Kaikauwhau 4 - Paipera Tapu 2012

¹ Nā, ka tahuri ahau, ā, ka titiro ki ngā tūkinotanga katoa e mahia nei i raro i te rā. Nā, ko ngā roimata o te hunga i tūkinotia, kāhore hoki ō rātou kaiwhakamārie; ā, he kaha kei te ringa o ō rātou kaitūkino, otiia kāhore ō rātou kaiwhakamārie.

² Nā, ko tāku whakamoemiti ki te hunga mate kua mate noa ake, nui atu i tāku ki te hunga ora e ora nei.

³ Engari ia pai atu i a rāua te tangata kāhore anō i whānau noa, kāhore anō i kite noa i te mahi hē e mahia nei i raro i te rā.

⁴ Nā, ka kite ahau i te māuiui katoa, i ngā mahi tohunga katoa, he mea hoki tēnei e hae ai te tangata ki tōna hoa. He horihori anō hoki tēnei, ā, he whai kau i te hau.

⁵ Ko te wairangi, kei te kōtui i ōna ringa, ā, kainga ana e ia ōna kikokiko ake.

⁶ He pai kē te ringa kī i runga i te āta noho, i ngā ringa kī e rua, ki te mea he ruha, he whai noa i te hau.

⁷ Kātahi ahau ka tahuri, ā, ka kite i te horihori i raro i te rā:

⁸ he tangata tērā, ko ia anake, kāhore hoki ōna tokorua; āe rā, kāhore anō hoki āna tama, ōna tuākana, tēina rānei; heoi kāhore he mutunga o tāna mahi katoa, e kore anō hoki ōna kanohi e mākona i ngā taonga. Nā, ka mea ia, “Ki a wai tōku whakaaro i ahau ka mahi nei, ka whakatiki nei i tōku wairua ki te pai?” He horihori anō tēnei, he raruraru kino.

Te Painga o te Hoa

⁹ Erangi te tokorua i te kotahi; nō te mea ka whiwhi rāua ki te utu pai i tā rāua mahi.

¹⁰ Ki te hinga hoki tētahi, mā tōna hoa ia e whakaara; auē te mate mō te kotahi, ina hinga, ki te kāhore te whakatokorua hei whakaara i a ia!

¹¹ Ki te takoto tahi anō ngā tokorua, ka mahana rāua; he tangata kotahi ia, mā te aha ka mahana ai tōna kotahi?

¹² Ki te kaha tētahi i a ia kotahi nei, ka māia te tokorua ki a ia. E kore hoki te aho takitoru e motu wawe.

¹³ Pai ake te tamaiti rawakore, whakaaro nui i te kīngi kua koroheketia, kua wairangi, kua kore nei ōna mōhio ki te whakarongo ina whakatūpatoria.

¹⁴ I puta mai hoki tērā i roto i te whare herehere, hei kīngi; āe rā, ahakoa i roto i tōna whenua i kīngi ai, i whānau rawakore mai ia.

¹⁵ I kite ahau i te hunga ora katoa e haere nei i raro i te rā, kei te tama rātou, kei te tuarua, kua tū nei i te tūnga o tērā.

¹⁶ Kāhore he mutunga o te iwi katoa, arā o te hunga ko ia nei tō rātou ariki; nā, e kore ō muri iho i a ia e koa ki a ia. He pono, he horihori anō hoki tēnei, ā, he whai kau i te hau.