Ngā Tangi 2 - Paipera Tapu 2012

Te Whakawhiunga a Ihowā i Hiruhārama

¹ Taukiri e! Te taupokinga a Ihowā i te tamāhine a Hiona ki te kapua, i a ia e riri ana! Kua makā iho e ia te ātaahua o Īharaira i runga i te rangi ki te whenua; kīhai anō i mahara ki tōna tūranga waewae i te rā i riri ai ia.

² Kua horomia e te Ariki ngā nohoanga katoa o Hākopa, kīhai i tohungia; i a ia i riri rā, wāhia iho e ia ngā pā kaha o te tamāhine a Hūrā; tae tonu ki te whenua; poke iho i a ia te kīngitanga me ōna rangatira.

³ Pōutoa katoatia atu ana e ia te haona o Īharaira i tōna riri e mura ana. Whakahokia mai ana e ia ki muri tōna ringa matau i te aroaro o te hoariri. Ngiha mai ana ia ki a Hākopa, ānō he mura ahi e kai ana i tētahi taha, i tētahi taha.

⁴ Kua piko i a ia tāna kōpere, koia anō kei tā te hoariri; ko tōna ringa matau i a ia i tū rā, rite tonu ki tō te hoa whawhai, tukitukia ana e ia te hunga katoa i āhuareka mai ki te titiro atu; i roto i te tapenākara o te tamāhine a Hiona, ānō he ahi tōna riri e ringihia mai ana e ia.

⁵ Kua rite te Ariki ki te hoariri, kua horomia e ia a Īharaira; kua horomia e ia ōna whare kīngi katoa, kua whakamōtītia e ia ōna pā taiepa. Ā, kua whakanuia e ia te tangi me te auē o te tamāhine a Hūrā.

⁶ Kua tākiritia e ia tōna tīhokahoka, ānō nō te kāri; mōtī iho i a ia tōna wāhi whakaminenga. Kua meinga e Ihowā te huihui nui me te hāpati kia warewaretia i roto i Hiona, whakahāweatia iho e ia te kīngi rāua ko te tohunga i tōna riri e āritarita ana.

⁷ Kua pangā atu e te Ariki tāna āta, kua weriweri ia ki tōna wāhi tapu. Tukua atu ana e ia ngā taiepa o ō reira whare kīngi ki roto ki te ringa o te hoariri; kua hāmama rātou i roto i te whare o Ihowā, me te mea ko te rā o te hākari nui.

⁸ He whakaaro tō Ihowā mō te whakamōtī i te taiepa o te tamāhine a Hiona; kua oti te aho te whakamārō atu e ia, kāhore anō tōna ringa i pēpeke, whakangaro tonu ia. Nā reira, tangi ana i a ia te pekerangi me te taiepa; rāua ngātahi, ngohe kau.

⁹ Kua totohu ōna kēti ki roto ki te whenua; kua kore i a ia, kua whati hoki ōna tūtaki; kei roto tōna kīngi me ōna rangatira i ngā tauiwi, kāhore nei o reira ture; āe rā, kāhore āna poropiti e whiwhi ki te kite nā Ihowā.

¹⁰ Kei runga i te whenua ngā kaumātua o te tamāhine a Hiona e noho ana, whakarongo kau ana. Opehia ake e rātou he puehu ki runga ki ō rātou māhunga; whītiki rawa te kākahu taratara. Ko ngā wāhina o Hiruhārama, tuohu tonu ō rātou māhunga ki te whenua.

¹¹ Matawaia rawa ōku kanohi i te roimata, e ohooho ana ōku whēkau, kua maringi tōku ate ki runga ki te whenua, he meatanga ki te wawāhanga o te tamāhine a tōku iwi; nō te mea hemo ana ngā kōhungahunga me ngā mea ngote ū i ngā huarahi o te pā.

¹² Kei te kī atu rātou ki ō rātou whaea, “Kei hea he wīti, he wāina?” i a rātou e hemo ana, e pērā ana me te hunga kua patua ki ngā huarahi o te pā, e maringi ana ō rātou wairua ki ngā uma o ō rātou whaea.

¹³ Ko te aha tāku hei whakaatu ki a koe? Ko te aha e waiho e ahau hei āhua mōu, e te tamāhine a Hiruhārama? Ko wai e waiho e ahau hei rite ki a koe, e whakamārie ai ahau i a koe, e te tamāhine wāhina a Hiona? He nui hoki tōu pakaru, koia anō kei te moana; ko wai hei rongoā i a koe?

¹⁴ Ko ngā mea i kitea e ōu poropiti mōu, he teka, he mea horihori; kīhai anō i hurahia e rātou tōu hē, e hoki ai koe i te whakarau. Heoi anō tā rātou i kite ai mōu he poropititanga wairangi, he mea hei pana atu i a koe.

¹⁵ Kei te papaki ringa ki a koe te hunga katoa e tika ana i te ara, e hī ana, rūrū ana ō rātou māhunga ki te tamāhine a Hiruhārama; ko tā rātou kupu, “Ko te pā ianei tēnei i kōrerotia nei, ko te tino o te ātaahua, ko te whakahari o te whenua katoa?”

¹⁶ Hāmama tonu ki a koe ngā māngai o ōu hoariri katoa; e hī ana, tetē ana ō rātou niho, e mea ana: “Kua horomia ia e tātou. Ko te rangi pū anō tēnei tāria atu e tātou, kua tūpono mai ki a tātou, kua kitea e tātou.”

¹⁷ Kua oti i a Ihowā tāna i whakaaro ai; kua whakaritea tāna kupu i whakahaua e ia i ngā rā ō mua. Wāhia iho e ia, kīhai hoki i tohungia; kua meinga e ia te hoariri kia koa ki a koe, kua ara i a ia te haona o ōu hoariri.

¹⁸ I karanga ō rātou ngākau ki te Ariki! E te taiepa o te tamāhine a Hiona! Kia rere iho ngā roimata ānō he awa, i te ao, i te pō; kei whakatā koe, kei mutu tā te whatu o tōu kanohi!

¹⁹ Maranga, hāmama i te pō, i te tīmatanga o ngā mataaratanga: ringihia atu tōu ngākau ānō he wai ki tō te Ariki aroaro. Kia ara ake ōu ringa ki a ia, kia ora ai āu kōhungahunga e hemo nei i te kai i te ahunga mai o ngā huarahi katoa.

²⁰ “Titiro mai, e Ihowā, whakaaroa ko wai i pēneitia e koe! E kai rānei ngā wāhine i ō rātou hua, i ngā kōhungahunga e hikihikitia ana? Kia patua koia te tohunga me te poropiti ki te wāhi tapu o te Ariki?

²¹ “Kei te takoto te taitama rāua ko te koroheke i runga i te whenua i ngā huarahi; kua hinga āku wāhina, āku taitamariki, i te hoari; he mea whakamate nāu i te rā i riri ai koe; tukitukia ana e koe, kīhai hoki i tohungia.

²² “Kua karanga koe ki ōku whakawehi i ngā taha katoa, pērā i te rā o te huihuinga nui, ā, kāhore tētahi i mawhiti, i mahue rānei i te rā i riri ai a Ihowā; ko āku i hikihiki ai, i whakatuputupu ai, poto ake i tōku hoariri.”