Ihāia 52 - Paipera Tapu 2012

Kia Hari a Hiona

¹ Maranga, maranga; kākahuria tōu kaha, e Hiona! Kākahuria ōu kahu whakapaipai, e Hiruhārama, e te pā tapu; nō te mea heoi anō haerenga mai ki a koe o te mea kokotikore, o te mea poke.

² Ruperupea atu te puehu i a koe, whakatika, noho iho, e Hiruhārama! Wetekina ngā here i tōu kakī, e te tamāhine herehere a Hiona!

³ Ko te kupu hoki tēnei a Ihowā: Kua hokona kautia atu koutou; nā, ehara i te moni māna koutou e whakahoki mai.

⁴ Ko te kupu hoki tēnei a te Ariki, a Ihowā: “Haere atu tāku iwi ki Īhipa i mua, ki reira noho ai; nā, kāhore he rawa i whakatupuria kinotia ai rātou e te Ahiriana.

⁵ “Nā, he aha rā tāku i konei,” e ai tā Ihowā; “ka kāhakina kautia atu nei hoki tāku iwi? Tangi auē ana i ō rātou rangatira,” e ai tā Ihowā, “e whakahāweatia tonutia ana tōku ingoa i tēnei rā, i tēnei rā.

⁶ Mō konei ka mōhio tāku iwi ki tōku ingoa; mō konei ka mōhio rātou i taua rā ko ahau te kōrero nei; nanā, ko ahau tēnei.”

⁷ Anō te āhuareka o ngā waewae i runga i ngā maunga o te kaikawe i te rongo pai, e kauwhau ana i te maunga rongo; e kawe mai ana i te rongo whakahari o te pai, e kauwhau ana i te ora; e mea ana ki a Hiona, “E kīngi ana tōu Atua.”

⁸ Te reo o āu tūtei! Ka maranga i a rātou te reo, ka waiata ngātahi; nō te mea ka kite rātou he kanohi, he kanohi, ua whakahoki a Ihowā i Hiona.

⁹ Hāmama, waiata ngātahi, e ngā wāhi o Hiruhārama kua ururuatia; kua whakamārie hoki a Ihowā i tāna iwi, kua hoko i Hiruhārama.

¹⁰ Kua huhua te ringa tapu o Ihowā ki te aroaro o ngā tauiwi katoa, ā, ka kite ngā pito katoa o te ao i te whakaora a tō tātou Atua.

¹¹ Maunu, maunu, haere atu i reira! Kaua e pā ki te mea poke; haere atu i roto i a ia; kia mā, e ngā kaimau o ngā oko a Ihowā.

¹² E kore hoki koutou e haere kaikā, e kore hoki e haere pērā i te whati; nō te mea ka haere a Ihowā i tō koutou aroaro; ko te Atua hoki o Īharaira hei hiku mō koutou.

Te Pononga e Mamae ana

¹³ Nanā, ka mahi tūpato tāku pononga, ka whakatiketiketia ia, ka hāpainga ki runga, ā, ka tiketike rawa atu.

¹⁴ Pērā i te tini i mīharo ki a koe – i kino iho hoki tōna kanohi i tō te tangata, tōna āhua i tō ngā tama a te tangata –

¹⁵ waihoki he maha ngā iwi ka tāuhiuhia e ia; ā, ka kopi te māngai o ngā kīngi ki a ia. Nō te mea ko ngā mea kīhai i kōrerotia ki a rātou ka kitea, ko ngā mea kīhai i rangona ka mōhiotia.