Piripai 2 - Paipera Tapu 2012

Te Ngākau Māhaki me te Whakahirahiratanga o Īhu

¹ Nā, ki te mea he whakamārie kei roto i a te Karaiti, ki te mea he pēhi mamae tō te aroha, ki te mea he whiwhinga tahitanga ki te Wairua, ki te mea he ngākau aroha, he mahi tohu,

² kia rite tōku hari i a koutou, kia kotahi te whakaaro, kia kotahi te aroha, huihuia ngā ngākau i runga i te whakaaro kotahi.

³ Kei meinga tētahi mea i runga i te wehewehe, i te whakapehapeha rānei, engari i runga i te ngākau pāpaku, me te whakanui a tētahi i tētahi ki runga ake i a ia.

⁴ Kaua tēnā o koutou nā, e titiro ki ōna mea anake, engari me titiro anō tēnā, tēnā o koutou ki ngā mea a ētahi atu.

⁵ Ko tēnei hei whakaaro mō koutou, ko tērā i a Karaiti Īhu:

⁶ Ahakoa hoki i a ia te āhua o te Atua, kīhai i meinga e ia te rite ki te Atua hei taonga kapo mai.

⁷ Engari i mea i a ia anō kia pōaha, ka mau ki te āhua o te pononga, ka meinga kia rite ki te tangata;

⁸ ā, ka kitea nei tōna āhua e rite ana ki tō te tangata, ka whakapāpaku ia i a ia, ka meinga kia ngohengohe, ahakoa ki te mate, āe rā, ki te mate o te rīpeka.

⁹ Nā konei whakateiteitia ake ana ia e te Atua, ā, hoatu ana ki a ia te ingoa nui atu i ngā ingoa katoa;

¹⁰ kia tuku ai i runga i te ingoa o Īhu ngā turi katoa, o ngā mea i te rangi, o ngā mea i te whenua, o ngā mea i raro i te whenua;

¹¹ ā, kia whakaae ngā arero katoa ko Īhu Karaiti te Ariki, hei whakakorōria i te Atua Matua.

E Tīaho ana he Māramatanga i roto i te Ao

¹² Heoi, e ōku tēina aroha, he mea tonu ia nā koutou te ngohengohe ki ahau i ngā wā katoa, ehara i te mea i ōku wā anake i konā, engari rawa ia ināianei i ahau kāhore i konā, nā, whakaotia tō koutou whakaoranga i runga i te wehi, i te wiri;

¹³ ko te Atua hoki te kaimahi i roto i a koutou o te hiahia, o te mahi, hei mea i tāna i pai ai.

¹⁴ I ā koutou mahi katoa kaua te amuamu, te tautohetohe;

¹⁵ kia kore ai koutou e whaikupuria, kia tapatahi ai, he tamariki kohakore nā te Atua, i waenganui o te whakatupuranga tutū, parori kē, kei roto nei koutou i a rātou e tīaho ana hei rama i te ao;

¹⁶ kia mau pū ki te kupu o te ora; kia hari ai ahau ā te rā o te Karaiti, kīhai ahau i oma noa, kīhai i mahi noa.

¹⁷ Nā, ki te ringihia ahau ki runga ki te patunga tapu, ki ngā mahi a tō koutou whakapono, ka hari ahau, inā, ka hari tahi me koutou katoa.

¹⁸ Waihoki ko koutou, kia hari, hari tahi me ahau.

Ko Tīmoti rāua ko Epaporitu

¹⁹ Otiia, e mea ana ahau i roto i te Ariki, i a Īhu, ki te tono tata atu i a Tīmoti ki a koutou, kia ora ai hoki tōku ngākau, ina mōhio ahau ki tō koutou āhua.

²⁰ Kāhore hoki ōku tāngata rite te ngākau ki tōna, hei mahara pono ki ā koutou mea.

²¹ Ko tā te katoa hoki e rapu nei, ko tā rātou ake, kāhore ngā mea a Īhu Karaiti.

²² Ko koutou ia e mātau ana ki ōna tohu, he pērā tāna me tā te tamaiti ki te matua, ko tōku hoa ia ki te kawe haere i te rongopai.

²³ Ko ia tāku e mea nei kia tonoa wawetia atu, ina kite ahau i te tukunga iho ki ahau.

²⁴ Otiia, e ū ana tōku whakaaro i roto te Ariki, ka hohoro tōku tae atu.

²⁵ I mea anō ia ahau me tono atu ki a koutou a Epaporitu, tōku teina, tōku hoa mahi, tōku hoa hōia, nā koutou ia karere, he kaimahi anō hoki i ngā mea i matea e ahau.

²⁶ Kōingo tonu hoki ia ki a koutou katoa, kōnohi rawa, nō te mea i rongo koutou he tūroro ia.

²⁷ He tūroro rā hoki ia, tata pū ki te mate. Otirā, i tohungia ia e te Atua; ehara anō i te mea ko ia anake, ko ahau anō hoki, kei tāpiritia he pōuri ki tōku pōuri.

²⁸ Koia i nui rawa ai tōku ngākau ki te tono atu i a ia, kia kite ai anō koutou i a ia, kia hari ai, kia tāharahara iho ai hoki tōku pōuri.

²⁹ Kia nui te hari i runga i te Ariki, ina tae atu ia; whakahōnoretia anō hoki ngā pērā;

³⁰ nō te mea nā te mahi ki a te Karaiti i tata ai ia ki te mate, te ihupuku ki te ora, kia rite ai i a ia ngā mahi ki ahau, kīhai nei i rite i a koutou.