Kaikauwhau 1 - Paipera Tapu 2012

He Whakaaro o tētahi Kīngi Kaikauwhau

¹ Ko ngā kupu a te Kaikauwhau, arā a te tama a Rāwiri, i kīngi nei ki Hiruhārama:

² “He tino horihori rawa,” e ai tā te Kaikauwhau, “he tino horihori rawa; he horihori katoa!”

³ He aha te pai ki te tangata o tōna māuiui katoa e māuiui ai ia i raro i te rā?

⁴ Ko tēnei whakatupuranga e haere atu ana, ko tērā whakatupuranga e haere mai ana; ko te whenua ia, mau tonu.

⁵ E whiti ana hoki te rā, e heke atu ana te rā, hohoro tonu atu ki tōna wāhi i whiti mai ai.

⁶ E anga ana te hau ki te tonga, nā, ka taka ki te raki; he hanga takataka tonu tāna i tōna ara, ā, ka hoki mai anō te hau ki ōna takatakanga.

⁷ E rere ana ngā awa katoa ki te moana, heoi kāhore e kī te moana; ko te wāhi i rere mai ai ngā awa, ka hoki atu anō rātou ki reira.

⁸ Māuiui rawa ngā mea katoa, e kore e taea e te tangata te kōrero; e kore te kanohi e ngata i te mātakitaki, e kore te taringa e kī i te whakarongo.

⁹ Ko tō mua mea koia anō hei mea āianei, ā, ko te mea i mahia i mua ka mahia anō āianei; kāhore hoki he mea hou i raro i te rā.

¹⁰ Tērā anō rānei he mea e kī ai tētahi, “Titiro, he mea hou tēnei”? He mea ia nō ngā wā ō mua, nō ērā i mua atu i a tātou.

¹¹ Kāhore he mahara ki ngā whakatupuranga o mua; kāhore hoki e maharatia ngā whakatupuranga e haere mai ā muri nei e te hunga ō muri atu.

Te Huakore o te Whai Whakaaronui

¹² Ko ahau, ko te Kaikauwhau, te kīngi o Īharaira i Hiruhārama.

¹³ Nā, ka whakaangahia e ahau tōku ngākau ki te whakaaro nui hei rapu, hei kimi i ngā mea katoa e mahia ana i raro i te rangi. Nā te Atua tēnei whakararuraru kino i hōmai ki ngā tama a te tangata hei whakararu i a rātou.

¹⁴ Kua kite ahau i ngā mea katoa e mahia ana i raro i te rā; nanā, he horihori katoa, he whai hoki i te hau.

¹⁵ Ko te mea piko e kore e taea te whakahāngai; ko te mea koha e kore e taea te tatau.

¹⁶ I kōrerorero ahau ki tōku ngākau, i mea, “Nanā, kua whiwhi rawa ahau i te whakaaro nui ki runga ake i ō te hunga katoa i mua atu i ahau i Hiruhārama; āe rā, he maha ngā mea kua kitea e tōku ngākau o te whakaaro nui, o te mātauranga.”

¹⁷ Nā, ka whakaangahia e ahau tōku ngākau kia mōhio ki te whakaaro nui, kia mōhio ki te haurangi, ki te wairangi; ā, kua kite ahau he whai anō hoki tēnei i te hau.

¹⁸ Mā te nui hoki o te whakaaro ka nui ai te pōuri, ā, ko te tangata e whakaneke ake ana i te mātauranga e whakaneke ake ana i te mamae.