Mika 4 - Paipera Tapu 2012

Te Rangimārie Mutungakore

¹ Otiia, tēnei ake kei ngā rā whakamutunga ka whakapūmautia te maunga i tō Ihowā whare ki te tihi o ngā maunga, ā, ka hikitia ki runga ake i ngā pukepuke, ā, ka rere ngā iwi ki reira.

² Ā, he maha ngā iwi e haere, e mea: “Haere mai koutou, tātou ka haere ki runga ki te maunga o Ihowā, ki te whare o te Atua o Hākopa, ā, māna tātou e whakaako ki āna ara; ka haere hoki tātou i āna huarahi.” Nō te mea ka puta mai te ture i Hiona, te kupu hoki a Ihowā i Hiruhārama.

³ Ā, ka whakarite whakawā ia i waenganui i ngā iwi maha, ka rīria hoki e ia te hē o ngā iwi kaha i tawhiti; ā, ka patupatua e rātou ā rātou hoari hei hea parau, ā rātou tao hei mea tapahi manga. E kore tētahi iwi e hāpai hoari ki tētahi iwi, ā, heoi anō tā rātou ako ki te whawhai.

⁴ Engari ka noho rātou, ia tangata, ia tangata, i raro i tāna wāina, i raro i tāna piki; ā, kāhore he tangata hei whakawehi i a rātou; nā te māngai hoki o Ihowā o ngā mano te kōrero.

⁵ Ka haere hoki ngā iwi katoa, ia tangata, ia tangata, i runga i te ingoa o tōna atua, ā, ka haere tātou i runga i te ingoa o Ihowā, o tō tātou Atua ā ake ake.

Ka Hoki mai a Īharaira i te Manene

⁶ “Ā taua rā,” e ai tā Ihowā, “ka huihuia e ahau te wahine e totitoti ana, ka whakaminea te wahine i peia atu, me ia anō i whakatupuria kinotia e ahau;

⁷ ā, ka meinga e ahau te wahine e totitoti ana hei mōrehu, me te wahine i makā atu ki tawhiti hei iwi kaha; ā, ka kīngi a Ihowā ki a rātou ki Maunga Hiona āianei ā ake tonu atu.

⁸ Nā, ka tae mai ki a koe, e koe, e te pourewa o te kāhui, e te taumaihi o te tamāhine a Hiona; āe rā, ka tae mai ki a koe te kīngitanga ō mua rā, te kīngitanga o te tamāhine a Hiruhārama.”

⁹ Nā, he aha koe i hāmama ai? Kāhore ianei he kīngi i roto i a koe, kua ngaro rānei tōu kaiwhakatakoto whakaaro, i mau pū ai koe i te mamae me te mea he wahine e whānau ana?

¹⁰ Whakamamae, e ngana kia puta ki waho, e te tamāhine a Hiona, kia rite ki te wahine e whānau ana. Nō te mea ko āianei koe puta ai i roto i te pā, ā, ka noho ki te pārae, ā, ka tae ki Papurōna rā anō; hei reira koe ka whakaorangia; hei reira a Ihowā hoko ai i a koe i te ringa o ōu hoariri.

¹¹ Nā, tōna maha o ngā iwi kua huihui ki te whawhai ki a koe, e mea ana, “Tukua ia kia whakapokea, kia kite atu tō tātou kanohi i tāna koronga i runga i Hiona.”

¹² Otirā, kāhore rātou e mātau ki ngā whakaaro o Ihowā, kāhore hoki e mōhio ki tāna i whakatakoto ai; kua kohikohia hoki rātou e ia ānō he paihere ki te patunga wīti.

¹³ “Whakatika ki te patu wīti, e te tamāhine a Hiona; ka meinga hoki e ahau tōu haona hei rino, ka meinga hoki e ahau ōu pāua hei parāhi; ā, he maha ngā iwi e patupatua e koe ā mongamonga noa; ā, māu e whakatapu mā Ihowā ngā mea i apohia mai e rātou, ō rātou rawa mā te Ariki o te whenua katoa.”