Ihāia 41 - Paipera Tapu 2012

Te Kupu Tūturu i a Īharaira

¹ “Whakarongoa i tōku aroaro, e ngā motu; ā, kia puta hou mai he kaha mō ngā iwi; me neke mai rātou, ā, me kōrero rātou; tātou tahi me whakatata ki te whakawā.

² “Nā wai i whakaara ake tētahi i te rāwhiti, i karangatia e ia i runga i te tika ki tōna waewae? Hōmai ana e ia ngā iwi ki tōna aroaro, meinga ana ia e ia hei rangatira mō ngā kīngi; hōmai ana rātou e ia ānō he puehu ki tāna hoari, ānō he kakau wīti e āia ana, ki tāna kōpere.

³ Whāia ana rātou e ia, haere ora atu ana ia; āe rā, i te ara kīhai i haerea e ōna waewae.

⁴ Nā wai oti tēnei i mahi, kārangaranga ai i ngā whakatupuranga mai i te tīmatanga! Ko ahau, ko Ihowā, ko te tīmatanga, ā, kei ngā whakamutunga, ko ahau nei.”

⁵ I kite ngā motu, ā, wehi ana, pairi noa iho ngā pito o te whenua, whakatata ana, haere mai ana.

⁶ Uru ana rātou ki te mahi a tōna hoa, a tōna hoa, me tā rātou kī ki tōna tuakana, ki tōna teina, “Kia māia!”

⁷ Nā, kei te whakatenatena te kāmura i te kaitahu kōura, te kaiwhakamāeneene ki te hama, i te tangata e patu ana ki te paepae, ko tāna kupu mō te whakapiringa, “Kei te pai”; nā, whakaūkia ana e ia ki te whao, tē taea te whakanekeneke.

⁸ “Ko koe, e Īharaira, ko tāku pononga, ko Hākopa, ko tāku i whiriwhiri ai, ko te uri o tāku i aroha ai, o Āperahama;

⁹ ko tāku anō i tango mai ai i ngā pito o te whenua; he mea karanga nei hoki koe nāku i roto i ōna tōpito; ko tāku kupu hoki ki a koe, ‘Ko koe tāku pononga; he mea whiriwhiri koe nāku, kāhore koe e makā atu e ahau.’

¹⁰ Kaua e wehi; kei a koe nei hoki ahau; kaua anō e tirotiro; ko ahau nei hoki tōu Atua. Māku koe e whakakaha, āe rā, māku koe e āwhina, ka tautokona ake anō koe e te ringa matau o tōku tika.

¹¹ “Nanā, ka whakamā, ka numinumi kau te hunga katoa e riri ana ki a koe; ka rite ki te kāhore; ka ngaro te hunga e ngangare ana ki a koe.

¹² Ka rapua rātou, ōu hoariri, e koe, ā, e kore e kitea; ko te hunga i whawhai ki a koe, ka rite ki te kāhore, ki te mōtī noa iho.

¹³ Nō te mea ko ahau, ko Ihowā, ko tōu Atua, kei te pupuri i tōu matau, kei te mea ki a koe, ‘Kaua e wehi; ko ahau hei whakauru mōu.’

¹⁴ Kaua e wehi, e te kutukutu, e Hākopa, e ngā tāngata o Īharaira; māku koe e āwhina, e ai tā Ihowā, tā tōu kaihoko,” tā te Mea Tapu o Īharaira.

¹⁵ “Nanā, kua meinga koe e ahau hei patu wīti, koi tonu, hou tonu, he whai niho; ka patua e koe ngā maunga, ā, ngotangota noa; ko ngā pukepuke, ka meinga e koe kia rite ki te pāpapa.

¹⁶ Rererere ana rātou i a koe, kāhakina tonutia atu e te hau, tītaritaria ake rātou e te paroro. Ko koe ia ka hari ki a Ihowā, ka whakamanamana, ki te Mea Tapu o Īharaira.

¹⁷ “E rapu ana ngā ware, ngā rawakore i te wai, ā, kāhore kau, hē ake ō rātou arero i te matewai; ka rongo ahau, a Ihowā, ki tā rātou; e kore ahau, te Atua o Īharaira, e whakarere i a rātou.

¹⁸ Ka whakapuaretia e ahau he awa ki ngā wāhi tiketike, he puna wai i waenganui i ngā raorao; ka meinga e ahau te koraha hei hārotoroto wai, te whenua maroke hei pupūtanga wai.

¹⁹ Ka whakatōkia e ahau te koraha ki te hīta, ki te kōwhai, ki te ramarama, ki te rākau hinu; ka tū i ahau te kauri ki te tītōhea, te rimu, rātou tahi anō ko te ake;

²⁰ kia kite ai rātou, kia mōhio ai, kia mahara ai, kia mātau ngātahi ai, he mea mahi tēnei nā te ringa o Ihowā; nā te Mea Tapu o Īharaira tēnei i hanga.”

Te Huakore o ngā Whakapakoko

²¹ “Kawea mai tā koutou totohe,” e ai tā Ihowā. “Whakaputaina mai ā koutou kupu kaha,” e ai tā te Kīngi o Hākopa.

²² “Me whakaputa mai e rātou, ā, me whakaatu mai ki a tātou ngā mea meāke pono mai. Whakaaturia mai e koutou ngā mea o te tuatahi, he pēhea rānei, kia whakaaroarohia ai e tātou, kia mōhiotia ai tō rātou mutunga iho; kōrerotia rānei ki a tātou ngā mea e puta ā mua.

²³ Whakaaturia ngā mea e haere ake ana i muri, kia mōhio ai mātou he atua koutou; tēnā rā, mahia he pai, he kino rānei, kia wehi ai mātou, kia kite ngātahi ai.

²⁴ Nanā, nō te kāhore koutou, ko ā koutou mahi nō te kāhore rawa; he mea whakarihariha te tangata nāna koutou i whiriwhiri.

²⁵ “Kua oho mai i ahau tētahi i te raki, ā, kua tae mai ia; nō te rerenga mai o te rā tētahi e karanga ana ki tōku ingoa. Ko tōna taenga mai ki ngā rangatira, ānō e eke ana ki te paru pokepoke, ānō ko te kaihanga rīhi e takatakahi ana i te paru.

²⁶ Nā wai i whakaatu mai i te tīmatanga, kia mōhio ai tātou? Nā wai i ngā wā onamata, mō tā tātou kī ake, ‘He tika tāna?’ Āe rā, kīhai i whakaaturia e tētahi, āe rā, kīhai i kōrerotia e tētahi, kīhai anō tētahi i rongo i ā koutou kōrero.

²⁷ Māku te kupu tuatahi ki Hiona, ‘Nanā, tēnei rātou’; ā, ka hoatu e ahau ki Hiruhārama he kaikawe i te rongo pai.

²⁸ I titiro anō ahau, ā, kāhore he tangata; nā, i roto i ēnei katoa kāhore he kaiwhakatakoto whakaaro hei whakahoki kupu mai i tāku uinga ki a rātou.

²⁹ Nanā, ko rātou katoa he horihori kau; he kore noa iho ā rātou mahi; ko ā rātou whakapakoko whakarewa he hau, he mea tikangakore.”