Ihāia 53 - Paipera Tapu 2012

¹ Ko wai i whakapono ki tā mātou kōrero; i whakaaturia rānei ki a wai te ringaringa o Ihowā?

² Ka tupu ake hoki ia ki tōna aroaro ānō he rākau wana, me te pakiaka hoki i te oneone maroke. Kāhore ōna āhuareka, kāhore hoki he pai; ā, ka titiro tātou ki a ia, tē ai he ātaahua e minamina ai tātou ki a ia.

³ I whakahēngia, i whakakāhoretia ia e te tangata; he tangata pōuri, kua mōhio hoki ki te tangi; ā, i āhua huna ngā kanohi ki a ia; i whakakāhoretia, kīhai hoki tātou i whakaaro ki a ia.

⁴ He pono, nāna ō tātou mate i pīkau, nāna hoki i waha ō tātou pōuri; ko tātou ia i mea, i tukitukia, i patua ia e te Atua, i whakawhiua.

⁵ Kāhore, i werohia ia mō ō tātou hē, i kurua mō ō tātou kino; nōna te whiunga i mau ai tō tātou rongo, kei ōna kārawarawa hoki he rongoā mō tātou.

⁶ Ko tātou katoa, ānō he hipi, kua marara kē, kua anga atu tātou ki tōna ara, ki tōna ara; nā Ihowā ia i mea kia tau iho ki a ia te kino o tātou katoa.

⁷ I tūkinotia ia, i whakawhiua; heoi kīhai i kuihi tōna māngai; ānō he reme i ārahina ia kia patua, me te hipi hoki i te aroaro o ōna kaikutikuti e wahangū ana, kīhai i kuihi tōna waha.

⁸ Nā te tūkino, nā te whakawā, tangohia atu ana ia. Tēnā ko tōna whakatupuranga, ko wai o rātou i whakaaro kua wehea atu ia i te ao ora? He mahi hē hoki nā tāku iwi i patua ai ia.

⁹ Ā, ka whakaritea hei te hunga kino he urupā mōna; i te tangata taonga ia i tōna matenga; ahakoa kāhore āna mahi tutū, kāhore anō he tinihanga i tōna māngai.

¹⁰ Otiia, i pai hoki a Ihowā kia kurua ia; nāna ia i mea kia mamae. Ina meinga e koe tōna wairua hei whakahere mō te hē, ka kite ia i tōna uri, ka whakaroa i ōna rā, ā, ko tā Ihowā i pai ai ka āta oti i a ia.

¹¹ Ka kite ia i tā tōna wairua i uaua ai, ā, tatū ana te ngākau; mā te mōhio ki a ia ka whakatikaia ai te tini e tāku pononga tika; māna hoki ō rātou kino e waha.

¹² Mō reira ka hoatu e ahau he wāhi mōna i roto i ō te hunga nui, ā, ka tū ngātahi ia me te hunga kaha i te taonga; mō tōna wairua i ringihia e ia ki te mate, ā, i taua ngātahitia me ngā poka kē; nāna hoki ngā hara o te tini i waha, nāna i wawao ngā poka kē.