Rōma 9 - Paipera Tapu 2012

Te Atua me Āna Iwi

¹ He pono tāku kōrero i roto i a te Karaiti, kāhore āku teka, ā, e whakaae ana tōku hinengaro ki ahau i roto i te Wairua Tapu,

² he nui atu tōku pōuri, mau tonu te mamae o tōku ngākau.

³ He pai hoki ki ahau me i kangā ahau, me i motuhia i a te Karaiti, he whakaaro ki ōku tēina, arā, ki ōku whanaunga o te wāhi ki te kikokiko.

⁴ Nō Īharaira nei rātou; nō rātou nei te whakatamarikitanga, te korōria, ngā kawenata, te hōmaitanga o te ture, te karakia ki te Atua, me ngā kupu whakaari;

⁵ nō rātou nei ngā mātua, nō rātou anō a te Karaiti i te wāhi ki te kikokiko, ko ia nei kei runga ake i ngā mea katoa, ko te Atua e whakapaingia ana ake ake. Āmine.

⁶ Ehara ia i te mea kua taka te kupu a te Atua. Ko te hunga hoki o Īharaira, ehara i te mea nō Īharaira katoa;

⁷ ahakoa he uri nō Āperahama, ehara rātou katoa i te tamariki; engari, “Kei a Īhaka te whakaingoatanga mō ōu uri.”

⁸ Arā, ehara i te mea ko ngā tamariki a te kikokiko ngā tamariki a te Atua, engari, ko ngā tamariki a te kupu whakaari, ko rātou ka kīia he uri.

⁹ He kupu whakaari hoki tēnei, “Kia taka tēnei wā ka haere mai ahau, ā, ka whānau he tama mā Hera.”

¹⁰ Nā, ehara i te mea ko tēnei anake; i a Ripeka anō ia kua hapū i tētahi, arā i a Īhaka, i tō mātou matua.

¹¹ I ngā tama hoki kāhore anō i whānau noa, kāhore anō hoki i mahi te pai, i te kino rānei, he mea kia ū ai tā te Atua i whakatakoto ai mō te whiriwhiringa, ehara i ngā mahi, engari, nā te kaikaranga;

¹² ka kōrerotia ki a ia, “Ko te tuakana hei pononga mā te teina.”

¹³ Ko te mea ia i tuhituhia, “Kua aroha ahau ki a Hākopa, kua kino ki a Ēhau.”

¹⁴ Ka pēhea ai i konā tā tātou kōrero? He tikanga hē koia kei te Atua? Kāhore rāpea!

¹⁵ I mea hoki ia ki a Mohi, “E tohu ahau i tāku e tohu ai, e atawhai ahau ki tāku e atawhai ai.”

¹⁶ Nō reira, ehara i te mea nā te hiahia o te tangata, nā te oma rānei o te tangata, engari, nā te Atua, ko ia e tohu nei.

¹⁷ E mea nei hoki te karaipiture ki a Parao, Mō konei pū anō koe i whakaarahia ai e ahau, kia ai koe hei whakakite i tōku kaha, kia kōrerotia hoki tōku ingoa ki te whenua katoa.

¹⁸ Nā konā, e tohungia ana e ia, ko tāna e pai ai, ko tāna hoki e pai ai e whakapakeketia ana e ia.

Te Riri me te Atawhai o te Atua

¹⁹ Nā, tērā koe e mea mai ki ahau, “He aha ia i riri tonu ai? Ko wai hoki e whakakeke ana ki tāna i pai ai?”

²⁰ Ha, e te tangata nei, ko wai koe hei whakahoki kupu ki te Atua? Mā te mea hanga koia e mea ki tōna kaihanga, “He aha ahau i hangā ai e koe kia pēnei?”

²¹ He teka ianei kei te kaihanga rīhi te tikanga mō te paru, kia hangā tētahi wāhi o taua mea kotahi i pokepokea hei oko rangatira, tētahi wāhi hei mea ware?

²² He aha hoki, mehemea, i tōna whakaaro kia whakakitea tōna riri, ā, kia whakaputaina tōna kaha, ka whakaririka te Atua i runga i te manawanui ki ngā oko o te riri, e rite rawa nei mō te whakangaro?

²³ Kia whakakitea anō hoki e ia ngā rawa o tōna korōria ki ngā oko o te mahi tohu, kua rite noa ake nei i a ia mō te korōria,

²⁴ arā ki a tātou, i karangatia e ia, ehara i te mea nō ngā Hūrai anake, engari, nō ngā tauiwi anō hoki?

²⁵ Ko tāna kupu anō tēnā i tā Hohea, “Ka kīia e ahau tērā ko tōku iwi, ehara nei i te iwi nōku; ā, he wahine e arohaina ana te wahine kīhai i arohaina.

²⁶ Ā tēnei ake, i te wāhi i kōrerotia ai ki a rātou, ‘Ehara koutou i te iwi nōku’; ko reira rātou kīia ai ‘he tama nā te Atua ora.’ ”

²⁷ Ko tā Ihāia karanga hoki mō Īharaira, “Ahakoa i rite te tokomaha o ngā tama a Īharaira ki te onepū o te moana, ko te toenga kau e ora.

²⁸ Mā te Ariki hoki e whakatutuki tāna kupu ki runga i te whenua, māna e whakaoti, māna e poro tata.”

²⁹ Ā, e kī rā a Ihāia i mua rā, “Me kāhore te toe i te Atua o ngā mano he whānau mō tātou, kua pērā tātou me Horoma, kua rite anō hoki ki Komora.”

Tā Pāora Īnoi mō Īharaira

³⁰ Nā, kia pēhea tā tātou kōrero? Ko ngā tauiwi, kīhai nei i whai i te tika, kua tae rātou ki te tika, arā, ki te tika, nā te whakapono.

³¹ Ko Īharaira ia, whai ana i tētahi ture o te tika, kīhai rātou i tae ki taua ture.

³² Nā te aha? Nā te mea kīhai rātou i whai i runga i te whakapono, engari, ānō nā runga i ngā mahi. I tūtuki hoki ō rātou waewae ki te kāmaka tūtukitanga;

³³ ko te mea hoki ia i tuhituhia: “Nanā, ka whakatakotoria e ahau ki Hiona he kāmaka tūtukitanga, he kōhatu whakahinga. Nā, ko te tangata e whakapono ana ki a ia, e kore e meinga kia whakamā.”