Mika 6 - Paipera Tapu 2012

Te Take a Ihowā ki a Īharaira

¹ Whakarongo koutou ināianei ki te kupu i kōrerotia e Ihowā: “Whakatika, totohe ki ngā maunga, kia rangona hoki tōu reo e ngā pukepuke.

² Whakarongo, e ngā maunga nei, ki tā Ihowā totohe, e koutou hoki, e ngā tūranga kaha o te whenua; he totohe hoki tā Ihowā ki tāna iwi, ā, ka rīria e ia te hē o Īharaira.

³ “E tāku iwi, i aha ahau ki a koe? He ahatanga nāku i hōhā ai koe? Whakaaturia mai tōku hē!

⁴ Nāku nā hoki koe i kawe mai i te whenua o Īhipa, nāku anō koe i hoko i roto i te whare pononga; ā, i ungā atu e ahau a Mohi, a Ārona, a Miriama ki mua i a koe.

⁵ Kia mahara, e tāku iwi, ki te whakaaro i whakatakotoria e Pāraka kīngi o Moapa, ki te kupu hoki i whakahokia ki a ia e Paraama tama a Peoro; maharatia i Hitimi tae noa ki Kirikara, kia mōhio ai koutou ki ngā mahi tika a Ihowā.”

Tā Ihowā i Hiahia ai

⁶ He aha tāku e haere ai ahau ki te aroaro o Ihowā, e piko ai ki te Atua i runga? He patunga tapu rānei te mea e haere ai ahau ki tōna aroaro, he kūao tau tahi rānei?

⁷ E manako rānei a Ihowā ki ngā mano o ngā hipi toa, ki ngā mano kotahi tekau rānei o ngā awa hinu? Me hoatu rānei e ahau tāku mātāmua hei utu mō tāku poka kē, te hua o tōku kōpū mō te hara o tōku wairua?

⁸ Kua whakaaturia e ia ki a koe, e te tangata, te mea pai; ā, he aha tā Ihowā e rapu nei ki a koe, heoi anō ko te whakawā tika, ko te pai ki te tohu tangata, ko te whakaiti me te haere tahi i tōu Atua?

Ka Whiua te Tinihanga me te Whakarekereke

⁹ E karanga ana te reo o Ihowā ki te pā, ā, ka kite te tangata whakaaro nui i tōu ingoa: “Whakarongo ki te whiu, ki a ia hoki nāna i whakarite.

¹⁰ Tērā anō rānei ngā taonga o te kino kei roto i te whare o te tangata kino, me te mēhua iti, whakarihariha anō?

¹¹ Ka mā rānei ahau ki te kino ngā pāuna, ki te tinihanga ngā weti i roto i te pūtea?

¹² Kī tonu nā hoki i te tutū ōna tāngata taonga, ā, kua kōrero teka ōna tāngata, kei te tinihanga hoki ō rātou arero i roto i ō rātou māngai.

¹³ “Mō reira kua whiua hoki koe e ahau ki te mate taimaha; kua meinga koe e ahau kia mokemoke, hei utu mō ōu hara.

¹⁴ Ka kai koe, ā, kāhore e mākona; ka waiho anō tōu whakaitinga i waenganui i a koe; ka tangohia atu anō e koe, heoi e kore e haere ora i a koe; ko te mea hoki e mauria atu e koe ka hoatu e ahau ki te hoari.

¹⁵ Ka whakatō koe, ā, e kore e kokoti; ka takahi koe i te ōriwa, ā, e kore e whakawahi i a koe ki te hinu; i te wāina hou, ā, e kore e inu i te wāina.

¹⁶ Nō te mea e mau ana ngā tikanga a Omori, me ngā mahi katoa a te whare o Āhapa, ā, e haere ana koutou i runga i ō rātou whakaaro; kia meinga ai koe e ahau kia ururua, ā, ko ngā tāngata o konā hei whakahīanga atu; ā, ka mau ki a koutou te ingoa kino o tāku iwi.”