Ngā Tangi 5 - Paipera Tapu 2012

He Īnoi mō te Mahi Aroha

¹ Kia mahara, e Ihowā, ki te mea kua pā nei ki a mātou; tirohia mai, kia kite ai koe i tō mātou ingoa kino.

² Kua riro tō mātou wāhi tupu i ngā tāngata kē, ō mātou whare i ngā tautāngata.

³ He pani mātou, kāhore he matua, ko ō mātou whaea ānō he pouaru.

⁴ Nā te moni i inu wai ai mātou; ko ā mātou wahie he mea hoko.

⁵ Kei runga kei ō mātou kakī ō mātou kaiwhai; e māuiui ana mātou, kāhore he tānga manawa mō mātou.

⁶ Kua hoatu e mātou te ringa ki ngā Īhipiana, ki ngā Ahiriana, kia mākona ai mātou i te taro.

⁷ I hara ō mātou mātua, ā, kua kore; ā, kua whakawahā e mātou ō rātou hē.

⁸ Ko ngā pononga ō mātou rangatira; kāhore he kaiwhakaora mō mātou i ō rātou ringa.

⁹ E tata mate mātou ka whiwhi ai i te taro, i te hoari hoki o te koraha.

¹⁰ Mangu ana ō mātou kiri ānō he oumu, i te wera ngau kino o te hemokai.

¹¹ Taea ana e rātou ngā wāhine o Hiona, ngā wāhina i ngā pā o Hūrā.

¹² Ko ngā rangatira, tāronatia ake e tō rātou ringa; kīhai ngā kanohi o ngā kaumātua i whakahōnoretia.

¹³ Ko ngā taitama kei te waha i te huri, hinga ana ngā tamariki i te pīkaunga wahie.

¹⁴ Ko ngā kaumātua i ngā kūwaha kua kore, me te waiata hoki a ngā taitama.

¹⁵ Kua mutu te koa o ō mātou ngākau, kua puta kē tā mātou kanikani hei uhunga.

¹⁶ Kua taka te karauna o tō mātou māhunga; auē te mate mō mātou kua hara hoki mātou.

¹⁷ Nā reira, whakaruhi noa iho ō mātou ngākau; nā ēnei mea pōuriuri ana ō mātou kanohi.

¹⁸ Nā te maunga hoki o Hiona kua ururuatia nei, e hāereerea nei e ngā pokiha.

¹⁹ Pūmau tonu koe, ake ake, e Ihowā; ko tōu torōna kei tērā whakatupuranga, kei tērā whakatupuranga.

²⁰ He aha koe i wareware tonu ai ki a mātou? He aha koe i whakarere ai i a mātou, ā roa noa iho ngā rā?

²¹ Whakatahuritia atu mātou ki a koe, e Ihowā, ā, ka tahuri mātou; whakahoutia ō mātou rā, kia rite ki ō mua.

²² Otiia, kua tino whakakāhore rawa koe ki a mātou, e tino nui ana tōu riri ki a mātou.