Ruka 3 - Paipera Tapu 2012

Te Kauwhautanga a Hoani Kaiiriiri

¹ Nā, i te tekau mā rima o ngā tau o te rangatiratanga o Taipiria Hīhā, i a Ponotia Pirato e kāwana ana i Hūria, i a Herora e tetaraki ana i Karirī, i tōna teina hoki, i a Piripi, e tetaraki ana i Ituria, i te whenua hoki o Tarakonaiti, ko Raihānia, e tetaraki ana i Apirini;

² ko Anaha rāua ko Kaiapa ngā tohunga nui, ka puta te kupu a te Atua ki a Hoani tama a Hakaraia ki te koraha.

³ Nā, ka haere mai ia ki ngā wāhi katoa e pātata ana ki Horano, ka kauwhau i te iriiri rīpenetā hei murunga hara.

⁴ I pērā anō ia me te mea i tuhituhia ki te pukapuka o ngā kōrero a Ihāia poropiti: “He reo nō tētahi i te koraha e karanga ana: ‘Whakapaia te huarahi o te Ariki, whakatikaia ōna ara!

⁵ Ka whakakīia ngā awaawa katoa, ka whakahoroa ngā maunga me ngā pukepuke katoa. E meinga hoki kia tika ngā wāhi kōpikopiko, ko ngā wāhi taratara hei ara māeneene.

⁶ Ā, e kite ngā kikokiko katoa i te whakaoranga a te Atua!’ ”

⁷ Nā reira, ka mea ia ki ngā mano i haere kia iriiria e ia, “E te uri nākahi, nā wai koutou i whakamahara kia rere i te riri meāke puta mai?

⁸ Nā, whakaputaina ngā hua e rite ana ki ō te rīpenetā; kei anga kei mea i roto i a koutou, ‘Ko Āperahama tō tātou matua’; ko tāku kupu hoki tēnei ki a koutou, e āhei ana anō i te Atua te whakaara tamariki ake mā Āperahama i roto i ēnei kōhatu.

⁹ Nā, ināianei anō kei te pā te toki ki te pakiaka o ngā rākau; ki te kāhore tētahi rākau e hua i te hua pai, ka tuaina, ka makā ki te ahi.”

¹⁰ Nā, ka ui ngā mano ki a ia, ka mea, “Me aha rā mātou?”

¹¹ Nā, ka whakahoki ia, ka mea ki a rātou, “Ko te tangata i ngā koti e rua, kia hoatu ki te tangata kāhore ōna; me te tangata he kai tāna, kia pērā anō.”

¹² Nā, ka haere mai hoki ngā pupirikana kia iriiria ka mea ki a ia, “E te kaiwhakaako, me aha mātou?”

¹³ Ka mea ia ki a rātou, “Kei nui ake i ngā mea i whakaritea mā koutou tā koutou e tango ai.”

¹⁴ Ka ui anō hoki ngā hōia ki a ia, ka mea, “Me aha hoki mātou?” Nā, ko tāna meatanga ki a rātou, “Kaua e tūkinotia tētahi, kaua e muru noa i tētahi mea; kāti anō mā koutou ko ō koutou utu.”

¹⁵ Nā, i te iwi e tatari ana e whakaaroaro katoa ana i roto i ō rātou ngākau ki a Hoani, mehemea ko te Karaiti ia.

¹⁶ Ka whakahoki a Hoani, ka mea ki a rātou katoa, “Ko ahau nei, he iriiri tāku i a koutou ki te wai; kei te haere mai ia tētahi he kaha rawa ake i ahau, e kore ahau e tau hei wewete i te here o ōna hū. Māna koutou e iriiri ki te Wairua Tapu, ki te kāpura.

¹⁷ Ko tāna mea tahi kei tōna ringa, hei tino tahi i tāna patunga wīti, hei kohi hoki i te wīti ki roto ki tāna whare wīti; ko te pāpapa ia e tahuna ki te kāpura e kore e tineia.”

¹⁸ He maha atu anō āna kupu whakahau i kauwhau ai ia i te rongopai ki te iwi.

¹⁹ Otirā, nā tōna riringa i a Herora tetaraki mō Herōriaha, mō te wahine a tōna tuakana, a Piripi, ā, mō ngā kino katoa hoki i meinga e Herora;

²⁰ ka āpititia atu e Herora tēnei ki runga i ērā katoa, tūtakina ana e ia a Hoani ki te whare herehere.

Te Iriiringa o Īhu

²¹ Nā, ka poto katoa te iwi te iriiri, i a Īhu kua oti te iriiri, ā, i a ia e īnoi ana, ka tuwhera te rangi,

²² ā, ka heke iho te Wairua Tapu, ka heke tinana iho, ānō he kūkupa, ki runga ki a ia, ā, ka puta mai he reo nō te rangi, e mea ana, “Ko koe tāku Tama i aroha ai, tāku i āhuareka ai.”

Te Whakapapa o Īhu

²³ Nā, ko Īhu, i a ia i tīmata ai ki te whakaako, kei te toru tekau ōna tau, ā, ki tā te tangata kī, he tama ia nā Hōhepa tama a Heri,

²⁴ ko ia he tama nā Matata, tama a Rīwai, tama a Mereki, tama a Iana, tama a Hōhepa,

²⁵ tama a Matatiaha, tama a Āmoho, tama a Nahumu, tama a Eheri, tama a Nakai,

²⁶ tama a Māta, tama a Matatiaha, tama a Hemei, tama a Hōhepa, tama a Hūrā,

²⁷ tama a Hoana, tama a Reha, tama a Herupapera, tama a Haratiera, tama a Neri,

²⁸ tama a Mereki, tama a Ari, tama a Kohama, tama a Eremorama, tama a Ere,

²⁹ tama a Hohe, tama a Eriētere, tama a Horimi, tama a Matata, tama a Rīwai,

³⁰ tama a Himiona, tama a Hūrā, tama a Hōhepa, tama a Honana, tama a Eriakimi,

³¹ tama a Merea, tama a Menana, tama a Matata, tama a Nātana, tama a Rāwiri,

³² tama a Hehe, tama a Ōpere, tama a Poaha, tama a Haramono, tama a Nāhona,

³³ tama a Aminarapa, tama a Arame, tama a Heteromo, tama a Parete, tama a Hūrā,

³⁴ tama a Hākopa, tama a Īhaka, tama a Āperahama, tama a Tera, tama a Nahora,

³⁵ tama a Haruku, tama a Rakau, tama a Pereke, tama a Ēpere, tama a Haraha,

³⁶ tama a Kainana, tama a Arapahata, tama a Hema, tama a Noa, tama a Rameka,

³⁷ tama a Matuhara, tama a Ēnoka, tama a Iarere, tama a Marerēre, tama a Kainana,

³⁸ tama a Ēnoha, tama a Heta, tama a Ārama, a te tama a te Atua.