Ngā Mahi 2 - Paipera Tapu 2012

Te Haerenga Mai o te Wairua Tapu

¹ Ā, nō ka taka mai te rā o te Petekoha, e noho tahi ana rātou katoa i te wāhi kotahi.

² Nā, puta whakarere mai ana he haruru nui nō te rangi, ānō he hau nui e keri ana, ā, kī katoa te whare i noho ai rātou.

³ Heoi, puta mai ana ki a rātou ētahi arero he mea manganga, ānō he ahi, ā, tau iho ana ki runga ki tēnei, ki tēnei o rātou.

⁴ Nā, kī katoa rātou i te Wairua Tapu, ā, ka tīmata te kōrero rerekē ana ngā reo, rite tonu ki tā te Wairua i hoatu ai ki a rātou kia kōrerotia.

⁵ I Hiruhārama anō e noho ana ētahi Hūrai, he hunga whakaaro, nō ngā iwi katoa i raro o te rangi.

⁶ Nā, i te wā i rangona ai taua haruru, ka whakarāpopoto te mano, ka pororaru, nō te mea ka rangona e tērā, e tērā, tōna reo e kōrerotia ana e rātou.

⁷ Nā, ka oho rātou katoa, ka mīharo, ka mea, “Nā, ehara ianei ēnei katoa e kōrero nei i te hunga nō Karirī?

⁸ He aha tātou ka rongo nei, ia tangata, ia tangata, i ō tātou reo o tō tātou whānautanga?

⁹ Ko te hunga o Patia, o Meria, o Erama, ko ngā mea e noho ana i Mehopotamia, i Hūria, i Kaparokia, i Ponoto, i Āhia,

¹⁰ i Perikia, i Pamapuria, i Īhipa, i ngā wāhi o Ripia e pātata ana ki Hairini, me ngā manuhiri o Rōma, ngā Hūrai, ngā porohiraiti,

¹¹ ngā Kariti, ngā Ārapi, e rongo ana tātou i a rātou e whakapuaki ana i ngā mahi tohu a te Atua, nō tātou anō ngā reo.”

¹² Ā, mīharo katoa ana rātou, pōhēhē ana, ka mea tētahi ki tētahi, “He aha tēnei?”

¹³ Ko ētahi i tāwai, i mea, “E kī ana rātou i te wāina hou!”

Te Kupu a Pita

¹⁴ Otirā, ka whakatika a Pita me te tekau mā tahi, ka hikitia tōna reo, ka whai kupu ki a rātou, “E ngā tāngata o Hūria, me koutou katoa e noho nei i Hiruhārama, kia mōhio koutou ki tēnei, kia whai taringa mai ki āku kupu.

¹⁵ Kāhore hoki o ēnei haurangi me tā koutou e whakaaro nei, ko te toru noa hoki tēnei o ngā hāora o te rā.

¹⁶ Engari, ko te mea tēnei i kōrerotia e Hoera poropiti:

¹⁷ ‘Ā tēnei ake kei ngā rā whakamutunga, e ai tā te Atua, ka ringihia e ahau tōku Wairua ki ngā kikokiko katoa; ka poropiti hoki ā koutou tama, ā koutou tamāhine, ka moemoeā hoki ō koutou kaumātua.

¹⁸ Āe, ka ringihia anō e ahau tōku Wairua i aua rā, ki āku pononga tāne, ki āku pononga wāhine; ā, ka poropiti rātou.

¹⁹ Ka whakakitea anō e ahau ngā mea whakamīharo i te rangi i runga, me ngā tohu ki te whenua i raro; he toto, he kāpura, he paowa pongere.

²⁰ Ko te rā ka huri hei pōuri, ko te marama hoki hei toto, i mua o te putanga mai o te rā o te Ariki, taua rā nui whakaharahara, rongonui.

²¹ Nā, ko reira ora ai te hunga katoa e karanga ana ki te ingoa o te Ariki.’

²² “E ngā tāngata o Īharaira, kia rongo koutou ki ēnei kupu; Ko Īhu o Nahareta, he tangata i tino whaitohungia e te Atua ki a koutou i runga i ngā merekara, i ngā mea whakamīharo, i ngā tohu i mea ai te Atua kia mahia e ia i waenganui o koutou, e mōhio ana anō rā koutou.

²³ Ko tēnei tangata i tukua atu, he mea i āta whakaaroa, ā, i mōhiotia noatia ake e te Atua, tangohia ana e koutou, whakamatea iho, he mea rīpeka nā te ringa o ngā tāngata kino.

²⁴ Nā te Atua ia i whakaara ake, nāna i wewete ngā mamae o te mate; nō te mea e kore ia e taea te pupuri e taua mate.

