Ngā Tangi 4 - Paipera Tapu 2012

Te Whakapaeanga o Hiruhārama

¹ Taukiri e! Tōna haumarurutanga o te kōura! Tōna putanga kētanga o te kōura parakore, tino pai! Kua ringihia ngā kōhatu o te wāhi tapu ki te ahunga mai o ngā ara katoa.

² Ko ngā tamariki a Hiona ko ngā mea papai, i rite nei ki te kōura parakore, taukiri e! Kua kīia rātou he hāka oneone, he mea hanga nā ngā ringa o te kaipokepoke.

³ Ko ngā kīrehe mohoao nei hoki, e tukua iho ana te ū e rātou, e whakangotea ana e rātou ā rātou kūao; kua taikaha te tamāhine a tōku iwi, kua rite ki ngā otereti o te koraha.

⁴ Piri ana te arero o te tamaiti ngote ū ki te ngao o tōna māngai i te hiainu; e tono ana ngā kōhungahunga i te taro mā rātou, heoi kāhore he tangata hei whatiwhati atu mā rātou.

⁵ Ko te hunga i kai i ngā mea papai kei te noho mokemoke i ngā ara. Ko te hunga i whakatupuria i roto i ngā kākahu ngangana, kei te awhi i ngā pūranga paru.

⁶ Nō te mea ko te hē o te tamāhine a tōku iwi nui atu i te hara o Horoma, i hurihia ohoreretia rā i mua, kāhore hoki he ringa i ū ki a ia.

⁷ Ko ōna rangatira pai atu i te hukarere te pokekore, mā atu hoki rātou i te waiū, pūwhero ake ō rātou tinana i ngā rupi, orohina ake rātou ki te oro o te hapaira.

⁸ Mangu iho tō rātou mata i tētahi ngārahu; kāhore rātou e mōhiotia i ngā ara. Piri tonu ō rātou kiri ki ō rātou wheua; kua memenge, kua rite ki te rākau.

⁹ Ko te hunga i patua e te hoari, pai ake tō rātou i tō te hunga i patua e te hemokai; nō te mea ka honia noatia ēnei, ka werohia, he kore hoki nō ngā hua o te māra.

¹⁰ Ko ngā wāhine, ko te hunga aroha, kei te kōhua i ā rātou tamariki ki ō rātou ringa; he kai ērā mā rātou i te wawāhanga o te tamāhine a tōku iwi.

¹¹ Kua whakapaua e Ihowā tōna riri nui, kua ringihia mai e ia tōna riri nui; kua tahuna hoki e ia he ahi ki Hiona, nā reira i pau ai ōna tūranga.

¹² Kīhai i whakapono mai ngā kīngi o te whenua, kīhai anō hoki ngā tāngata o te ao, tērā te hoariri rāua ko te hoa whawhai e tomo mai ki ngā kūwaha o Hiruhārama.

¹³ I pērā ai he hara nō ōna poropiti, he hē nō ōna tohunga kua whakaheke nei i ngā toto o te hunga tika ki waenganui ōna.

¹⁴ E kōpikopiko ana rātou ānō he matapō i ngā ara; Kua poke rātou i te toto, tē pā ai te tangata ki ō rātou kākahu.

¹⁵ I karanga rātou ki a rātou; “Haere atu, e poke ana! Haere atu, haere atu, kei pā!” I tō rātou whatinga, i a rātou e ātiutiu noa atu ana, i kī ngā tāngata i roto i ngā tauiwi, “Kāhore he nohoanga iho mō rātou ki konei.”

¹⁶ Kua wehewehea rātou e te riri o Ihowā; e kore ia e titiro ki a rātou i muri nei. Kīhai rātou i whakaaro ki ngā kanohi o ngā tohunga, kīhai i manako ki ngā kaumātua.

¹⁷ E matawaia tonu ana ō tātou kanohi i a tātou e titiro ana ki te āwhina tekateka noa mō tātou; i a tātou e tiaki atu ana, i whanga noa tātou ki te iwi e kore e whakaora.

¹⁸ E whāia ana e rātou ō tātou hīkoinga, tē haere ai tātou i ō tātou waharoa. Kua tata tō tātou whakamutunga, kua rite ō tātou rā; nō te mea kua tae mai tō tātou whakamutunga.

¹⁹ Nui atu te tere o ō tātou kaiwhai i tō ngā ēkara o te rangi; i arumia tātou e rātou i runga i ngā maunga; i whanga mai anō rātou ki a tātou i te koraha.

²⁰ Ko te manawa o ō tātou pongaponga, ko tā Ihowā i whakawahi ai, i mau ki roto ki ā rātou rua; i kī rā tātou mōna, “Mā tōna taumarumarunga iho ka ora ai tātou i roto i ngā tauiwi.”

²¹ Kia hari, kia koa, e te tamāhine a Ēroma e noho nā i te whenua o Uhu; ka tae atu anō te kapu ki a koe; ka haurangi koe, ka whakarere anō koe i ōu kākahu.

²² Kua rite te whiu mō tōu hē, e te tamāhine a Hiona; heoi anō tāna whakaraunga i a koe. Ka whiua e ia tōu hē, e te tamāhine a Ēroma, ka hurahia anō e ia ōu hara.