Tauanga 12 - Paipera Tapu 2012

Ka Whakahē a Ārona rāua ko Miriama ki a Mohi

¹ Nā, ka whakahē a Miriama rāua ko Ārona ki a Mohi mō te wahine Kuhi i mārenatia e ia (he wahine Kuhi hoki tāna i mārena ai);

² ā, ka mea rāua, “Koia rānei i a Mohi anake ngā kōrero a Ihowā? Kāhore rānei ana kōrero hoki i a māua?” Ā, ka rongo a Ihowā.

³ Nā, he tangata māhaki rawa a Mohi i ngā tāngata katoa o te mata o te whenua.

⁴ Nā, i ohorere tonu te kōrerotanga a i Ihowā ki a Mohi rātou ko Ārona, ko Miriama, “Puta mai koutou tokotoru ki te tapenākara o te whakaminenga.” Ā, ka puta atu rātou tokotoru.

⁵ Nā, ka heke iho a Ihowā i roto i te pou kapua, ā, ka tū ki te whatitoka o te tapenākara, ka karanga hoki ki a Ārona rāua ko Miriama; ā, ka puta rāua.

⁶ Ā, ka mea ia, “Tēnā, whakarongo ki āku kōrero: Ki te mea he poropiti kei a koutou, ka whakaatu atu ahau, a Ihowā i ahau ki a ia, he mea whakakite, he kōrero moemoeā ki a ia.

⁷ Ehara tāku pononga, a Mohi i te pērā; he pono ia i tōku whare katoa.

⁸ Ka kōrero ahau ki a ia, he māngai, he māngai, he kōrero mata nui, kāhore hoki he kupu ngaro; ā, e kite anō ia i te āhua o Ihowā. He aha rā kōrua tē wehi ai ki te whakahē mō tāku pononga, mō Mohi?”

⁹ Nā, ka mura te riri o Ihowā ki a rāua, ā, haere ana ia.

¹⁰ Nā, ka riro atu te kapua i runga i te tapenākara; nā! He repera a Miriama, kua rite ki te hukarere; ā, ka titiro a Ārona ki a Miriama, e! He repera.

¹¹ Nā, ka mea a Ārona ki a Mohi, “Auē, e tōku ariki, kaua e utaina ki a māua tēnei hara i pōauau nei, i hara nei māua.

¹² Kei rite ia ki te mea kua mate, ki te mea kua pau tētahi wāhi o ōna kikokiko i te putanga mai i te kōpū o tōna whaea.”

¹³ Nā, ka karanga atu a Mohi ki a Ihowā, ka mea, “E te Atua, tēnā rā, whakaorangia ia.”

¹⁴ Nā, ka mea a Ihowā, ki a Mohi, “Me i tuwha kau tōna pāpā ki tōna mata e kore ianei ia e whakamā, ā, whitu noa ngā rā? Kia whitu ngā rā e tūtakina atu ai ia ki waho o te puni, ā muri iho ka mauria mai anō.”

¹⁵ Nā, tūtakina atu ana a Miriama ki waho o te puni, e whitu ngā rā; kīhai anō hoki te iwi i haere, kia whakahokia mai rā anō a Miriama.

¹⁶ Ā muri iho ka tūria e te iwi i Hateroto, ā, noho ana i te koraha o Parana.