Ihāia 38 - Paipera Tapu 2012

Te Mate me te Whakaoranga o Kīngi Hetekia

¹ I aua rā ka tūroro a Hetekia, me kāhore ka marere. Nā, ka haere a Ihāia poropiti, tama a Āmoho ki a ia, ka mea ki a ia, “Ko te kupu tēnei a Ihowā: Whakahaua iho tōu whare, nō te mea ka mate koe, e kore e ora.”

² Nā, ka tahuri te mata o Hetekia ki te pakitara, ā, ka īnoi ki a Ihowā,

³ ka mea, “Tēnā rā, e Ihowā kia mahara ki ōku hāereerenga i tōu aroaro i runga i te pono, i te ngākau tapatahi, ki tāku meatanga i te pai ki tāu titiro.” Nā, tangi ana a Hetekia; nui atu te tangi.

⁴ Nā, ka puta te kupu a Ihowā ki a Ihāia, ka mea:

⁵ “Haere, mea atu ki a Hetekia, ‘Ko te kupu tēnei a Ihowā, a te Atua o Rāwiri, o tōu tupuna: Kua rangona tāu īnoi e ahau, kua kitea e ahau ōu roimata; nanā, ka tāpiritia e ahau ōu rā ki ngā tau kotahi tekau mā rima.

⁶ Ka whakaorangia koe me tēnei pā e ahau i te ringa o te kīngi o Ahiria; ka tiakina anō e ahau tēnei pā.

⁷ “ ‘Ko te tohu anō tēnei a Ihowā ki a koe, ka oti i a Ihowā tēnei mea i kōrerotia nei e ia:

⁸ Nanā, ka whakahokia ake e ahau te ātārangi i ngā nekehanga i heke atu ai i runga i te whakaatu hāora a Ahata; kia tekau ngā nekehanga whakamuri.’ ” Nā, kotahi tekau ngā nekehanga i hoki ake ai te rā, nō ngā nekehanga anō i heke iho ai.

⁹ Ko te tuhituhi a Hetekia kīngi o Hūrā, i a ia i mate rā, ā ora ake ana i tōna mate:

¹⁰ I mea ahau: “I te poutūmārōtanga o ōku rā, tērā ahau e tomo ki ngā kūwaha o te rēinga; kua tangohia atu i ahau te toenga o ōku tau.”

¹¹ I kī ahau, “E kore ahau e kite i a Ihowā, arā i a Ihowā i runga i te whenua o te hunga ora; heoi anō āku tirohanga ki te tangata, ki te hunga e noho ana i te ao.

¹² Ko te wā i ahau nei kua riro, mauria atu ana i ahau, ānō he tēneti nō te hēpara; kei tā te kaiwhatu kākahu tāku kōpaki i tōku ora; ka tapahia mai ahau e ia i roto i ngā miro; i te ao, i te pō, mutu pū tāku i a koe.

¹³ I whakamārie ahau i ahau ā taea noatia te ata; tērā tāna e rite ki tā te raiona, ka wāwāhia e ia ōku iwi katoa; i te ao, i te pō, mutu pū tāku i a koe.

¹⁴ I korokī ahau, pērā i tā te warou, i tā te kareni; i tangi ahau me te kūkupa. Matawaia ana ōku kanohi i te tirohanga whakarunga. E Ihowā, e tūkinotia ana ahau, pikitia tōku tūranga!”

¹⁵ Kia pēhea he kupu māku? Nāna i kōrero ki ahau, nāna anō i mahi; i ōku tau katoa ka āta haere ahau i runga i te kawa o tōku wairua.

¹⁶ E te Ariki, kei ēnei mea te ora o te tangata, kei ēnei mea katoa anō te ora o tōku wairua; mō reira whakahokia ake ahau e koe ki te ora, kia ora ai ahau.

¹⁷ Nanā, he mea kia rangimārie ai ahau i pā ai te pōuri kino ki ahau; otiia he aroha nōu ki tōku wairua i ora ai ahau i roto i te rua o te ngaromanga. Kua oti nei hoki ōku hara katoa te maka e koe ki muri i tōu tuarā.

¹⁸ E kore hoki e taea e te rēinga te whakawhetai ki a koe, e kore te mate e āhei te whakamoemiti ki a koe; ko te hunga e heke ana ki te rua kāhore ō rātou tūmanako ki tōu pono.

¹⁹ Ko te tangata ora, ko te tangata ora, māna te whakawhetai ki a koe, te pēnei me tāku nei i tēnei rā; tērā tōu pono ka whakakitea e te matua ki ngā tamariki.

²⁰ I tata mai a Ihowā ki te whakaora i ahau, mō reira ka waiatatia e mātou āku waiata i runga i ngā aho whakatangi i ngā rā katoa e ora ai mātou i roto i te whare o Ihowā.

²¹ I kī hoki a Ihāia, “Tīkina he papa piki, whakapiritia ki te whēwhē, ā, ka ora ia.”

²² I kī anō a Hetekia, “He aha te tohu tērā ahau ka haere ki runga ki te whare o Ihowā?”