Kaiwhakariterite 5 - Paipera Tapu 2012

Te Waiata a Tepora rāua ko Paraka

¹ Nā, ka waiata a Tepora rāua ko Paraka tama a Apīnoama i taua rā, ka mea:

² “Whakapaingia a Ihowā mō te takitakinga a ngā kaitakitaki o Īharaira, mō te hihikotanga mai o te iwi.

³ “Whakarongo, e ngā kīngi, kia whai taringa, e ngā rangatira; māku, āe rā, māku e waiata ki a Ihowā, ka hīmene ahau ki a Ihowā, ki te Atua o Īharaira.

⁴ “E Ihowā, i tōu putanga atu i Heira, i tōu haerenga atu i te pārae i Ēroma, i wiri te whenua, i māturuturu iho anō ngā rangi; i māturuturu iho anō hoki ngā wai o ngā kapua.

⁵ I rere ā-wai ngā maunga i te aroaro o Ihowā, ko taua Hinai anō hoki, i te aroaro o Ihowā, o te Atua o Īharaira.

⁶ “I ngā rā o Hamakara tama a Anata, i ngā rā o Taere, i takoto kau ngā huarahi, i haere hoki ngā tira haere i ngā ara i tahaki.

⁷ I mutu rawa ngā rangatira o Īharaira, i kāhore rawa, ā, whakatika noa ake ahau, a Tepora, whakatika ake ahau, he whaea nō Īharaira.

⁸ I whiriwhiria e rātou he atua hou; kātahi ka puta he whawhai ki ngā kūwaha. I kitea rānei he pukupuku, he tao rānei, i roto i ngā mano e whā tekau o Īharaira?

⁹ Kei ngā kaiwhakatakoto tikanga o Īharaira tōku ngākau; i hihiko rātou ki te tuku i a rātou i roto i te iwi. Whakapaingia a Ihowā.

¹⁰ “Kōrerotia, e ngā kaieke kāihe mā, e te hunga e noho ana i runga i ngā whāriki utu nui, e te hunga e haere ana i te ara.

¹¹ Mamao noa mai i te reo o ngā kaikōpere, i ngā wāhi utuhanga wai, ka kōrerotia e rātou i reira ngā mahi tika a Ihowā, ngā mahi tika o tāna whakahaere tikanga i roto i a Īharaira. “Kātahi te iwi o Ihowā ka heke ki raro ki ngā kūwaha.

¹² Maranga, maranga, e Tepora! Maranga, maranga, whakahuatia he waiata! Whakatika, e Paraka, ārahina tāu whakaraunga ki te whakarau, e te tama a Apīnoama.

¹³ “Kātahi ka haere mai ki raro te mōrehu o ngā rangatira, me te iwi; i haere mai hoki a Ihowā ki raro mōku ki te whawhai ki te mea nui.

¹⁴ I puta mai i a Ēparaima te hunga ko tō rātou pakiaka nei kei a Amareke; kei muri i a koe, e Pineamine, i roto i ōu iwi; i haere mai ngā kaiwhakatakoto tikanga i roto i a Makiri; nō roto i a Hepurona ngā kaihāpai i te tokotoko a te kaiwhakahaere;

¹⁵ i a Tepora hoki ngā rangatira o Ihākara; he pērā a Ihākara; he pērā hoki a Paraka; huaki atu ana rātou i raro i ōna waewae ki te raorao. I ngā manga wai o Reupena, tērā ngā whakaaroaronga nunui o te ngākau.

¹⁶ He aha koe i noho ai ki ngā taiepa hipi, whakarongo ai ki ngā whakatangi mō ngā kāhui? I ngā manga wai o Reupena, tērā ngā rapurapunga nunui o te ngākau.

¹⁷ I noho a Kireara ki tērā taha o Horano; nā, ko Rāna, he aha ia i noho ai i runga i ngā kaipuke? Ko Āhera, whakakeke tonu mai i te takutai moana, ā, noho ana ia i te taha o ōna manga wai.

¹⁸ Ko Hepurona he iwi i whakahāwea ō rātou tinana ki te mate; rāua ko Napatari i ngā wāhi teitei o te pārae.

¹⁹ “I haere mai ngā kīngi, i whawhai, nā, ka whawhai ngā kīngi o Kanaana ki Tānaka, ki te taha o ngā wai o Mekiro; kīhai tētahi moni i riro hei taonga mō i rātou.

²⁰ I whawhai iho rātou i te rangi; i whawhai ngā whetū i ō rātou huarahi ki a Hihera.

²¹ I kāhakina atu rātou e te awa, e Kihona, e taua awa tawhito, e te awa, e Kihona. E tōku wairua, haere tonu i runga i te kaha.

²² Takatakahi ana i reira ngā pāua o ngā hōiho, nā ngā pekenga, nā ngā tūpeketanga a ō rātou mārohirohi.

²³ ‘Kangā a Meroho,’ e ai tā te anahera a Ihowā; ‘kangā kinotia ngā tāngata o reira; mō rātou kīhai i haere mai hei āwhina mō Ihowā, hei āwhina mō Ihowā ki te whawhai ki te hunga nunui.’

²⁴ “Kia manaakitia i roto i ngā wāhine a Taere wahine a Hēpere Keni; kia manaakitia i roto i ngā wāhine o te tēneti.

²⁵ I tonoa e tuahangata he wai mōna, he waiū tāna i hoatu ai, kawea ana e ia he pata i roto i te peihana rangatira.

²⁶ Totoro atu ana tōna ringa ki te titi tōna matau ki te hama a ngā kaimahi; hama iho e ia a Hihera, ākina iho tōna pane; titia iho hoki e ia tōna rahirahinga ā puta rawa.

²⁷ Kūpapa ana ia ki ōna waewae, hinga ana, takoto ana; i kūpapa ia, i hinga, ki ōna waewae; ko te wāhi i kūpapa ai ia, hinga ana ia i reira, mate rawa.

²⁸ “I titiro mai te whaea o Hihera i te matapihi, i karanga hoki i te wini whakakahokaho, ‘Nā te aha i roa ai te haere mai o tana hāriata? Nā te aha i pūhoi ai ngā wīra o ana hāriata?’

²⁹ Ka utua e ngā mea mōhio o āna wāhine rangatira; āe, ko ia anō hei whakahoki ake i te kupu ki a ia anō,

³⁰ ‘Kāhore rānei rātou i tūpono atu, i wehewehe i ngā taonga? He kōtiro, tokorua ngā kōtiro ki tērā, ki tērā; he taonga kōtingotingo tō Hihera, he taonga kōtingotingo, he mea whatu ki te ngira, he mea kōtingotingo, he mea whatu ki te ngira i tētahi taha, i tētahi taha, mō ngā kakī o te hunga i te taonga parakete?’

³¹ “Kia pēnā te whakangaromanga o ōu hoariri katoa, e Ihowā. Kia rite ia te hunga e aroha ana ki a ia ki te rā i tōna putanga kaha mai.” Nā, e whā tekau ngā tau i okioki ai te whenua.