Ihāia 5 - Paipera Tapu 2012

Te Waiata mō te Māra Wāina Huakore

¹ Nā, me waiata e ahau he waiata nā tāku i aroha nei mō tāku i kaingākau ai, he mea mō tāna māra wāina: He māra wāina tā tāku kaingākau i tētahi pukepuke mōmona.

² Nā, taiepatia ana e ia, kohikohia ana e ia ngā kōhatu o reira, whakatōkia ana e ia ki te wāina pai rawa; hangā ana e ia he pourewa ki waenganui, keria ana anō e ia he poka wāina ki reira; ā, ka tatari ia kia whai karepe, nā, ka hua mai he karepe māori.

³ Nā, e te hunga e noho nei i Hiruhārama, me ngā tāngata o Hūrā, whakaritea tā māua whakawā ko tāku māra wāina.

⁴ Ko te aha ake anō rā i āhei kia mahia ki tāku māra, kīhai i mahia e ahau ki reira? He aha rā, i ahau i tatari ai kia hua mai he karepe, i puta kē mai ai he karepe māori?

⁵ Nā ināianei, māku e whakaatu ki a koutou tāku e mea ai ki tāku māra wāina. Ka tangohia atu e ahau tōna pā whakaruru hau, ā, ka pau ia te kai; ka tukitukia hoki e ahau tōna taiepa, ā, ka takatakahia.

⁶ Ā, ka meinga e ahau kia ururua; e kore e tapatapahia, e kore e ngakia, engari, ka huaranga ake te tātarāmoa me te tūmatakuru; ka ako atu hoki ahau ki ngā kapua kia kaua te ua e uaina ki reira.

⁷ Ko te māra wāina hoki a Ihowā o ngā mano, ko te whare o Īharaira, ā, ko ngā tāngata o Hūrā tāna mea āhuareka i whakatō ai; ka tatari ia ki te whakawā, nā, ko te tūkino; ki te tika, nā, he auē.

Ka Whakahorihoria te Tūkino Pāpori

⁸ Auē te mate mō te hunga e hono ana i te whare ki te whare, e whakapiri nei i te māra ki te māra, ā, kore noa iho he wāhi, ā, ka meinga koutou kia noho, ko koutou anake, i waenganui i te whenua!

⁹ Ko tā Ihowā o ngā mano tēnei i hamumu ai ki ōku taringa: “He pono, he tini ngā whare ka mokemoke, tōna nunui, tōna ātaahua, ka noho tahanga kau.

¹⁰ Nō te mea kotahi tekau ngā eka o te māra wāina, ka maea ake kotahi tonu te pāti; i kī te homa i te purapura, ka maea ake kotahi te epa.”

¹¹ Auē te mate mō te hunga e maranga wawe ana i te ata ki te whai i te wai kaha; e kawe ana i te roa o te pō, nāwai ā, ka tahuna e te wāina,

¹² ko te hāpa me te hātere, ko te timipera me te pūtōrino, ko te wāina, kei ā rātou hākari ēnā, heoi, kāhore ā rātou mahara ki te mahi a Ihowā, kāhore hoki he whakaaro ki te mahi a ōna ringa!

¹³ Koia i riro ai tōku iwi i te pārau, he kore mātauranga; ko ō rātou tāngata ingoa nui hoki kua hemo i te kai, ā, ko tō rātou mano tini kua pakapaka rawa i te matewai.

¹⁴ Nā reira te rēinga i whakanui ai i tōna hiahia, i whewhera noa atu ai i tōna māngai; ā, heke atu ana ki reira tō rātou korōria, ō rātou mano tini, tō rātou whakahī, me te tangata e whakamanamana ana i roto i a rātou.

¹⁵ Ka whakapikoa anō hoki te tangata ware, ā, ka whakaititia te tangata nui, ka whakahokia iho hoki ngā kanohi o te hunga whakakake.

¹⁶ Otiia ka whakanekehia ake a Ihowā o ngā mano i runga i te whakawā, ka whakatapua anō te Atua, te Mea Tapu, i runga i te tika.

¹⁷ Ko reira ngā reme kai ai, ānō kei tō rātou wāhi, ā, ka kainga e ngā mea haere noa ngā wāhi kua ururuatia o te hunga tetere.

¹⁸ Auē te mate mō te hunga e kūmea ana e rātou te hē ki ngā aho o te horihori, te hara hoki me te mea ki te taura o te kāta;

¹⁹ e mea nei, “Kia hihiko ia, kia hohoro tāna mahi, kia kite ai mātou; kia whakatata mai hoki, kia tae mai te whakaaro o te Mea Tapu o Īharaira, kia mōhio ai mātou!”

²⁰ Auē te mate mō te hunga e mea nei ki te kino, he pai, ki te pai hoki, he kino; e mea nei i te pōuri hei mārama, i te mārama hoki hei pōuri; e mea nei i te kawa hei reka, i te reka hei kawa!

²¹ Auē te mate mō te hunga he nui nei ō rātou whakaaro ki tā rātou titiro, e mahara ana hoki he hunga mōhio rātou!

²² Auē te mate mō te hunga kaha ki te inu wāina, he hunga uaua anō ki te whakaranu i te wai kaha;

²³ e whakatika nei i tā te tangata hē, he whakaaro ki te utu; e tango atu nei i te tika o te tangata tika.

Ka Poropititia te Whakaekenga a ngā Iwi Kē

²⁴ Mō reira ka rite ki te kainga a te arero o te ahi i te kakau wīti, ki te hinganga o te otaota maroke ki roto ki te mura; ka pērā tō rātou pakiaka te pirau, ka rere tō rātou puāwai ki runga, ānō he puehu; mō rātou i whakakāhore ki te Ture a Ihowā o ngā mano, i whakahāwea anō hoki ki te kupu a te Mea Tapu o Īharaira.

²⁵ Nā reira te riri o Ihowā i mura ai ki tāna iwi, ā, kua torona e ia tōna ringa ki te whawhai ki a rātou, ā, patua iho rātou e ia; i ngāueue ngā maunga, ā, ko ō rātou tinana mate me te mea he paru i waenganui o ngā huarahi. Nā, ahakoa tēnei katoa, kāhore tōna riri i te tahuri atu, mārō tonu tōna ringa.

²⁶ Ka whakaarahia anō hoki e ia he kara ki ngā iwi i tawhiti; ka whiowhio anō ki a rātou ki te pito o te whenua. Nanā, ka hohoro, ka tere tonu tā rātou haere mai!

²⁷ E kore tētahi o rātou e ngenge, e kore e tapepa te waewae; e kore tētahi e parangia, e kore e moe; e kore te whītiki o ō rātou hope e mawheto, e kore anō te here o ō rātou hū e motu;

²⁸ ko ā rātou pere, koi tonu, he piko katoa ā rātou kōpere; ko ngā pāua o ō rātou hōiho ka kīia he matā, ā, ko ō rātou wīra he āwhiowhio.

²⁹ Ko tā rātou hāmama, koia anō kei tā te raiona, ka hāmama rātou ānō he kūao raiona; āe rā, ka ngengere rātou, ka hopukina tā rātou tūpāpaku, kāwhakina tonutia atu, kāhore hoki he tangata hei whakaora.

³⁰ Nā, ka hāmama rātou ki a rātou i taua rā, me te mea ko te moana e haruru ana; ā, ki te titiro tētahi ki te whenua – nanā, he pōuri me te tuatea, ā, kua pōuri te mārama i ōna kapua.