori; ko Aranona hoki te rohe ki a Moapa, kei waenganui o Moapa, o ngā Amori.

¹⁴ Koia i kōrerotia ai i te Pukapuka o ngā Whawhai a Ihowā, “Ko tāna i mea ai ki te Moana Whero, ki ngā awa hoki o Aranona,

¹⁵ ki ngā hurihanga wai anō hoki, e anga ana ki te nohoanga i Ara, e piri nei ki te rohe o Moapa.”

¹⁶ Ā, i haere atu rātou i reira ki Pēre; ko te puna ia i kōrero ai a Ihowā ki a Mohi, “Huihuia te iwi, ā, māku e hoatu he wai ki a rātou.”

¹⁷ Nā, ka waiatatia tēnei waiata e Īharaira: “Pupuke ake, e te puna! Waiatatia!

¹⁸ Te puna i keria e ngā rangatira, i keria e ngā ariki o te iwi, ki te hēpeta, ā, ki ā rātou tokotoko.” Nā, ka tūria atu e rātou i te koraha ki Matana,

¹⁹ i Matana hoki ki Nahariere; ā, i Nahariere ki Pamoto,

²⁰ ā, i Pamoto ki te raorao i te whenua o Moapa, ki te tihi o Pihika, e titiro iho ana ki te koraha.

Te Patua iho o Kīngi Hihona rāua ko Kīngi Oka

²¹ Nā, ka unga tāngata a Īharaira ki a Hihona kīngi o ngā Amori, hei mea:

²² “Tukua atu ahau nā tōu whenua; e kore mātou e peka ki ngā māra, ki ngā māra wāina rānei; e kore mātou e inu i te wai o ngā puna. Ka haere mātou nā te huanui o te kīngi, kia pahemo rā anō ōu rohe i a mātou.”

²³ Otiia kīhai a Hihona i tuku i a Īharaira kia tika nā tōna wāhi; nā, huihuia ana e Hihona tōna iwi katoa, ā, puta mai ana ki te tū i a Īharaira ki te koraha, nā, ka haere ia ki Iahata; ā, ka tatau ia i a Īharaira.

²⁴ Ā, patua iho ia e Īharaira ki te mata o te hoari, tangohia ana e rātou tōna whenua, o Aranona atu ā tae noa ki Iapoko, ki ngā tama rā anō a Āmona; he rohe hoki e kore e taea tō ngā tama a Āmona.

²⁵ Ā, riro ana i a Īharaira ēnei pā katoa; ā, nohoia ana e Īharaira ngā pā katoa o ngā Amori, a Hehepona, me ōna pā ririki.

²⁶ He pā hoki a Hehepona nō Hihona kīngi o ngā Amori; i whawhai hoki ia ki tō mua kīngi o Moapa, ā, tangohia ana ia tōna whenua katoa i tōna ringa ā tae noa ki Aranona.

²⁷ Koia te hunga kōrero whakatauki ka mea ai, “Haere mai ki Hehepona, kia hangā; kia whakaūngia te pā o Hihona.

²⁸ “Kua puta atu hoki he ahi i Hehepona, he mura i te pā o Hihona. Ā, pau ake a Ara o Moapa, me ngā ariki o ngā wāhi tiketike o Aranona.

²⁹ Auē te mate mōu, e Moapa! Ka ngaro koe, e te iwi o Kemoho! Kua hoatu e ia āna tama i rere mōrehu, me āna tamāhine, hei pononga mā Hihona, mā te kīngi o ngā Amori.

³⁰ “I kōpere atu mātou ki a rātou kua ngaro a Hehepona, tae noa ki Ripono, kua hunā e mātou tae noa ki Nopa e totoro atu nei ki Merepa.”

³¹ Nā, ka noho a Īharaira ki te whenua o ngā Amori.

³² Ā, ka tono tāngata a Mohi ki te tūtei i Iatere, ā, ka riro i a rātou ngā pā o reira, i panā hoki ngā Amori e noho ana i reira.

³³ Nā, ka tahuri rātou, ā, ka haere ki runga nā te ara o Pahana; nā, ko te putanga mai o Oka kīngi o Pahana, ki te whakatūtaki i a rātou, a ia, me tōna iwi katoa ki te whawhai ki Eterei.

³⁴ Ā, ka mea a Ihowā ki a Mohi, “Kei wehi i a ia; kua hoatu hoki ia e ahau ki tōu ringa, me tōna iwi katoa, me tōna whenua; ā, ka rite tāu e mea ai ki a ia ki tāu i mea ai ki a Hihona kīngi o ngā Amori i noho rā i Hehepona.”

³⁵ Nā, patua iho ia e rātou, me āna tama, me tōna iwi katoa, ā, kore noa e toe tētahi mōrehu ōna; ā, tangohia ana e rātou tōna whenua.