²⁵ Ko tā Rāwiri kōrero hoki tēnei mōna: ‘I kite ahau i te Ariki i mua i tōku aroaro i ngā rā katoa; kei tōku ringa matau nei ia, e kore ai ahau e whakakorikoria.

²⁶ Koia i koa ai tōku ngākau, i whakamanamana ai tōku arero; i takoto tūmanako ai anō ōku kikokiko.

²⁷ Nō te mea e kore e waiho e koe tōku wairua i te rēinga, e kore anō e tukua tāu Mea Tapu kia kite i te pirau.

²⁸ Kua whakakitea e koe ki ahau ngā huarahi o te ora; ka meinga e koe kia kī tonu tōku koa i tōu aroaro.’

²⁹ “E ōku tēina, e tika ana kia aronui he kupu ki a koutou mō te tupuna nei mō Rāwiri, arā kua mate ia, kua tanumia, kei a tātou anō tōna urupā, ā, taea noatia tēnei rā.

³⁰ I te mea he poropiti ia, ā, i mōhio kua oati te Atua i te oati ki a ia, ka whakaputaina ake tētahi, he hua nō tōna hope, hei noho ki runga ki tōna torōna.

³¹ Ā, i tāna kite wawe i tēnei, kōrerotia ana e ia te aranga o te Karaiti, arā: ‘Kīhai tōna wairua i waiho i te rēinga, kīhai anō tōna kikokiko i kite i te pirau.’

³² “Kua whakaarahia ake tēnei Īhu e te Atua: ko mātou katoa ngā kaiwhakaatu.

³³ Ā, ka oti nei ia te whakanui e te ringa matau o te Atua, ā, ka hōmai nei ki a ia e te Matua te Wairua Tapu i kōrerotia rā i mua, nā, kua ringihia mai e ia tēnei, e kite nei, e rongo nei koutou.

³⁴ Kāhore hoki a Rāwiri i kake ki te rangi; heoi, e mea ana ia: ‘I mea te Ariki ki tōku Ariki, “Hei tōku matau koe noho ai,

³⁵ kia meinga rā anō e ahau ōu hoariri hei tūranga waewae mōu.” ’

³⁶ “Nō reira rā, kia mātau pū te whare katoa o Īharaira, kua meinga e te Atua hei Ariki, hei Karaiti, taua Īhu i rīpekatia nā e koutou.”

³⁷ Nō rātou ka rongo, ka werowero i roto i ō rātou ngākau, ka mea ki a Pita rātou ko ērā atu āpōtoro, “E ngā tuākana, me aha mātou?”

³⁸ Nā, ko te meatanga a Pita ki a rātou, “Rīpenetā, kia iriiria, tēnā tangata, tēnā tangata o koutou i runga i te ingoa o Īhu Karaiti, hei murunga hara; ā, ka riro i a koutou te mea hōmai, arā te Wairua Tapu.

³⁹ Ki a koutou hoki, ki ā koutou tamariki, te kupu hōmai, ki te hunga katoa anō o tawhiti, ki ngā mea e karangatia e te Ariki, e tō tātou Atua, ki a ia.”

⁴⁰ He maha atu anō ngā kupu i kōrero ai, i kauwhau ai ia, i mea ai, “Me whakaora koutou i a koutou i tēnei whakatupuranga parori kē.”

⁴¹ Nā, ko ngā mea tonu i tango i tāna kupu i iriiria, me te mea e toru mano ngā wairua i honoa mai ki a rātou i taua rā.

⁴² Ā, i ū tonu rātou ki te whakaakoranga a ngā āpōtoro, ki te kotahitanga, ki te whawhati taro, ā, ki te īnoi.

Te Ora i waenga o te Hunga Whakapono

⁴³ Tau iho ana te wehi ki ngā wairua katoa; he maha hoki ngā mea whakamīharo me ngā tohu i meinga e ngā āpōtoro.

⁴⁴ I noho tahi anō te hunga whakapono katoa, i huihuia anō hoki ā rātou mea katoa;

⁴⁵ i hokona atu hoki ā rātou rawa me ngā taonga, tuwhaina ana mā te katoa, rite tonu, ki te mate o tēnei, o tēnei.

⁴⁶ Haere tonu ana hoki rātou i tēnei rā, i tēnei rā ki te temepara, kotahi tonu anō te whakaaro; whawhati taro ana i ō rātou kāinga, kai ana i ā rātou kai i runga i te koa, i te ngākau tapatahi;

⁴⁷ e whakamoemiti ana ki te Atua, e paingia ana hoki e te iwi katoa. Ā, honoa mai ana e te Ariki ki a rātou i tēnā rā, i tēnā rā, i tēnā rā, te hunga e whakaorangia ana.