Kaikauwhau 3 - Paipera Tapu 2012

He Wā mō ngā Mea Katoa

¹ He tāima anō kua takoto mō ngā mea katoa, me te wā mō ngā meatanga katoa i raro i te rangi:

² he wā e whānau ai, he wā e mate ai; he wā e whakatō ai, he wā e hūtia ai te mea i whakatōkia;

³ he wā e patu ai, he wā e rongoā ai; he wā e wāwāhi iho ai, he wā e hanga ake ai;

⁴ he wā e tangi ai, he wā e kata ai; he wā e auē ai, he wā e kanikani ai;

⁵ he wā e ākiritia atu ai ngā kōhatu, he wā e kohikohia ai ngā kōhatu, he wā e awhi ai, he wā e kore ai e awhi;

⁶ he wā e rapu ai, he wā e ngaro ai; he wā e tiaki ai, he wā e ākiri atu ai;

⁷ he wā e haehae ai, he wā e tuitui ai; he wā e whakarongo puku ai, he wā e kōrero ai;

⁸ he wā e aroha ai, he wā e mauāhara ai; he wā e whawhai ai, he wā e mau ai te rongo.

Te Mahi mai nā te Atua

⁹ He aha te pai ki te kaimahi i tāna mea i māuiui ai ia?

¹⁰ Kua kite ahau i te raruraru e hōmai ana e te Atua ki ngā tama a te tangata hei whakararu i a rātou.

¹¹ I hangā e ia ngā mea katoa kia ātaahua i tōna wā anō; ā, i whakanohoia e ia te ao ki ō rātou ngākau, engari kia kaua te tangata e kite i tā te Atua mahi i mahi ai, mai i te tīmatanga ā taea noatia te mutunga.

¹² E mōhio ana ahau kāhore he mea pai atu mō rātou i te ngākau hari, i te mahi i te pai i a rātou e ora ana;

¹³ ā, he mea hoki nā te Atua kia kai ngā tāngata katoa, kia inu, kia kite anō hoki i te pai o tō rātou māuiui katoa.

¹⁴ E mōhio ana ahau ko ngā mea katoa e hangā ana e te Atua, ka mau tonu ā ake ake; e kore tētahi mea e honoa mai, e kore anō hoki tētahi wāhi e tangohia atu. I meatia hoki e te Atua kia wehi ai ngā tāngata i tōna aroaro.

¹⁵ Ko tō mua mea koia anō tēnei ināianei; nā, ko te mea e puta mai ā mua kua puta noa ake; e rapua ana anō e te Atua te mea onamata.

He Tūkino i roto i te Ao

¹⁶ Nā, i kitea anō e ahau i raro i te rā, ko te wāhi o te whakawā i reira ia te kino, ā, ko te wāhi o te tika ko te kino i reira.

¹⁷ Ka mea ahau i roto i tōku ngākau, “Tērā e whakawākia e te Atua te tangata tika rāua ko te tangata kino; nō te mea kua takoto te wā i reira mō ngā meatanga katoa, mō ngā mahi katoa.”

¹⁸ I mea ahau i roto i tōku ngākau, “Nā te mea mō ngā tama a te tangata, he mea nā te Atua hei whakaatu i a rātou, kia kite ai rātou he pērā noa iho rātou i te kararehe.”

¹⁹ Ko te mea hoki e pā ana ki ngā tama a te tangata, e pā ana ki ngā kararehe; kotahi tonu te mea e pā ana ki a rātou; ko te matenga o tētahi rite tonu ki te matenga o tētahi. Āe rā, kotahi tonu anō manawa ō rātou katoa; kīhai hoki te tangata i hipa ake i te kararehe; he horihori hoki te katoa.

²⁰ E haere ana te katoa ki te wāhi kotahi; nō te puehu nei te katoa, ka hoki anō te katoa ki te puehu.

²¹ Ko wai e mātau ana ki te wairua o te tangata, e haere ana rānei ki runga, ki te wairua rānei o te kararehe, mehemea rānei e heke iho ana ki raro ki te whenua?

²² Nā, ka kite ahau kāhore he pai nui atu i tēnei, arā kia koa te tangata ki āna mahi; ko te wāhi hoki tērā māna; mā wai ia e whakahoki mai, e mea kia kite i ngā mea e puta mai i muri i a ia?