Ihāia 47 - Paipera Tapu 2012

He Whakawātanga ki Papurōna

¹ “Haere iho, e noho ki te puehu, e te tamāhine wāhina a Papurōna! E noho ki te whenua, kāhore he torōna, e te tamāhine a ngā Karari! E kore hoki koe e kīia i muri he kiri angiangi, he whakatarapī.

² E mau ki ngā kōhatu mira, hurihia he parāoa; tangohia ake tōu ārai, huhua ake te waewae, kia takoto kau te hūhā; e whiti i ngā awa.

³ Ka kitea ōu wāhi e takoto tahanga ana, āe rā, ka kitea tōu mea e whakamā ai koe. Ka rapu utu ahau, e kore anō e whakaae ki tētahi tangata.

⁴ Ko tō tātou kaihoko – ko Ihowā o ngā mano tōna ingoa – ko te Mea Tapu o Īharaira.

⁵ “Noho kupukore, haere ki te pōuri, e te tamāhine a ngā Karari; e kore hoki koe e kīia i muri, ko te wahine rangatira o ngā kīngitanga.

⁶ I riri ahau ki tāku iwi, i whakapokea tōku kāinga tupu; tukua ana e ahau ki tōu ringa; kīhai i puta tōu aroha ki a rātou, whakataimahatia rawatia iho e koe tāu ioka ki te kaumātua.

⁷ I mea anō koe, ‘Hei wahine rangatira ahau ake ake,’ nā, kīhai noa iho tōu ngākau i mea ki ēnei mea; kīhai koe i mahara ki tōna mutunga.

⁸ “Nā, whakarongo āianei ki tēnei, e te wahine e whai nā ki ngā āhuareka, e noho kore wehi nā, e mea nā i roto i tōu ngākau, ‘Tēnei ahau, kāhore atu hoki, ko ahau anake; e kore ahau e noho pouaru, e kore ahau e mōhio ki te matenga o ngā tamariki.’

⁹ Otirā, ka pā whakarere ēnei e rua ki a koe i te rā kotahi: te matenga o ngā tamariki, te pouarutanga; ka pā ēnei ki a koe i tōna tōnuitanga, ahakoa te nui o āu mahi mākutu, te maha rawa o āu whaiwhaiā.

¹⁰ I whakawhirinaki hoki koe ki tōu kino, i mea, ‘Kāhore he kaititiro mōku.’ Ko ōu whakaaro nui me tōu mōhio, nā ēnā koe i whakangau kē; i mea ai koe i tōu ngākau, ‘Ko ahau tēnei, kāhore kē atu, ko ahau anake.’

¹¹ Mō reira ka tae mai te kino ki a koe, e kore tōna putanga e mōhiotia e koe, ka taka anō te hē ki a koe, e kore e taea e koe te karo; ka tae hohoro mai anō ki a koe te whakangaro, e kore e mōhiotia e koe.

¹² “Tēnā rā, e tū, me āu whaiwhaiā, me āu mākutu maha, i mahia rā e koe i tōu tamarikitanga ake, me kāhore koe e whai pai, me kāhore tāu e taea.

¹³ Kua hōhā koe i te maha o ngā whakaaro i whakatakotoria e koe. Tēnā rā, kia tū ngā kaiwhakaaro ki ngā rangi, ngā kaititiro ki ngā whetū, ngā mea mōhio ki ngā marama, kia whakaorangia koe e rātou i ngā mea meāke tūpono ki a koe.

¹⁴ Nanā, ka rite rātou ki te kakau wīti, ka wera i te ahi; e kore rātou e ora i te ngaunga a te ahi; ehara i te ngārahu hei whakamahanatanga, ehara hoki i te ahi hei painatanga.

¹⁵ Nā, ka pērā ngā mea ki a koe, i mahi ai koe ki reira; ko te hunga i hokohoko ki a koe mai i tōu taitamarikitanga, ka kotiti atu rātou ki tōna wāhi, ki tōna wāhi; kāhore he kaiwhakaora mōu.”