Opāria 1 - Paipera Tapu 2012

Ka Whakawhiua e Ihowā a Ēroma

¹ Ko te kite a Opāria. Ko te kupu tēnei a te Ariki, a Ihowā, mō Ēroma: Kua tae mai he kōrero i a Ihowā, kua oti anō he karere te unga ki ngā tauiwi, hei mea: “Whakatika, kia whakatika atu hoki tātou ki a ia ki te whawhai!”

² “Nanā, kua oti koe te mea e ahau kia iti i roto i ngā tauiwi; nui atu te whakahāwea ki a koe.

³ Kua oti koe te tinihanga e te whakapehapeha o tōu ngākau, e koe e noho nā i ngā kapiti o te kāmaka, kei runga nā tōna nohoanga. E mea nā i roto i tōna ngākau, ‘Ko wai hei whakahoki iho i ahau ki raro ki te whenua?’

⁴ Ahakoa i rite tōu kakenga ki tō te ēkara, ahakoa i hangā e koe tōu kōhanga ki ngā whetū, ka whakahokia iho koe e ahau i reira,” e ai tā Ihowā.

⁵ “Me i tae he kaitāhae ki a koe, he kaipāhua rānei i te pō – taukiri e, tōu ngaromanga! E kore rānei rātou e tāhae, kia maha rā anō ngā mea mā rātou? Me i tae he kaiwhawhaki karepe ki a koe, e kore rānei ētahi karepe e whakatoea e rātou?

⁶ Taukiri e, te rapunga atu o ngā mea a Ēhau, te kimihanga o āna mea ngaro!

⁷ Ko ngā tāngata katoa o tāu kawenata, kua riro koe i a rātou, tae rawa ki te rohe; ko ngā tāngata i mau nei tā rātou rongo ki a koe, kua tinihanga ki a koe, ā, taea ana koe e rātou; ko te hunga i kai i tāu taro kua takoto i a rātou he māhanga ki raro i a koe – kāhore he mātauranga i a ia.

⁸ “He teka ianei,” e ai tā Ihowā, “ka kore i ahau i taua rā ngā tāngata whakaaro nui i roto i Ēroma, me te mātauranga o te maunga o Ēhau?

⁹ Ā, ka wehi ōu mārohirohi, e Temana, he mea e hātepea atu ai ngā tāngata katoa o te maunga o Ēhau, tukituki rawa.”

Ngā Take e Whakawhiua ai a Ēroma

¹⁰ “Ka taupokina koe e te whakamā hei utu mō te mahi tutū ki tōu teina, ki a Hākopa, ka hātepea atu anō koe ā ake ake.

¹¹ I te rā i tū hāngai mai ai koe, i te rā i whakaraua ai ōna rawa e ngā tautāngata, i tapoko ai ngā tāngata iwi kē ki ōna kūwaha, i kōkiri nui ai mō Hiruhārama, i rite rawa anō koe ki tētahi o rātou.

¹² Otiia, kaua koe e titiro ki te rā o tōu teina, i te rā o tōna aituā, kaua hoki koe e koa ki ngā tama a Hūrā i te rā o tō rātou whakangaromanga; kaua hoki e whakanuia tōu māngai i te rā o te raru.

¹³ Kaua e tomo ki roto ki te kūwaha o tāku iwi i te rā o tō rātou aituā; āe rā, kaua koe e mātakitaki ki tō rātou matenga i te rā o tō rātou aituā, kaua anō hoki koutou e pā ringaringa ki ō rātou rawa i te rā o tō rātou raru.

¹⁴ Ā, kaua koe e tū ki te pekanga o te ara ki te hātepe i ōna mōrehu e mawhiti; kaua hoki e tukua ōna mōrehu i te rā o te raru.”

Ka Whakawātia e te Atua ngā Iwi Katoa

¹⁵ “Kua tata hoki te rā o Ihowā ki ngā tauiwi katoa. Ka rite ki tāu i mea ai ka meatia ki a koe; ka hoki tāu utu ki runga ki tōu māhunga.

¹⁶ Ka rite hoki ki tā koutou inumanga i runga i tōku maunga tapu; ka pēnā anō te inu a ngā tauiwi katoa ā ake nei, ake nei; inā, ka inu rātou, ka horomia anō e rātou, ā, me te mea i kore rātou.”

Te Wikitōria Whakamutunga a Īharaira

¹⁷ “Otiia, tērā anō ngā mea ka mawhiti i Maunga Hiona, ā, ka tapu tērā; ā, ka riro ō rātou wāhi i te whare o Hākopa.

¹⁸ Ā hei ahi te whare o Hākopa, hei mura anō te whare o Hōhepa, hei kakau wīti hoki te whare o Ēhau. Ka ngiha rātou i roto i a rātou, ā, pau ake, kāhore hoki he mōrehu o te whare o Ēhau; nā Ihowā nei hoki te kupu.”

¹⁹ Nā, ka riro te maunga o Ēhau i te hunga o te tonga; me ngā Pirihitini i te hunga o te mānia; ka riro anō i a rātou ngā māra a Ēparaima me ngā māra o Hamaria; mō Pineamine hoki a Kireara.

²⁰ Nā, ko ngā whakarau o tēnei ope, o ngā tama a Īharaira, ko ērā i roto i ngā Kanaani, ka riro i a rātou tae noa ki Harepata; ā, ko ngā whakarau o Hiruhārama, ko ērā i Teparara, ka riro i a rātou ngā pā o te tonga.

²¹ Ā, ka tae ake he kaiwhakaora ki Maunga Hiona hei whakawā mō te maunga o Ēhau; ā, ka riro i a Ihowā te kīngitanga.