Mika 1 - Paipera Tapu 2012

¹ Ko te kupu a Ihowā i puta mai ki a Mika Morahati i ngā rā o ngā kīngi o Hūrā, arā o Iotama, o Ahata, o Hetekia, ko tāna i kite ai mō Hamaria rāua ko Hiruhārama.

Ka Whakahuatia te Whakawātanga ki a Hamaria

² Whakarongo e ngā iwi, e koutou katoa; kia whai taringa mai, e te whenua, me ngā mea katoa i roto i a koe; ko te Ariki, ko Ihowā hei whakaatu i tō koutou hē, ko te Ariki mai i tōna temepara tapu.

³ Nō te mea, nanā, kei te puta mai a Ihowā i tōna wāhi, ka heke iho ia, ka takahi ki runga ki ngā wāhi tiketike o te whenua.

⁴ Ā, ka rewa ngā maunga i raro i a ia, ka ngātata ngā raorao, ka rite ki te wāki i mua i te ahi, ki ngā wai i ringihia ki te wāhi paripari.

⁵ Mō te hē o Hākopa, tēnei katoa, mō ngā hara o te whare o Īharaira. He aha te hē o Hākopa? He teka ianei ko Hamaria? He aha anō hoki ngā wāhi tiketike o Hūrā? He teka ianei ko Hiruhārama?

⁶ “Mō reira ka meinga e ahau a Hamaria kia rite ki te pūranga o te māra, ki ngā whakatōkanga hoki o te māra wāina; ka ringihia iho anō e ahau ōna kōhatu ki raro ki te raorao, ā, ka hurahia e ahau ōna tūranga.

⁷ Ā, ka wāwāhia āna whakapakoko, mongamonga ana, ka tahuna hoki ōna utu katoa ki te ahi, ā, ka takoto kau i ahau āna whakapakoko katoa. He mea āmene hoki nāna ki te utu a te wahine kairau, ā, ka hoki atu anō hei utu ki te wahine kairau.”

Te Tarukitanga o ngā Pā o Hūrā

⁸ Mō reira ka tangi ahau, ka auē, ka haere ahau, tīhore rawa ngā kākahu, tahanga kau; ka rite tāku tangi ki tā ngā kurī mohoao, tāku uhunga ki tā ngā otereti.

⁹ Nō te mea ko ōna patunga e kore e mahu; kua tae rawa nei hoki ki a Hūrā; kua tae ki te kūwaha o tāku iwi, arā ki Hiruhārama.

¹⁰ Kaua e whakaaturia ki Kāta, kaua rawa e tangi; kua okeoke ahau i roto i te puehu i Pētere Āpara.

¹¹ Haere atu korua, e te wahine e noho ana i Hapiri, i te takoto tahanga, i te whakamā; kāhore anō te wahine e noho ana i Taanana i puta mai; ka tangohia atu i a koutou e te tangihanga o Pete-Etere tōna tūranga.

¹² I tatari hoki te wahine e noho ana i Maroto ki te pai, me te mānukanuka anō; nō te mea kua heke iho te kino i a Ihowā ki te kūwaha o Hiruhārama.

¹³ Whakamaua te hāriata ki te hōiho tere, e te wahine e noho ana i Rakihi. Ko ia te tīmatanga o te hara o te tamāhine a Hiona; kua kitea nā hoki ngā hē o Īharaira i roto i a koe.

¹⁴ Mō reira ka hoatu e koe he hākari poroporoaki ki Morehetekata; hei mea teka ngā whare o Akatipi ki ngā kīngi o Īharaira.

¹⁵ Tēnei ake ka kawea atu e ahau ki a koe, e te wahine e noho ana i Mareha, te tangata e whiwhi ki a koe; ka tae te korōria o Īharaira ki Aturama rā anō.

¹⁶ Moremorea tōu māhunga, kutikutia hoki, mō āu tamariki i āhuareka ai; whakanuia tōu pākira kia rite ki tō te ēkara; kua mawehe atu hoki rātou i a koe, kua whakaraua.