Matiu 22 - Paipera Tapu 2012

Te Kupu Whakarite o te Hākari Mārena

¹ Ā, ka oho ake a Īhu, ka kōrero kupu whakarite anō ki a rātou, ka mea,

² “Ka rite te rangatiratanga o te rangi ki tētahi kīngi, i whakatakoto mārena mō tāna tama.

³ Ā, tonoa ana āna pononga, hei karanga i te hunga i kōrerotia ki te mārena; heoi, kīhai rātou i pai ki te haere.

⁴ “Ka tono anō ia i ērā atu pononga, ka mea, ‘Mea atu ki te hunga i kōrerotia: “Nā, kua rite tāku hākari, kua oti āku pūru, āku mea mōmona te patu, ā, kua rite katoa ngā mea; haere mai ki te mārena.” ’

⁵ “Otirā, i paopaongia e rātou, haere ana ko tētahi ki tāna māra, ko tētahi ki tāna hokohoko.

⁶ Nā, hopukina ana āna pononga e ngā mea i mahue, tūkinotia ana rātou, ā, whakamatea iho.

⁷ Otiia, i riri te kīngi; ā, tonoa atu ana āna taua, whakangaromia ana taua hunga kōhuru, tahuna iho tō rātou pā.

⁸ “Kātahi, ia ka mea ki āna pononga, ‘E rite ana te mārena, ko te hunga ia i karangatia kīhai i pai.

⁹ Nā, haere koutou ki ngā pekanga o ngā ara, ā, tonoa mai ki te mārena te hunga katoa e kite ai koutou.’

¹⁰ Nā, ka haere aua pononga ki ngā ara, ā, huihuia katoatia ana te hunga i kitea e rātou, āna pai, āna kino; nā, kikī ana te mārena i ngā manuhiri.

¹¹ “Otiia, nō te tapokoranga o te kīngi kia kite i ngā manuhiri, ka kitea e ia i reira he tangata kāhore nei ōna kākahu mārena;

¹² ā, ka mea ki a ia, ‘E hoa, he aha koe i tomo mai ai ki konei kāhore nei ōu kahu mārena?’ Heoi, kīhai ia i kuihi.

¹³ “Nā, ka mea te kīngi ki ngā kaimahi, ‘Herea ōna ringa, ōna waewae, kawea atu, makā ki te pōuri i waho rawa; ko te wāhi tērā o te tangi, o te tetēā o ngā niho.’

¹⁴ “He tokomaha hoki e karangatia, he ruarua ia e whiriwhiria.”

Te Take e Pā ana ki te Hoatu Takoha

¹⁵ Me i reira ka haere ngā Parihi, ka rūnanga ki te pēhea e mau ai tētahi kupu āna.

¹⁶ Ā, ka tonoa ki a ia ā rātou ākonga me ngā tāngata piri ki a Herora, hei mea, “E te Kaiwhakaako, e mātau ana mātou he pono koe, e whakaako ana koe i te ara a te Atua i runga i te pono, e kore anō tā te tangata, e whakaaroa e koe; e kore nei hoki koe e titiro ki te kanohi tangata.

¹⁷ Tēnā, kōrerotia ki a mātou, e pēhea ana tōu whakaaro? He mea tika rānei te hoatu takoha ki a Hīhā, kāhore rānei?”

¹⁸ Otiia, i mōhio a Īhu ki tō rātou whakaaro kino, ā, ka mea, “He aha tā koutou e whakamātautau nā i ahau, e te hunga tinihanga?

¹⁹ Tēnā koa, kia kite ahau i te moni i takoha.” Ā, mauria mai ana e rātou ki a ia he pene.

²⁰ Nā, ka mea ia ki a rātou, “Nō wai tēnei āhua me te tuhituhinga?”

²¹ Ka mea rātou ki a ia, “Nō Hīhā.” Kātahi ia ka mea ki a rātou, “Hoatu ki a Hīhā, ngā mea a Hīhā, ki te Atua anō ngā mea a te Atua.”

