Ihāia 57 - Paipera Tapu 2012

Ka Whakawātia te Koropiko Whakapakoko

¹ Ka riro ki te kore te tangata tika, ā, kāhore e maharatia iho e te ngākau o tētahi tangata; e tangohia atu anō hoki te hunga tohu tāngata; tē mahara tētahi. E tangohia atu ana te tangata tika kei kite i te hē.

² Ka haere ia ki te rangimārie, ka okioki rātou ki ō rātou takotoranga, ka haere tēnā, tēnā, i runga i tōna whakaaro tapatahi.

³ “Ko koutou ia, awhi mai ki konei, e ngā tama a te wahine mākutu, e ngā uri o te tangata pūremu, o te wahine kairau.

⁴ He tākaro tā koutou ki a wai? Ki a wai te hāmama nui o ō koutou māngai, te whētero roa o te arero? He teka ianei he whānau koutou nā te poka kē, he uri nō te teka –

⁵ koutou, e tahu nā i ō koutou hiahia i waenga i ngā oki, i raro i ngā rākau kōuru nui katoa; e patu nā i ngā tamariki i ngā awaawa, i raro i ngā pari kōhatu?

⁶ Kei ngā kōhatu māeneene o te awa tōu wāhi; ko ēnā, ko ēnā te rota i a koe; ringihia ana e koe he ringihanga ki ēnā, whakaekea atu ana he whakahere. E mārie rānei ahau ki ēnā?

⁷ I runga i te maunga tiketike, aua noa atu ki runga, i hangā e koe tōu takotoranga, piki ai ki reira ki te mea patunga tapu.

⁸ Kua oti anō tōu whakamahara te whakatū e koe ki tua i te tatau, i ngā pou; kua hura hoki koe i a koe ki tētahi atu, ehara i ahau, kua piki ki runga; kei te whakanui i tōu takotoranga, whakaritea ana e koe he kawenata ki a rātou; i matenuitia anō e koe tō rātou takotoranga i te wāhi i kite ai koe.

⁹ I haere atu anō koe ki te kīngi, mea rawa ki te hinu, whakanuia ana e koe āu hinu whakaranu; ungā ana e koe āu karere ki tawhiti, whakaititia ana koe e koe anō ki raro rawa ki te rēinga.

¹⁰ Māuiui ana koe i te roa o tōu ara; otiia kāhore koe i mea, ‘Kāhore he manakohanga.’ Kua kitea e koe e nui haere ana tōu kaha; koia koe tē ruha ai.

¹¹ “I pāwera koe, i wehi i a wai, i teka ai koe, i kore ai e mahara ki ahau, i kore ai tōu ngākau e mea mai? Kīhai ianei ahau i whakarongo puku he wā roa i mua rā anō, nā, kāhore ōu wehi ki ahau?

¹² Māku e whakaatu tōu tika; tēnā ko āu mahi, e kore koe e whai pai i ēnā.

¹³ Ka tangi koe, mā ōu huihui koe e whakaora! Otiia, ka kāhakina rātou e te hau ka riro katoa atu i te ngā. Ko te tangata ia e whakawhirinaki ana ki ahau, mōna te whenua, ka riro hoki i a ia tōku maunga tapu.”

He Whakamārie mō te Hunga Pōuri

¹⁴ Ka kī anō ia: “Opehia ake, opehia ake, whakapaia te ara, hāpainga atu te tūtukitanga waewae i te ara o tāku iwi.”

¹⁵ Ko te kupu hoki tēnei a te Mea Tiketike o Runga Rawa, ko tōna kāinga nei kei ngā wā onamata, ko tōna ingoa ko Tapu: “Ko te wāhi e noho nei ahau kei te tiketike, kei te tapu, i te tangata he marū rawa tōna ngākau, he pāpaku, hei whakahauora i te wairua o te hunga pāpaku, hei whakahauora i te ngākau o ngā mea kua marū.

¹⁶ E kore hoki ahau e whawhai ā ake ake, e kore anō e mau tonu tōku riri; pēnā ka pēhia rawatia te wairua i tōku aroaro, me ngā manawa i hangā e ahau.

¹⁷ He hē nō tōna apo taonga i riri ai ahau, i patu ai i a ia; i huna ahau i tōku mata, i riri, ā, haere kotiti kē ana ia i runga i te ara o tōna ngākau.

¹⁸ Kua kite ahau i ōna ara, ka rongoātia anō ia e ahau; ka ārahi anō ahau i a ia, ka whakahoki anō i ngā whakamārietanga ki a ia, ki ōna tāngata anō hoki e tangi ana;

¹⁹ ko ahau te kaihanga o ngā hua o ngā ngutu. Ka mau, ka mau te rongo ki te hunga i tawhiti, ki te hunga i tata,” e ai tā Ihowā; “māku anō ia e rongoā.”

²⁰ Ko te hunga kino ia rite tonu ki te moana ngarungaru; e kore e marino, heoi kei te āia ake e ōna wai te puehu, te paru.

²¹ “Kāhore he maunga rongo ki te hunga kino,” e ai tā tōku Atua.