Ihāia 42 - Paipera Tapu 2012

Te Pononga, he Mārama ki ngā Iwi

¹ “Nanā, tāku pononga e tautokona ake nei e ahau, tāku i whiriwhiri ai, āhuareka tonu tōku ngākau ki a ia; ka waiho e ahau tōku wairua ki runga ki a ia; māna e whakapuaki te whakawā ki ngā tauiwi.

² E kore ia e hāmama, e kore anō tōna reo e ara, e kore e rangona i te ara.

³ Ko te kākaho kōpē e kore e whatia porokeretia e ia; e kore hoki te muka whakapaowa e tineia e ia; ka whakapuakina e ia te whakawā i runga i te pono.

⁴ E kore ia e ngoikore, e kore e ngākaukore, kia takoto rā anō i a ia te whakawā ki te whenua; ka tatari anō ngā motu ki tāna ture.”

⁵ Ko te kupu tēnei a te Atua, a Ihowā, nāna nei ngā rangi i hanga, i hora; nāna nei i takoto ai te whenua me ngā mea anō e puta mai ana i reira; nāna nei i hōmai he manawa ki ō reira tāngata, me te wairua anō ki te hunga e hāereere ana i reira:

⁶ “He mea karanga koe nāku, nā Ihowā, i runga i te tika, māku anō tōu ringa e pupuri, māku koe e tiaki, ka hoatu anō koe e ahau hei kawenata ki te iwi, hei mārama mō ngā tauiwi;

⁷ hei whakatitiro i ngā kanohi matapō, hei whakaputa mai i ngā herehere i roto i te whare e tūtaki tonu ana, i te hunga e noho ana i te pōuri, i roto i te whare herehere.

⁸ “Ko Ihowā ahau; ko tōku ingoa tēnā; e kore anō e tukua e ahau tōku korōria ki tētahi atu, tōku whakamoemiti ki te whakapakoko.

⁹ Nanā, kua puta mai ngā mea ō mua, he mea hou ēnei e whakaaturia nei e ahau; i te mea kāhore anō kia pihi noa ka kōrerotia nei e ahau ki a koutou.”

He Waiata Whakamoemiti

¹⁰ Waiatatia ki a Ihowā he waiata hou, me te whakamoemiti ki a ia i te pito o te whenua, e te hunga e haere ana ki raro, ki te moana, e ō reira tini mea, e ngā motu, e ngā tāngata e noho ana i reira.

¹¹ Nō reira kia nui te reo o te koraha, o ngā pā anō o reira, o ngā kāinga, e nohoia ana e Kerara; kia waiata ngā tāngata o Hera, kia hāmama rātou i runga i te tihi o ngā maunga.

¹² Kia whakakorōriatia a Ihowā e rātou, kia kauwhautia te whakamoemiti ki a ia i ngā motu.

¹³ Ka puta mai a Ihowā, ko te āhua kei tō te tangata mārohirohi; ka whakaoho i te hae ka pērā i te tangata whawhai; ka karanga, āe rā, ka hāmama; ka kaha noa atu i ōna hoariri.

¹⁴ “Ka roa nei tāku whakamorokitanga, i whakarongo puku ahau, whakakoromaki tonu; kātahi nei ahau ka auē, ka pērā me te wahine e whānau ana; ka whakahotu ahau, ka kahekahe ngātahi.

¹⁵ Ka whakaururuatia e ahau ngā maunga me ngā pukepuke, ka maroke i ahau ngā otaota katoa o reira; ka meinga ngā awa hei motu, ka maroke anō i ahau ngā hārotoroto.

¹⁶ Ka kawea anō e ahau ngā matapō mā te ara kīhai nei rātou i mōhio; ka meinga te pōuri hei mārama ki tō rātou aroaro, me ngā wāhi kōpikopiko kia tika. Ka meatia ēnei mea e ahau ki a rātou, e kore anō ahau e whakarere i a rātou.

¹⁷ Ka hoki rātou ki muri, nui atu tō rātou whakamā, tō te hunga e whakawhirinaki ana ki ngā whakapakoko, e mea ana ki te mea whakarewa, ‘Ko koutou ō mātou atua.’

¹⁸ “Whakarongo, e ngā turi; titiro, e ngā matapō, kia kite ai koutou!

¹⁹ Ko wai atu te matapō? Ko tāku pononga nei anake; ko wai te turi hei rite mō tāku pononga i ungā nei e ahau? Ko wai te matapō hei rite mō te tangata e mau nei tana rongo ki ahau? Ko wai te matapō hei rite mō tā Ihowā pononga?

²⁰ He maha ngā mea e kitea ana e koe, heoi kāhore e mahara; e puare ana ōna taringa, heoi kāhore e rongo.”

Te Whakakeke a Īharaira

²¹ Pai tonu mai a Ihowā, he whakaaro ki tōna tika; ka whakanuia e ia te ture, ka whakahōnoretia.

²² Ko tēnei iwi ia he pāhuatanga, he taonga pārau; he mea māhanga rātou katoa i roto i ngā rua, ngaro tonu i roto i te whare herehere, hei pāhuatanga rātou, kāhore hoki he kaiwhakaora; hei taonga pārau; kāhore hoki he tangata e kī ana, “Whakahokia!”

²³ Ko wai i roto i a koutou e whai taringa ki tēnei? Ko wai e mahara mai, e whakarongo mai, mō ngā wā hoki ō muri?

²⁴ Nā wai a Hākopa i tuku hei taonga pārau, a Īharaira hoki hei meatanga mā ngā kaipāhua? He teka ianei nā Ihowā? Kua hara nei hoki tātou ki a ia, kīhai hoki rātou i pai kia haere i āna ara, kīhai i whakarongo ki tāna ture.

²⁵ Nā reira ringihia ana e ia te āritarita o tōna riri ki a ia, me te pakanga kaha; wera ana ia i tētahi taha, i tētahi taha, tē mōhio ia; tahuna ana ia, heoi kīhai tōna ngākau i mahara.