²² Ka rongo rātou, ka mīharo; ā, mahue ake ia i a rātou, ā, haere ana rātou.

Te Ui mō te Aranga ake i te Mate

²³ I taua rā ka haere mai ki a ia ngā Haruki, e mea nei kāhore he aranga, ka ui ki a ia,

²⁴ ka mea, “E te Kaiwhakaako, i mea a Mohi, ki te mate te tangata, ā, kāhore āna tamariki, mā tōna teina e mārena tāna wahine, e whakatupu ake he uri mō tōna tuakana.

²⁵ Nā, tokowhitu tētahi whānau i a mātou, he tuākana, he tēina; te mārenatanga o te tuatahi, ka mate, ā, hore ōna uri, waiho iho tāna wahine mā tōna teina.

²⁶ Me te tuarua anō, me te tuatoru, puta noa i te tuawhitu.

²⁷ Ā muri iho i a rātou katoa, ka mate te wahine.

²⁸ Nā, i te aranga, mā wai o te tokowhitu te wahine? I a rātou katoa nei hoki ia.”

²⁹ Nā, ka whakahoki a Īhu, ka mea ki a rātou, “E hē ana koutou, tē mōhio ki ngā karaipiture, ki te kaha anō o te Atua.

³⁰ I te aranga hoki e kore rātou e mārena, e kore anō e hoatu kia mārenatia, engari, ka rite ki ngā anahera a te Atua i te rangi.

³¹ Nā, ko te aranga o te hunga mate, kāhore anō koutou i kite i tā te Atua i kōrero ai ki a koutou, i mea ai,

³² ‘Ko ahau te Atua o Āperahama, te Atua o Īhaka, te Atua o Hākopa’? Ehara te Atua i te Atua nō te hunga mate, engari, nō te hunga ora.”

³³ Ā, nō ka rongo te mano, ka mīharo ki tāna ako.

Te Tino Ture Nui

³⁴ Nō te rongonga ia o ngā Parihi, kua kopi i a ia te māngai o ngā Haruki, ka whakamine tahi rātou.

³⁵ Nā, ka ui tētahi o rātou, he kaiako i te ture, ka whakamātautau i a ia, ka mea,

³⁶ “E te Kaiwhakaako, ko tēhea te kupu nui o te ture?”

³⁷ Ka mea a Īhu ki a ia, “ ‘Kia whakapaua tōu ngākau, tōu wairua, tōu hinengaro, ki te aroha ki te Ariki, ki tōu Atua.’

³⁸ Ko te tuatahi tēnei, ko te kupu nui.

³⁹ He rite anō te tuarua ki tēnei, ‘Kia aroha koe ki tōu hoa tata, ānō ko koe.’

⁴⁰ Kei runga i ēnei kupu e rua e iri ana te ture me ngā poropiti.”

Te Ui mō te Karaiti

⁴¹ Ā, i ngā Parihi e noho huihui ana, ka ui a Īhu ki a rātou,

⁴² ka mea, “He pēhea ō koutou whakaaro ki a te Karaiti? Nā wai ia tama?” Ka mea rātou ki a ia, “Nā Rāwiri.”

⁴³ Ka mea ia ki a rātou, “He aha rā a Rāwiri, i a ia e nohoia ana e te Wairua, i karanga ai i a ia he Ariki? I mea hoki ia,

⁴⁴ ‘I mea te Ariki ki tōku Ariki: “Hei tōku matau koe noho ai, kia meinga rā anō e ahau ōu hoariri hei tūranga waewae mōu.” ’

⁴⁵ Nā, ka kīia nei ia e Rāwiri he Ariki, he pēhea i tama ai ki a ia?”

⁴⁶ Ā, hore he tangata i āhei te whakahoki kupu ki a ia, kīhai rawa anō tētahi i māia ki te ui ki a ia i taua rā iho anō.