Rōma 3 - Paipera Tapu 2012

¹ Ha, he aha rā te painga i hua ki te Hūrai? He aha te rawa o te kotinga?

² He nui rā i ngā mea katoa. Ko te tuatahi, kua ākona rātou ki ngā kupu a te Atua.

³ Ka pēhea, mehemea kāhore he whakapono o ētahi? E taka rānei tō te Atua pono i tō rātou whakapono kore?

⁴ Kāhore rāpea! Engari ko te Atua kia kitea he pono, ko ngā tāngata katoa he teka kau; ko te mea hoki ia i tuhituhia, “Kia tika ai tāu i tāu kōrerotanga, kia puta ai tāu ina whakawākia koe.”

⁵ Ha, ki te mea nā tō tātou hē i kitea nuitia ai tō te Atua tika, me pēhea he kupu mā tātou? E hē ana rānei te Atua i a ia e whakapā ana i te riri? (He kupu tangata tēnei nāku.)

⁶ Kāhore rāpea! Pēnei me pēhea te Atua e whakawā ai i te ao?

⁷ Nā, ki te mea nā tōku teka i hira rawa ai tō te Atua pono hei korōria mōna; he aha ahau i whakahēngia tonutia ai ānō hei tangata hara?

⁸ He aha hoki tē pēnei ai, ā, ko te kupu whakapae teka tēnei mō mātou, ā, ki tā ētahi ko tā mātou kupu tēnei, “Tātou ka mahi i te kino, kia puta ai he pai”? Tika tonu te tau o te hē ki a rātou.

Kāhore he Tangata e Tika ana

⁹ He aha koia? He pai ake rānei tō mātou wāhi i tō rātou? Kāhore rā hoki; kua oti hoki te whakapā e mātou i mua he hē ki ngā Hūrai, ki ngā Kariki, kei raro katoa rātou i te hara;

¹⁰ ko te mea hoki ia i tuhituhia: “Kāhore he tangata tika, kāhore kia kotahi;

¹¹ kāhore he tangata e mātau ana, kāhore he tangata e rapu ana i te Atua.

¹² Kua peka kē rātou katoa, kua kino ngātahi; kāhore he tangata e mahi ana i te pai, kāhore rawa kia kotahi.

¹³ He urupā puare noa tō rātou korokoro; e patipati ana ō rātou arero; kei roto i ō rātou ngutu te wai whakamate o ngā nākahi;

¹⁴ kī tonu ō rātou māngai i te kanga, i te nanakia.

¹⁵ Ko ō rātou waewae, hohoro tonu ki te whakaheke toto;

¹⁶ he whakangaro, he ngākau pōuri, kei ō rātou ara;

¹⁷ kāhore hoki rātou i mōhio ki te ara o te rangimārie.

¹⁸ Kāhore he wehi o te Atua i mua i ō rātou kanohi.”

¹⁹ Nā, e mātau ana tātou ki ngā kupu o te ture, e kōrero ana ki te hunga i te ture, kia kopia ai ngā māngai katoa, kia whakawākia ai te ao katoa e te Atua.

²⁰ Nō te mea kāhore he mahi o te ture e tika ai tētahi kikokiko i tōna aroaro; mā roto mai i te ture te mātauranga ki te hara.

Te Tikanga a te Atua hei Whakatika i a Tātou

²¹ Otiia, kua whakakitea ināianei he tika a te Atua, motu kē i te ture, he mea whakaatu nā te ture, nā ngā poropiti;

²² arā, ko te tika a te Atua e nā runga mai ana i te whakapono ki a Īhu Karaiti ki te hunga katoa e whakapono ana. Kāhore hoki he pokanga kētanga;

²³ kua hara katoa hoki, ā, kāhore e taea e rātou te korōria o te Atua;

²⁴ he mea whakatika utukore nā tōna aroha noa, i runga i tā Karaiti Īhu hokonga;

²⁵ ko ia hoki tā te Atua i whakaari ai hei whakamārie, i runga i te whakapono, he mea nā ōna toto. Kia whakakitea ai tōna tika, i te mea ka whakapahemotia atu ngā hara ō mua, he mea hoki nā te manawanui o te Atua;

²⁶ hei whakakite i tōna tika i tēnei wā nei anō; he mea kia tika ai ia anō, me te kaiwhakatika i te tangata e whakapono ana ki a Īhu.

²⁷ Nā, kei hea te whakamanamana? Kua āraia atu. E tēhea ritenga ture? E tō ngā mahi? Kāhore, engari, e te ture o te whakapono.

²⁸ Koia mātou ka mea ai, kei te whakapono he tika mō te tangata, motu kē i ngā mahi o te ture.

²⁹ Ko te Atua oti te Atua o ngā Hūrai anake? Ehara rānei ia i te Atua o ngā tauiwi hoki? Āe rā, o ngā tauiwi anō hoki;

³⁰ ki te mea ia he kotahi te Atua, ā, māna e whakatika te kotinga i runga i te whakapono, me te kotingakore ina whakapono.

³¹ E taka rānei te ture i tā mātou, arā i te whakapono? Kāhore rāpea! Engari, nā tā mātou i ū ai te ture.