Kenehi 3 - Paipera Tapu 2012

Takatakahi ā-Tangata

¹ Nā, ko te nākahi he mōhio rawa i ngā kīrehe katoa o te pārae i hangā nei e Ihowā, e te Atua. Nā, ko tāna meatanga ki te wahine, “Koia, i mea anō te Atua, ‘Kaua e kainga e kōrua ngā hua o tētahi rākau o te kāri’?”

² Ā, ka mea te wahine ki te nākahi, “E kai anō māua i ngā hua o ngā rākau o te kāri.

³ Ko ngā hua ia o te rākau i waenganui o te kāri, kua mea mai te Atua, ‘Kaua kōrua e kai i tētahi o ōna hua, kaua anō hoki e pā ki reira, kei mate kōrua.’ ”

⁴ Nā, ko te meatanga a te nākahi ki te wahine, “E kore kōrua e mate rawa.

⁵ Erangi, e mōhio ana te Atua ko te rā e kai ai kōrua i tētahi o ōna hua, kātahi ka mārama ō kōrua kanohi, ā, ka rite kōrua ki te Atua, ka mōhio ki te pai, ki te kino.”

⁶ Ā, i te kitenga o te wahine he pai te rākau rā hei kai, he āhuareka ki te titiro atu, he rākau hoki e minaminatia hei whakamōhio, nā, ka tango ia i ētahi o ōna hua, ka kai, ka hoatu hoki ki tāna tahu i tōna taha; ā, kai ana ia.

⁷ Nā, ka mārama ō rāua kanohi tahi, ka mōhio rāua kei te tū tahanga rāua; nā, ka tuia e rāua ētahi rau piki, meatia ana hei rāpaki mō rāua.

⁸ Ā, ka rongo rāua i te reo o Ihowā, o te Atua, e hāereere ana i te kāri i te hauhautanga o te rā; ā, ka piri a Ārama rāua ko tāna wahine i te aroaro o Ihowā, o te Atua, ki roto ki ngā rākau o te kāri.

⁹ Nā, ka karanga a Ihowā, te Atua, ki a Ārama, ka mea ki a ia, “Kei hea koe?”

¹⁰ Ā, ka mea ia, “I rongo ahau ki tōu reo i te kāri, ā, wehi ana ahau, nōku i tū tahanga; nā piri ana ahau.”

¹¹ Nā, ka mea ia, “Nā wai i mea ki a koe e tū tahanga ana koe? Kua kainga rānei e koe ētahi o ngā hua o te rākau i kīia atu rā e ahau ki a koe, ‘Kaua ōna hua e kainga’?”

¹² Nā, ka mea te tangata rā, “Nā te wahine i hōmai nei e koe hei hoa mōku, nāna i hōmai ētahi o ngā hua o te rākau ki ahau, ā, kainga ana e ahau.”

¹³ Nā, ka mea a Ihowā, te Atua, ki te wahine, “He aha tēnei kua meatia nei e koe?” Ka mea te wahine, “Nā te nākahi ahau i māminga, ā, kai ana ahau.”

¹⁴ Nā, ka mea a Ihowā, te Atua, ki te nākahi, “Mō tēnei mahi āu nui atu te kanga mōu i ō ngā kararehe katoa, i ō ngā kīrehe katoa o te pārae; ko tōu kōpū hei haere mōu, ko te puehu hei kai māu i ngā rā katoa e ora ai koe.

¹⁵ Ka whakatupuria hoki e ahau he pakanga mā kōrua ko te wahine, mā tōu uri rātou ko tōna uri; ka marū tōu mātenga i a ia, ka marū i a koe tōna rekereke.”

¹⁶ Ka mea ia ki te wahine, “Ka whakanuia rawatia e ahau tōu mamae, me tōu hapūtanga; ka mamae koe ina whānau tamariki; ka hiahia koe ki tō tahu, ko ia anō hoki hei rangatira mōu.”

¹⁷ Ā, ka mea ia ki a Ārama, “Mō tōu rongonga ki te reo o tāu wahine, mō tāu kainga hoki i te hua o te rākau i kīia atu e ahau ki a koe, i meatia atu rā, ‘Kaua e kainga ētahi o ōna hua.’ Ka oti te oneone te kanga mō tāu mahi; ka kainga e koe ōna hua i runga i te mamae i ngā rā katoa e ora ai koe.

¹⁸ He tātarāmoa anō hoki, he tūmatakuru āna e whakatupu ake ai māu; ā, ka kai koe i te otaota o te pārae.

¹⁹ Mā te werawera o tōu mata e kai ai koe i te taro, ā hoki noa koe ki te oneone; i tangohia mai nei hoki koe i reira; he puehu hoki koe, ā, ka hoki anō ki te puehu.”

²⁰ Ā, i huaina e Ārama te ingoa o tāna wahine ko Iwi; nō te mea ko te whaea ia o ngā mea ora katoa.

²¹ Nā, ka hangā e Ihowā, e te Atua, ētahi kākahu hiako mō Ārama rāua ko tāna wahine, ā, whakakākahuria ana rāua.

²² Nā, ka mea a Ihowā, te Atua, “Nanā, kua rite nei te tangata ki tētahi o tātou, te mōhio ki te pai, ki te kino; nā, kei totoro atu tōna ringa āianei, kei tango i tētahi o ngā hua o te rākau o te ora, kei kai, ā, ka ora tonu.”

²³ Koia i tonoa atu ai ia e Ihowā, e te Atua, i te kāri o Erene hei ngaki i te oneone i tangohia mai nei ia i reira.

²⁴ Heoi, peia ana e ia te tangata; ā, whakanohoia ana ki te taha ki te rāwhiti o te kāri o Erene tētahi kerupima, me tētahi hoari mura, he mea piupiu tonu ki tētahi taha, ki tētahi taha, hei tiaki i te huarahi ki te rākau o te ora.