Mika 3 - Paipera Tapu 2012

Ngā Ariki Kino me ngā Poropiti Kino

¹ Ā, i mea ahau: “Whakarongo mai, e ngā upoko o Hākopa, e ngā ariki o te whare o Īharaira! He teka ianei mō koutou te mātauranga ki te whakawā?

² E kino nā ki te pai, e aroha nā ki te kino; e tīhore nā i tō rātou kiri i ō rātou tinana, i tō rātou kikokiko i ō rātou wheua;

³ e kai nā hoki i ngā kikokiko o tāku iwi; e tīhore nā i tō rātou kiri i ō rātou tinana, e wāwāhi nā i ō rātou wheua; āe rā, e tapatapahia rawatia ana e rātou, ānō he mea mō te kōhua, ānō he kikokiko i roto i te kōhua nui.”

⁴ Ko reira rātou karanga ai ki a Ihowā, heoi e kore ia e whakahoki kupu ki a rātou. Āe rā, ka hunā e ia tōna mata ki a rātou i taua wā, ka rite ki tō rātou kino i mahia e rātou.

⁵ Ko te kupu tēnei a Ihowā: “Mō ngā poropiti e whakapōhēhē nei i tāku iwi, e ngau nei ō rātou niho, me te karanga, ‘He rongo māu’; ā, ki te kāhore e komotia e tētahi he mea ki ō rātou māngai, ka tino anga rātou ki te whakataka whawhai ki a ia.

⁶ Mō reira ko te pō mō koutou, e kore ai he kite ki a koutou; ā, ka pōuri ki a koutou, e kore ai koutou e kite tikanga; ā, ka tō te rā ki ngā poropiti, ā, ka mangu te awatea ki runga ki a rātou.

⁷ Ā, tērā e whakamā ngā matakite, e numinumi hoki ngā tohunga tūāhu; āe rā, tērā rātou katoa e ārai i ō rātou ngutu; nō te mea kāhore he kupu whakahoki a te Atua.”

⁸ Otiia, he pono, kua kī ahau i te kaha, he mea nā te Wairua o Ihowā, i te whakawā hoki, i te mana, kia whakaaturia ai e ahau ki a Hākopa tōna poka kē, ki a Īharaira tōna hara.

⁹ Tēnā rā, whakarongo ki tēnei, e ngā upoko o te whare o Hākopa, e ngā ariki hoki o te whare o Īharaira, e whakarihariha nā ki te whakawā, e whakapeau kē nā i te tika katoa.

¹⁰ E hanga ana rātou i Hiona ki te toto, i Hiruhārama ki te hē.

¹¹ E whakawā ana ōna upoko, he mea nā te patipati, e whakaako ana ōna tohunga, he mea nā te utu; ko ōna poropiti nā te hiriwa i kite tikanga ai; otiia kei te whakawhirinaki rātou ki a Ihowā, kei te mea, “He teka ianei kei roto a Ihowā i a tātou? E kore tētahi hē e pā ki a tātou.”

¹² Mō reira ka parautia a Hiona, ānō he māra, he mea mō koutou, ā, ka waiho a Hiruhārama hei pūranga, ka rite hoki te maunga o te whare ki ngā wāhi tiketike o te ngahere.