Mika 2 - Paipera Tapu 2012

He Whiunga i te Hunga i Whakawhere i te Hunga Rawakore

¹ Auē te mate mō te hunga e whakaaro nā ki te hē, e mahi nā i te kino i runga i ō rātou moenga! Tākiri rawa ake te ata kua mahia e rātou, nō te mea kei roto i te kaha o tō rātou ringa.

² E hiahia ana rātou ki ngā māra, tangohia ake; ki ngā whare hoki riro tonu i a rātou. E whakatupuria kinotia ana e rātou tētahi tangata me tōna whare, te tangata rawa nei me tōna wāhi tupu.

³ Mō reira ko te kupu tēnei a Ihowā: “Nanā, ka whakaaroa e ahau he kino mō tēnei hapū, e kore ai e whakawāteatia e koutou ō koutou kakī i reira, e kore anō koutou e haere whakapehapeha; he kino hoki tēnei wā.

⁴ I taua rā ka ara i a rātou tētahi whakatauki mō koutou, ka tangi hoki i tētahi tangi mamae nui, ā, ka mea, ‘Kua pāhuatia rawatia tātou; kua puta kē i a ia te wāhi o tāku iwi. Auē, tāna wehenga atu i ahau! Wehea ana e ia ā tātou māra mā te hunga whakakeke.’ ”

⁵ Mō reira kāhore he tangata māu hei maka i te taura a te rota i roto i te whakaminenga a Ihowā.

⁶ “Kaua koutou e poropiti,” ko tā rātou poropiti tēnei. “E kore rātou e poropiti ki ēnā; e kore ngā taunu e haere atu.”

⁷ E kīia ianei, e te whare o Hākopa: “Kua kūiti te Wairua o Ihowā? Ko āna mahi ianei ēnei?” “He teka ianei he mahi pai tā āku kupu ki te tangata e tika ana te haere?

⁸ Otiia, nō ēnei rā nei anō ka whakatika ake tāku iwi ānō he hoariri; e tīhorea atu ana e koutou te koroka i te kākahu o te hunga e haere kore wehi noa atu ana ānō he tangata e ngākaukore ana ki te whawhai.

⁹ Kua oti ngā wāhine o tāku iwi te pei e koutou i roto i ō rātou whare āhuareka; kua tangohia e koutou tōku korōria i ā rātou tamariki nonohi ā ake ake.

¹⁰ Whakatika, haere; ehara hoki tēnei i tō koutou okiokinga; he mea hoki mō te poke e whakangaro ana, e whakangaro kino rawa ana.

¹¹ Ki te kōrero teka tētahi tangata e haere ana i te hau, i te teka, ki te mea, ‘Ka poropiti ahau ki a koe mō te wāina, mō te wai kaha,’ ko ia rawa anō hei poropiti mō tēnei iwi.”

He Kī Taurangi ki ngā Mōrehu o Īharaira

¹² “He pono ka kohikohi ahau i a koe katoa, e Hākopa; he pono ka whakawhāititia e ahau ngā mōrehu o Īharaira. Ka huihuia rātou e ahau, ka pērātia me ngā hipi o Potora; ka rite ki te kāhui i waenganui o tō rātou taiepa, ka nui tō rātou ngē i te tini hoki o te tangata.

¹³ Kua tae ake te kaiwāhi i tō rātou aroaro; kua pakaru mai rātou ki waho, kua tika i roto i te kūwaha, kua puta atu mā reira. Kua haere atu tō rātou kīngi i mua i a rātou, a Ihowā i tō rātou upoko.”