Ihāia 51 - Paipera Tapu 2012

He Kupu Whakamārie ki a Hiruhārama

¹ “Whakarongo ki ahau, e koutou e whai nā i te tika, e rapu nā i a Ihowā. Titiro ki te kōhatu i hāua mai ai koutou, ki te poka i te rua i keria mai ai koutou.

² Titiro ki a Āperahama, ki tō koutou matua, ki a Hera hoki i whānau ai koutou; he kotahi hoki ia, karangatia ana ia e ahau, manaakitia ana, whakanuia ana.

³ Tā te mea kua whakamārie a Ihowā i Hiona; kua whakamārie ia i ōna wāhi katoa ka ururuatia, kua mea hoki i tōna wāhi koraha kia rite ki Erene, i tōna wāhi tītōhea kia rite ki te kāri a Ihowā; he koa, he hari, ka kitea i roto, he whakawhetai, me te reo hoki e waiata ana.

⁴ “Whakarongo ki ahau, e āku tāngata, kia whai taringa ki ahau, e tāku iwi; ka puta atu hoki he ture i roto i ahau, ka takoto anō i ahau tāku whakawā hei whakamārama mō ngā iwi.

⁵ Kei te tata mai tōku tika; kua puta tāku whakaora, mā ōku ringa e whakawā mō ngā iwi; ka tatari ki ahau ngā motu, ka okioki ki tōku ringa.

⁶ Anga ake ō koutou kanohi ki ngā rangi, tirohia iho te whenua i raro; ka memeha atu hoki ngā rangi, ānō he paowa, ka tawhitotia te whenua, me he kākahu, ko te hunga hoki e noho ana i reira ka pēnā te mate; ko tāku whakaoranga ia ka mau tonu; e kore anō tōku tika e heke.

⁷ “Whakarongo ki ahau, e koutou e mōhio nā ki te tika, e te hunga kei ō koutou ngākau nei tāku ture; kei wehi i te tāwai a te tangata, kei numinumi i ā rātou taunu.

⁸ Ka kai hoki te pūrehurehu i a rātou, ānō he kākahu, ka pau rātou, ānō he huruhuru hipi i te huhu; ka mau tonu ia tōku tika, tāku whakaora ki ngā whakapaparanga katoa.”

⁹ Maranga, maranga, kākahuria te kaha, e te ringa o Ihowā! Maranga, kia rite ki ngā rā ō mua rā, ki ngā whakatupuranga onamata. Ehara oti i a koe nāna i kotikoti a Rahapa, i wero te tarakona?

¹⁰ Ehara oti i a koe nāna i whakamaroke te moana, ngā wai o te rire nui, ko ngā wai hōhonu o te moana waiho ake e koe hei huarahi haerenga mō te hunga kua oti te hoko?

¹¹ Nā, ko ā Ihowā i hoko ai ka hoki mai, ka haere mai ki Hiona, me te waiata anō rātou; i runga i ō rātou māhunga he hari e kore e mutu; ka whiwhi rātou ki te koa, ki te hari; ā, rere ana te pōuri me te auē.

¹² “Ko ahau, inā, māku koutou e whakamārie; ko wai koe, e wehi nā i te tangata e matemate nei, i te tama a te tangata ka meinga nei hei tarutaru?

¹³ Ka wareware nei hoki ki a Ihowā, ki tōu kaihanga, nāna ngā rangi i hora, nāna i whakatakoto te tūranga mō te whenua. Ka pāwera tonu koe i ngā rā katoa i te riri o te kaiwhakawhiu, i te mea e anga mai ana ia ki te whakamate, ā, kei hea te riri o te kaiwhakawhiu?

¹⁴ Hohoro tonu te wetekina o te herehere i whakaraua; e kore hoki ia e mate, e heke ki te poka, e kore hoki e whakakorea he taro māna.

¹⁵ Ko Ihowā ia ahau, ko tōu Atua, i whakakorikori nei i te moana, ā, hāmama ana ōna ngaru – ko Ihowā o ngā mano tōna ingoa.

¹⁶ Ā, kua hoatu e ahau āku kupu ki tōu māngai; kua hīpokina koe ki te marumaru o tōku ringa, kia whakatōkia ai ngā rangi, kia takoto ai te tūranga mō te whenua, hei mea hoki ki Hiona, ‘Ko koe tāku iwi.’ ”

¹⁷ Maranga, maranga! Whakatika, e Hiruhārama, i whakainumia nei e te ringa o Ihowā ki te kapu o tōna riri; kua inu koe i ngā nganga o te kapu wiri, he mea tatau nāu.

¹⁸ Kāhore kau tētahi hei tautītī i a ia o ngā tama katoa i whānau i roto i a ia; kāhore hoki tētahi o ngā tama i atawhaitia e ia hei pupuri i tōna ringa.

¹⁹ Ka rua ēnei mea ka pono nei ki a koe – ko wai hei tangi ki a koe? Ko te whakangaromanga, ko te wawāhanga, ko te matekai, ko te hoari me pēhea tāku whakamārie i a koe?

²⁰ Kua hemo āu tama; e takoto ana i te ahunga mai o ngā ara katoa, ānō he anaterope i roto i te kupenga; kī tonu rātou i te riri o Ihowā, i te whakatūpehupehu o tōu Atua.

²¹ Mō reira, whakarongo ki tēnei, e koe kua tūkinotia nei; e haurangi ana, rāia, ehara i te haurangi wāina.

²² Ko te kupu tēnei a tōu Ariki, a Ihowā, arā a tōu Atua, e tohe nei i tā tōna iwi: “Nanā, ka tangohia e ahau te kapu wiri i tōu ringa, ngā nganga o te kapu o tōku riri; e kore e inumia anō e koe ā muri ake nei.

²³ Ā, ka hoatu e ahau ki te ringa o te hunga e whakatupu kino nei i a koe, i mea rā ki tōu wairua, ‘Piko iho nei, kia haere atu ai mātou.’ Nā, kua whakatakotoria e koe tōu tuarā hei whenua, hei huarahi mō te hunga i haere atu rā.”