Kaikauwhau 11 - Paipera Tapu 2012

Te Painga o te Mamahitanga

¹ Makā tāu taro ki te mata o ngā wai; kia maha hoki ngā rā ka kitea anō e koe.

² Hoatu tētahi wāhi mā te tokowhitu, āe mā te tokowaru anō hoki; e kore hoki koe e mōhio ko tēhea kino e puta mai ki te whenua.

³ Ki te kī ngā kapua i te ua, ka ringihia ki te whenua. Ki te hinga hoki te rākau ki te tonga, ki te raki rānei, ko te wāhi e hinga ai te rākau, ko reira anō ia takoto ai.

⁴ Ko te tangata e whai mahara ana ki te hau, e kore e rui; ko te tangata titiro kapua e kore e kokoti.

⁵ Nā, ka kore anō koe e mōhio ki te huarahi o te hau, ki te tupu rānei o ngā wheua i roto i te kōpū o te wahine hapū; e kore anō hoki e mōhiotia e koe te mahi a te Atua, a te kaimahi o ngā mea katoa.

⁶ I te ata ruia tāu purapura, ā, i te ahiahi kaua e pēpeke tōu ringa; kāhore hoki koe e mōhio ko tēnei rānei e tika, ko tērā rānei, ko rāua rānei e rua ka pai ngātahi.

Te Whanaketanga me te Pakeketanga

⁷ He pono he āhuareka te mārama, ā, he mea pai ki ngā kanohi te titiro ki te rā.

⁸ Āe rā, ki te maha ngā tau e ora ai te tangata, kia hari ia ki aua tau katoa; engari kia mahara ia ki ngā tau o te pōuri, tērā hoki e maha. Ko ngā mea e haere ake ana he horihori katoa.

⁹ Kia koa, e te taitamariki, ki tōu taitamarikitanga; kia whakahari anō hoki tōu ngākau i a koe i ngā rā o tōu taitamarikitanga. Haere hoki i ngā ara o tōu ngākau, i te tirohanga anō a ōu kanohi; otiia kia mōhio anō koe, he mea ēnei katoa e riro ai koe i te Atua ki te whakawā.

¹⁰ Nō reira whakawāteatia atu te riri i tōu ngākau, ā, whakanekehia atu te kino i tōu kikokiko; he mea horihori nei hoki te taitamarikitanga, me te houkuratanga.